Da 7 - Sơ̆p Hlabơar Nơ̆r 'Bok Kei-Dei

Yang Mêsi

¹ Sơnăm blŭng-a chăl pơtao Belsatsar pơgơ̆r, teh đak Babilôn, Đaniel apo 'bôh păng đei 'bôh lăm tơdrong tơchĕng kơplah sư oei 'bĭch kơpal giơng sư. Na sư chih hloi dôm tơdrong apo noh păng roi tơblang lu tơdrong noh.

² Thoi noh, Đaniel khan: Kơmăng inh oei tep, inh apo 'bôh, lăm tơdrong tơ'bôh kơ inh thoi âu: Đei puăn tŏ trong kial tơthu bah kơpal đak Dơsĭ Tih.

³ Đơ̆ng noh, đei puăn tŏ kon sem brem tih lĕch đơ̆ng đak; puăn tŏ kon sem brem 'nâu phara băl.

⁴ Sem brem mă adrol noh hơbŏ thoi dăm-brang păng đei pơnăr sem kring; inh lăng pơnhen dĭng truh tơ pơnăr sư tơbuch, na đe dui hơtŏk sư đơ̆ng teh, sư iung dang dơ̆ng năm 'bar pah jơ̆ng thoi kon bơngai bơ̆n păng kư̆m ăn kơ sư đei jơhngơ̆m kon bơngai.

⁵ 'Nâu sem brem mă 'bar, hơbŏ thoi chơgơu; sư dơ̆ng cheng minh pah akâu. Đei pêng tŏ kơting jơmir lăm 'bơ̆r sơlam hơnĕnh; kơpơ̆ng hăm ala păng đe khan kơ sư thoi âu: Iung bĕ; luăn sa lu sĕch mă lơ.

⁶ Đơ̆ng rŏng kơ noh, inh lăng, đei 'bôh dơ̆ng kon sem brem plơ̆ng hơbŏ thoi djrang, tơ kơpal rŏng sư đei puăn tŏ pơnăr thoi pơnăr sem. Sem brem noh đei puăn tŏ kơ̆l păng ăn kơ sư gơh pơgơ̆r.

⁷ Đơ̆ng rŏng inh lăng dơ̆ng mă tơdrong tơ'bôh kơ inh tơ kơmăng noh, 'nâu đei sem brem mă puăn, krưp dêh, kơtang tơpă păng đei jơhngơ̆m pran dêh tơpă. Sem brem noh đei grĕng bơsei tih tih; sư kơkă hĕch đĭ, luăn sa păng sư pơjuă lê̆ đĭ lu tơmam sa hăm jơ̆ng, sư pha kơ lu kon sem brem truh adrol noh păng đei mơjĭt tŏ hơke.

⁸ Kơplah inh lăng lu hơke noh păng 'nâu đei minh pôm hơke plơ̆ng dơ̆ng chăt tŏk-bŏk lu hơke mă đêl chăt adrol hei păng đei pêng tŏ lu hơke chăt adrol tơgloh hloi 'bơ̆t anăp sư. Hơke noh đei măt thoi măt kon bơngai păng đei 'bơ̆r pơma dôm lu nơ̆r kơnê̆, pơrŏ pơang.

⁹ Inh oei lăng dĭng đe dan lu tang-dŏ pơtao păng đei kră mă oei arih đơ̆ng sơ̆ hơ-oei kơpal tang-dŏ noh. Ao sư kok thoi prĕl păng sŏk sư rơgoh thoi sŏk triu. Tang-dŏ pơtao sư noh pla ŭnh păng lu tang-wang gre sư kư̆m pla ŭnh.

¹⁰ Đơ̆ng 'bơ̆t anăp sư, đei glung ŭnh ro tơ jơ̆p-jang; rơbâu hơngan linh jang awih awăn kơ sư păng rơbâu hơngan kon bơngai dơ̆ng 'bơ̆t anăp sư. Tơdrong sek tơlang hơmet lê̆ boih păng đe kư̆m pơih lu sơ̆p hla bơar.

¹¹ Dang ei inh lăng dơ̆ng yua kơ tơdrong pơrŏ pơang na mă lĕch nơ̆r pơma đơ̆ng hơke noh. Thoi noh inh lăng dĭng truh tơ sem brem noh đe pơlôch, akâu sư đe pơrăm đĭ păng klơ̆m ăn kơ ŭnh sa.

¹² Gah lu sem brem nai pă đei gơh pơgơ̆r boih Mă-lei ăn arih sot 'biơ̆ minh bơyan minh kơchon.

¹³ Inh kư̆m lăng dôm tơdrong inh đei apo 'bôh kơmăng noh. 'Nâu, inh 'bôh dơ̆ng minh 'nu Yang thoi kon bơngai jur hăm hơmơ̆l đơ̆ng plĕnh; Sư truh tơ 'Bok Arih đơ̆ng sơ̆ păng đe ba sư 'bơ̆t anăp 'Bok Arih đơ̆ng sơ̆.

¹⁴ Sư đei tơdrong mơsêh, gơh kĕ, ư-ang păng đĭ dêh char, đĭ adrĕch kon bơngai, đĭ nơ̆r pơma awih awăn kơ Sư. Tơdrong pran kơtang, mơsêh mơyang tơdrong oei oei pơgơ̆r ling-lang ưh kơ tôch păng dêh char Sư đe pă đei pơrăm boih.

¹⁵ Gah inh Đaniel, jơhngơ̆m inh ơh sơ'ngon lăm akâu inh păng dôm tơdrong inh đei 'bôh pơm kơ inh hơwơ̆l hơwang.

¹⁶ Inh năm dơ̆ng tơ jê̆ minh 'nu bơngai mă oei dơ̆ng tơ noh păng inh apinh Sư gah tơdrong 'nâu tơpă thoi yơ. Sư hloi khan kơ inh păng tơblang ăn kơ inh dôm tơdrong noh thoi âu:

¹⁷ Puăn tŏ sem brem tih, wă khan puăn 'nu pơtao wă iung blah teh âu.

¹⁸ Mă-lei lu 'bok 'lơ̆ng rơgoh đơ̆ng Kră Yang 'Bok Kei-Dei Tih hloh gô iŏk dêh char pơtao sư, dêh char noh oei oei ling-lang ưh pă đei tôch.

¹⁹ Dang ei Inh wă tơbăt gah kon sem brem mă puăn, sem brem mă phara kơ kon sem brem nai, lăng krưp dêh hơnĕnh sư bơsei, kơchôp sư kong, sư kơkă pơhĕch păng luăn sa đĭ păng dôm tơmam kiơ kiơ mă oei oei sư pơjuă hăm jơ̆ng sư.

²⁰ Inh kư̆m wă kơ băt sĭt gah mơjĭt tŏ hơke tơ kơ̆l sư păng đei pêng tŏ hơke mă tơgloh noh dơ̆ng. Hơke 'nâu đei măt lơ păng đei 'bơ̆r gơh pơma lu nơ̆r pơrŏ pơang păng hơbŏ rup sư pran kơtang hloh kơ lu hơke nai.

²¹ Kơplah noh inh oei lăng hơke tơblah hăm lu 'Bok 'lơ̆ng rơgoh jei sư,

²² dĭng truh tơ 'Bok arih đơ̆ng sơ̆ jur ăn tơdrong sek tơlang kơ lu 'Bok 'lơ̆ng rơgoh Kră Yang Tih Hloh păng jơ 'năr truh kơplah lu 'Bok 'lơ̆ng rơgoh iŏk dêh char pơtao.

²³ Thoi ei na sư khan kơ inh: Sem brem mă puăn Sư gô pơjing dêh char mă puăn tơ kơpal teh, dêh char sư phara kơ Dêh char nai, yua kơ sư gô luăn pơđĭ teh đak, pơjuă păng pơrăm đĭ.

²⁴ Mơjĭt tŏ hơke wă khan mơjĭt 'nu pơtao gô iung lĕch đơ̆ng dêh char noh păng gô đei minh 'nu pơtao iung đơ̆ng rŏng, sư phara kơ lu pơtao adrol păng sư gơh blah pơchah pơrăm lê̆ pêng 'nu pơtao.

²⁵ Pơtao noh sư gô blah pơma kơnê̆ kơ Kră Yang 'Bok Kei-Dei Tih hloh, pơm kơ lu bơngai 'lơ̆ng rơgoh Kră Yang Tih Hloh rơdu rơmơ̆n păng sư pơkă wă tơplih khôi juăt, tơplih tơdrong pơgơ̆r, kơplah noh đe gô pơjao lu bơngai 'lơ̆ng rơgoh lăm ti sư minh sơnăm, 'bar sơnăm, minh puăt sơnăm.

²⁶ Mă-lei tơdrong sek tơlang gô truh păng đe gô iŏk lê̆ tơdrong pơgơ̆r đơ̆ng sư, wă pơrăm tơhiong tôch đĭ hloi.

²⁷ Đơ̆ng noh tơdrong gơh kĕ pơgơ̆r dêh char pơtao, kơkuh pơyom jao ăn teh đak oei ala plĕnh, gô jao ăn kơ 'Bok 'lơ̆ng rơgoh Tih hloh. Dêh char pơtao Sư jing dêh char pơtao ling-lang, lu bơngai pơgơ̆r, bơ̆jang kơ Sư păng chu yom kiơ̆ nơ̆r Sư,

²⁸ dĭng dâu nơ̆r roi tơdrong tơ'bôh âu đĭ, gah inh Đaniel, tơdrong inh tơchĕng hơwơ̆l hơwang dêh. Muh măt inh jing dreng hơ'blă, mă-lei inh răk lăm đon inh dôm tơdrong noh.