Da 5 - Sơ̆p Hlabơar Nơ̆r 'Bok Kei-Dei

Năr et sa kơ pơtao Belsatsar. Dêh char Kalđê pơchah

¹ Pơtao Belsatsar đei hơmet et sa tih sư krao wơ̆n đĭ minh-rơbâu 'nu kuan tih păng pơtao huch tơdrô 'bơ̆t anăp lu sư.

² Belsatsar oei huch tơdrô, athei đe iŏk pơnhan maih, pơnhan hu mă đơ̆ng pơtao Nebukatnessar 'bă sư, mă đei iŏk kơchŏk đơ̆ng lăm hnam akŭm pơlei Jêrusalem noh, wă ăn kơ pơtao păng lu kuan tih, lu akăn tơm, akăn kơnhŏng pơtao kư̆m yua pơnhan noh huch.

³ Đe năm iŏk hloi boih, lu kơchŏk pơnhan maih mă đei iŏk đơ̆ng hnam akŭm Kră Yang 'Bok Kei-Dei, đơ̆ng pơlei Jêrusalem; păng pơtao hăm lu kuan tih, lu akăn tơm, lu akăn kơnhŏng pơtao lu sư yua pơnhan noh huch tơdrô;

⁴ Thoi noh lu sư huch tơdrô păng drap kơkuh bơnê kơ rup yang đe man păng maih păng hu păng kong păng 'long păng bơsei păng tơmo.

⁵ Lăm jơ noh hloi đei hơnglâu ti, chih tơ tơnăr hnam pơtao, tơklă 'bơ̆t anih dan jơ̆ng ŭnh kơđeng păng pơtao 'bôh hloi tơpang ti noh oei chih.

⁶ Na muh măt pơtao păng đon tơchĕng sư tơplih pơm kơ sư hơwơ̆l hơwang; lu kơting rŏng sư pă tơklep păng 'bar pah kŭl-tăng sư pơpơ̆ hơtŭt băl.

⁷ Pơtao krao ôr athei đe krao lu bơngai hơgei, lu bơngai gơh tơwir lu pơjâu bơngai Kalđê truh. Đơ̆ng noh, pơtao khan kơ bơngai hơgei, lu bơngai pơjâu bơngai Kalđê lăm Babilôn thoi âu: Bu gơh đŏk chư 'nâu? Păng gơh tơblang ăn kơ inh băt, lei sư noh inh gô pơhrŭk ăn kơ sư ao pơtao, gơh đei 'băk kon kiơng maih tơ hơko sư păng jing bơngai pơm tih mă pêng lăm lu kuan pơgơ̆r teh đak.

⁸ Kơplah ei đĭ-đăng lu bơngai hơgei mơ̆t; mă-lei lu sư đŏk chư noh ưh kơ gơh, kư̆m ưh kơ gơh wă tơblang ăn kơ pơtao mơ̆n.

⁹ Pơtao Belsatsar bơngơ̆t dêh; muh măt sư rai pha; lu kuan pơgơ̆r hnam pơtao kư̆m hiơ̆k bơngơ̆t.

¹⁰ Yă pơtao, yua kơ kơtơ̆ng nơ̆r pơtao păng lu kuan tih đei pơma, na sư mơ̆t hloi tơ anih sŏng sa, sư khan thoi âu: Ơ pơtao, hơpơi kơ ih arih ling-lang! Apinh pơtao 'nĕ pă tơchĕng tơtăm, muh măt ih 'nĕ pă hơ'nhôi thoi noh!

¹¹ Tơ lăm dêh char đei minh 'nu bơngai, đei Yang Bơhngol 'Lơ̆ng oei, lăm chăl 'bă ih đe đei 'bôh tơ lăm sư đei tơdrong hơdah, đei tơdrong hơgei, đei đon hlôh wao, tơdrong gơh hơgei nhen thoi Yang. Thoi noh pơtao Nebukatnessar, 'bă ih, kơdih akâu 'bă ih đei pôk boih sư noh pơm yŏng jing kơ̆l kơ đĭ-đăng lu bơngai hơgei păng lu bơngai pơjâu, lu bơngai hơgei gơh tơwir lăm adrĕch Kalđê.

¹² Yua kơ Đaniel mă pơtao 'bă đei anăn Beltơsatsar tơ lăm sư đei Yang Bơhngol 'Lơ̆ng arih 'lơ̆ng tơpă, đei tơdrong gơh hơgei, băt hlôh wao, wă tơblang lu tơdrong apo, tơblang dôm tơdrong mă hlơp kon bơngai ưh kơ băt păng pơm ăn kơ tơdrong hiơ̆k hơwơ̆l hơwang hiong đĭ. Thoi ei na krao bĕ Đaniel, sư gô tơblang ăn.

¹³ Thoi noh đe năm ba Đaniel 'bơ̆t anăp pơtao. Đơ̆ng noh, pơtao khan kơ Đaniel thoi âu: Ih hăm trŏ kơ Đaniel ưh, minh 'nu lăm lu bơngai Juđa mă 'bă inh chông ba đơ̆ng dêh Juđa mă pơm đĭch.

¹⁴ Inh đei kơtơ̆ng đe roi khan ih đei Yang Bơhngol 'Lơ̆ng lu Yang oei lăm ih păng đe đei 'bôh tơ lăm ih đei hơdah, gơh hơgei, hlôh wao păng gơh băt phara kơ đe.

¹⁵ Dang ei lu bơngai gơh tơwir, lu pơjâu đe năm ba truh tơ âu 'bơ̆t anăp inh boih ră wă kơ lu sư đŏk chư noh păng wă kơ tơblang ăn kơ inh; mă-lei lu sư ưh kơ gơh tơblang.

¹⁶ Inh đei kơtơ̆ng đe khan ih gơh tơblang păng pơm ăn kơ dôm tơdrong hơwơ̆l hơwang hiong đĭ. Thoi âu tơdah ih gơh đŏk lu chư âu păng tơblang ăn kơ inh, lei ih gô hrŭk ao pơtao, 'băk kon kiơng maih păng gô pơm kuan yŏng mă pêng lăm dêh char âu.

¹⁷ Thoi noh Đaniel tơl pơma 'bơ̆t anăp pơtao thoi âu: Pơtao ih kư̆ kơ bơwei tơmam noh păng gô apah lu đe nai tơmam noh! Mă khan, huay kơ apah inh kư̆m đŏk ăn lu chư noh kơ ih păng tơblang ăn kơ ih pơtao.

¹⁸ Ơ pơtao, Kră Yang 'Bok Kei-Dei Tih hloh đei ăn boih tang-dŏ pơtao păng tơdrong pơgơ̆r tih, tơdrong pơyom, tơdrong ư-ang kơ pơtao Nebukatnessar 'bă ih.

¹⁹ Yua kơ Kră Yang 'Bok Kei-Dei đei ăn boih kơ sư đei pơgơ̆r tih, na đĭ-đăng kon pơlei pơla jơ̆p kơ dêh char, đĭ khŭl bơngai rim kơ adrĕch tă kơ hli yom ngăl 'bơ̆t anăp sư păng hli yom kơ sư, sư pơlôch bu pơlôch, sư wă kơ bu arih, lê̆ arih. Wă pôk bu kơjung, dah tơjur bu kơđeh mơ̆ng kơ sư wă.

²⁰ Mă-lei yua kơ jơhngơ̆m sư pơang kơdih akâu, arăng kơ̆l na jing pơang, na sư hiong boih tang-dŏ pơtao păng đe ưh pă ư-ang kơ sư.

²¹ Tơweh lê̆ sư đơ̆ng anih kon bơngai, jơhngơ̆m đon sư thoi sem brem păng sư kư̆m oei thoi aseh bri. Sư arih sa 'nhĕt thoi rơmo păng akâu sư đak ngom kôp, tŭk đơ̆ng plĕnh jur gom sư, dĭng truh tơ sư băt 'blŏk kơ Kră Yang 'Bok Kei-Dei Tih hloh, pơgơ̆r dêh char kon bơngai păng Sư pôk bu pơm yŏng mơ̆ng kơ Sư.

²² Ơ Pơtao Belsatsar, kon pơtao Nebukatnessar ih kư̆m lei-lăi, mă ih băt boih dôm tơdrong noh ră, jơhngơ̆m ih kư̆m ưh kơ đei chu iŏk tŏ sĕt.

²³ Mă-lei pôk kơdih akâu blah Kră Yang kơpal plĕnh păng iŏk pơđĭ lu kơchŏk pơnhan hu maih đơ̆ng hnam akŭm Kră Yang păng yua huch tơdrô hơdai hăm lu yŏng lăm hnam pơtao, lu akăn tơm, akăn kơnhŏng pơtao. Pơtao kư̆m kơkuh kơ rup yang pơm păng hu păng maih păng kong păng mam păng 'long păng tơmo; lu yang mă đei măt mă ưh kơ gơh 'bôh, đei đon mă ưh kơtơ̆ng ưh kơ băt kiơ păng pơtao ưh kơkuh kơ Kră Yang 'Bok Kei-Dei Sư boih Yang Tơ'ngla mă chĕp tơdrong arih păng tôm lu trong gơlong pơtao pơm.

²⁴ Thoi noh đơ̆ng anih Sư đei wơh tơpang ti truh tơ âu păng đei chih lu chư âu:

²⁵ Lu chư mă đei boih noh wă khan thoi âu: MENE, MENE, TEKEL, PARSIN.

²⁶ Âu wă tơblang lu chư noh: Mene wă khan Kră Yang 'Bok Kei-Dei jô̆ boih dêh char pơtao păng wă pơtôch lê̆.

²⁷ Tekel wă khan: Pơtao đei kŏng boih kơpal 'long kŏng păng 'bôh ưh kơ tôm.

²⁸ Parsin wă khan: Dêh char pơtao ih gô klah asong, ăn kơ bơngai Mêdi păng bơngai Pherơsơ.

²⁹ Kiơ̆ thoi nơ̆r pơtao Belsatsar, đe iŏk ao pơtao pơhrŭk hloi kơ Đaniel; tơ'băk ăn kơ sư kon kiơng maih păng tơbăt hloi pôk sư pơm tih mă pêng lăm lu 'bok pơgơ̆r dêh char sư.

³⁰ Lăm măng noh hloi pơtao Belsatsar bơngai Kalđê đe pơlôch.

³¹ Đơ̆ng noh Đarius bơngai Mêdi iŏk dêh char, kơplah âu sư dang tơdrâu-jĭt 'bar sơnăm.