Da 6 - Sơ̆p Hlabơar Nơ̆r 'Bok Kei-Dei

Đaniel lăm war dăm-brang

¹ Pơtao Đarius pôk ăn minh-hrĕng 'bar-jĭt 'nu pơm yŏng pơgơ̆r tơring, wă asong băl pơgơ̆r jơ̆p tơ lăm dêh char sư.

² Tơ kơpal 'biơ̆ kơ lu đe noh đei pêng 'nu jing kơiĕng pơtao, lăm noh đei Đaniel. Lu yŏng pơgơ̆r tơring, athei roi tơbăt ăn kơ lu đe pêng 'nu noh băt rim kơ tơdrong kiơ kiơ, na wă kơ pơtao huay pă hiơ̆k kơ minh tơdrong kiơ.

³ Na Đaniel pơm yŏng tih hloh 'biơ̆ kơ bre 'bar 'nu noh păng kư̆m tih hloh kơ lu yŏng pơgơ̆r tơring, yua kơ sư đei tơdrong gơh hơgei; na pơtao pôk ăn kơ sư pơm tih hloh kơ đĭ-đăng lăm char sư.

⁴ Bre kơiĕng pơtao păng lu yŏng pơgơ̆r tơring chă đon wă 'maih pơrăm, kêng Đaniel lăm tơdrong pơgơ̆r teh đak. Mă-lei lu sư chă ưh kơ đei tơdrong kiơ wă kơ gơh kêng, kư̆m ưh kơ đei minh tơdrong kơnê̆ kiơ sư pơm, yua kơ sư jing minh 'nu bơngai tơnăp tơpăt ưh kơ đei tơdrong hơlĕnh păng kư̆m ưh kơ đei minh tơdrong kơnê̆ kiơ.

⁵ Thoi noh lu đe noh khan thoi âu; lu bơ̆n chă tơdrong wă kơ kêng Đaniel ưh kơ đei, tơdah lu bơ̆n ưh kơ chă lăm khôi juăt Kră Yang 'Bok Kei-Dei sư.

⁶ Bre kơiĕng pơtao păng yŏng pơgơ̆r tơring lu sư năm khan păng apinh 'Bok pơtao thoi âu: Ơ pơtao Đarius, hơpơi kơ ih arih ling-lang!

⁷ Đĭ kơ lu yŏng kơiĕng pơtao păng yŏng linh păng yŏng pơgơ̆r tơring lăm dêh char, lu bơngai bơ̆jang tih, lu sư pơđâu băl lăp đon boih wă apinh ih ăn tơdrong pơkăm gơret tơpă lăm pêng-jĭt năr, bơngai bu mă krao khan kơ yang nai dah krao apinh bu nai 'nguaih kơ pơtao, na, ơ pơtao, lu bơngai noh klơ̆m hơtat lê̆ sư tơ lăm war dăm-brang.

⁸ Dang ei, ơ pơtao, chih pơkăm tơbăt bĕ păng kĭ hloi măt ih lăm noh, wă kơ kĭ huay kơ tơplih, kiơ̆ thoi tơdrong juăt bơngai Mêđi păng bơngai Pherơsơ, ưh pă gơh tơplih boih.

⁹ Đơ̆ng noh pơtao Đarius chih hloi hla bơar pơkăm na kĭ anăn sư.

¹⁰ Kơplah Đaniel kơtơ̆ng tơdrong pơkăm noh pơtao kĭ anăn sư boih, na sư brŏk tơ hnam sư, lu 'măng-'mŏk iĕ gah Jêrusalem sư pơih đĭ. 'Bơ̆t noh, kư̆ rim năr pêng wơ̆t, sư hơtơ̆p kŭl-tăng krao khan, kơkuh bơnê kơ Kră Yang 'Bok Kei-Dei sư. Sư kư̆m pơm thoi sư juăt kơ pơm ki hmă.

¹¹ Kơplah dang ei lu đe noh pơtơm băl akŭm, 'bôh Đaniel oei krao khan kơ Kră Yang 'Bok Kei-Dei.

¹² Lu sư năm tơ pơtao păng roi kơ pơtao, gah tơdrong mă sư đei kĭ boih lăm hla bơar pơkơ̆m noh thoi âu: Ơ pơtao ih đei kĭ boih lăm hla bơar pơkơ̆m noh păng pơkă lăm pêng-jĭt năr, dah đei bu krao khan kơ yang nai dah krao khan kơ bơngai nai 'nguaih kơ ih na gô klơ̆m lê̆ sư tơ lăm war dăm-brang hăm trŏ ưh? Pơtao drơ̆ng trŏ tơpă kiơ̆ tơdrong juăt lu bơngai Mêđi păng bơngai Pherơsơ, ưh pă tơplih boih.

¹³ Lu sư tơl păng khan kơ pơtao thoi âu: Đaniel minh 'nu lăm lu kon sâu Juđa mă pơm đĭch, sư ưh kơ wă mơ̆ng, ưh kơ wă pơyom kơ pơtao hơya tŏ sĕt, ơ pơtao, mă truh tơdrong pơtao pơkơ̆m păng kĭ anăn boih ră, mă-lei sư kư̆ oei krao khan rim năr pêng wơ̆t.

¹⁴ Kơplah pơtao kơtơ̆ng lu nơ̆r noh, thoi noh sư sơ'ngon dêh; pơtao wă 'maih pơklaih Đaniel ră păng gô dĭng 'năr mơ̆t, adrin đĭ jơhngơ̆m chă trong wă pơklaih Đaniel.

¹⁵ Mă-lei lu đe noh năm khan kơ pơtao thoi âu: Ơ pơtao, apinh ih 'blŏk kiơ̆ kơ tơdrong juăt bơngai Mêđi păng bơngai Pherơsơ, tơdrong pơkơ̆m dah tơdrong juăt ayơ đei pơjing boih, ưh pă gơh tơplih dơ̆ng.

¹⁶ Thoi noh pơtao athei krao Đaniel păng athei đe klơ̆m sư tơ lăm war dăm-brang. Pơtao khan kơ Đaniel thoi âu: Kră Yang 'Bok Kei-Dei mă ih oei bơ̆jang, gô pơklaih ih.

¹⁷ Đe iŏk hloi minh pôm tơmo tih wă đơ̆p 'măng sơlŭng păng pơtao chơ̆m tơdra sư păng tơdra lu yŏng pơgơ̆r tơring hai, wă kơ ưh kơ đei tơdrong kiơ mă gơh tơplih tơdrong truh kơ Đaniel.

¹⁸ Đơ̆ng rŏng kơ noh, pơtao wih brŏk tơ hnam pơtao sư, ưh kơ sŏng sa, kư̆m ưh kơ đei iŏk lu brŏ reh 'bơ̆t anăp sư păng pơtao ưh kơ gơh tep.

¹⁹ Na, pơtao drôih iung đơ̆ng hrôih, sư hăt hot kơdâu năm tơ sơlŭng dăm-brang.

²⁰ Pơtao năm 'nao wă jê̆ sơlŭng dăm-brang, sư krao Đaniel hăm nơ̆r sơ'ngon pơtao pơma hăm Đaniel thoi âu: Ơ Đaniel, đĭch đam Kră Yang 'Bok Kei-Dei mă arih ling-lang! Kră Yang 'Bok Kei-Dei ih, mă ih oei bơ̆jang Sư hăm pơklaih ih đơ̆ng 'bơ̆r dăm-brang ưh?

²¹ Na Đaniel khan kơ pơtao: Ơ pơtao hơpơi kơ ih arih ling-lang!

²² Kră Yang 'Bok Kei-Dei inh đei wơh Linh jang Sư chĭt lê̆ 'bơ̆r lu dăm-brang, thoi ei na lu sư ưh kơ gơh pơrăm inh, yua kơ inh khan boih, inh ưh kơ đei pơm yoch kiơ 'bơ̆t anăp sư, ơ pơtao, mă hăm ih kư̆m lei-lăi inh ưh kơ đei pơm yoch kiơ.

²³ Na, pơtao chhôk dêh păng athei đe hơtŏk Đaniel đơ̆ng lăm sơlŭng. Thoi ei na đe hơtŏk Đaniel tơ kông păng đĭ-đăng lu đe lăng Đaniel ưh kơ đei rơka kiơ tơ akâu sư; yua kơ sư gơnang kơ Kră Yang 'Bok Kei-Dei sư.

²⁴ Kiơ̆ thoi pơtao đei athei, dôm lu bơngai đêl kêng Đaniel noh hăm lu kon akăn sư, athei đe klơ̆m lê̆ tơ lăm sơlŭng dăm-brang noh. Lu sư tam mă truh tơ kơđĕl sơlŭng ră mă-lei kơplah noh lu dăm-brang plŏng rôp hek hok kơting đĭ hloi.

²⁵ Đơ̆ng noh, pơtao Đarius chih tơbăt ăn kơ đĭ-đăng kon pơlei pơla, tơ jơ̆p dêh char, tơ rim adrĕch, rim nơ̆r pơma kơpal teh thoi âu: Hơpơi kơ lu iĕm đei tơdrong pŭn hiôk rai dêh.

²⁶ Inh chih tơbăt, ăn jơ̆p kơ lăm dêh char 'bôh, đĭ-đăng athei hli yom tơtơ̆ 'bơ̆t anăp Kră Yang 'Bok Kei-Dei arih ling-lang hlŏng hloi, Kră Yang 'Bok Kei-Dei Đaniel teh đak Sư ưh kơ đei layơ hiong răm păng tơdrong mơsêh mơyang Sư oei oei ling-lang truh năr tôch.

²⁷ Sư boih mă dŏng pơklaih păng yaih achăng, pơm lơ tơdrong hlĭch păng chrơp tơ kơpal plĕnh ala teh dŏng pơklaih boih Đaniel đơ̆ng tơdrong pran kơtang dăm-brang.

²⁸ Đaniel đei tơdrong pŭn hiôk đĭ chăl arih sư kơplah oei pơtao Đarius păng pơtao Sirus bơngai Pherơsơ pơm pơtao.