Da 12 - Sơ̆p Hlabơar Nơ̆r 'Bok Kei-Dei

Tuch-luch kơ tơdrong tơ'bôh. Noh gah tơdrong Yang Mêsi đei tơ'bôh kơ Đaniel

¹ Lăm chăl noh, Mikael, Linh jang tih, noh boih yŏng wă iung wei kơ kon pơlei ih. Kơplah noh gô đei tơdrong gleh truh, iŏk đơ̆ng đei pơjing dêh char truh tơ dang ei tam mă đei tơdrong truh tih thoi noh. Dang ei lăm lu kon pơlei ih, dôm lu bơngai mă đei chih măt lăm sơ̆p hla bơar noh gô klaih păng arih ling-lang.

² Lơ bơngai tep lăm teh gô iung hơđơ̆r, lu mơ'nah đei tơdrong arih ling-lang, lu mơ'nah gô pŭ iŏk tơdrong mơlâu păng pơmat-tat ling-lang.

³ Lu bơngai hơgei gô thoi măt pơchră rang pơchrang hơdah đơ̆ng plĕnh; păng dôm lu bơngai mă đei chông anhăk brŏk gah tơdrong tơpăt gô hơdah thoi sơnglŏng ling-lang măng năr hlŏng hloi.

⁴ Bê̆ gah ih, ơ Đaniel ih athei chih răk lê̆ nơ̆r âu păng athei pơ̆ng pơklep lê̆ sơ̆p hla bơar âu dĭng truh tơ năr tôch. Đei lơ bơngai yak nơnăm to âu păng tơdrong hŏk hơgei gô rai tŏk rai lơ.

⁵ Dang ei, inh Đaniel, lăng pơnhen păng âu, đei 'bar 'nu bơngai oei dơ̆ng tơ noh, minh 'nu gah âu kơ đak glung, minh 'nu pah to kơ đak glung.

⁶ Minh 'nu bơngai apinh bơngai hrŭk ao che brai se oei dơ̆ng kơpal đak glung, thoi âu: Truh năr tôch lu tơdrong hlĭch 'nâu hăm pă đunh?

⁷ Inh kơtơ̆ng nơ̆r pơma bơngai hrŭk ao 'bui kok oei dơ̆ng kơpal đak glung noh, sư yơ̆r 'bar pah ti, 'ma păng ti 'ngiĕo, dơhlâu tơ plĕnh, dơhlâu tơ Kră Yang 'Bok Kei-Dei arih ling-lang păng khan thoi âu: Gô đei lăm minh chăl, lu chăl păng minh puăt chăl păng kơplah lu kon pơlei 'Bok Kei-Dei ưh pă kĕ pơgơ̆r boih, na dôm lu tơdrong âu keh đang.

⁸ Inh, Đaniel, kơtơ̆ng dôm lu tơdrong noh, mă-lei inh ưh kơ hlôh. Păng inh khan thoi âu: Ơ! Kră Yang 'Bok Kei-Dei inh, tuch-luch kơ lu tơdrong 'nâu gô jing thoi yơ?

⁹ Sư tơl thoi âu: Ơ Đaniel, năm bĕ; yua kơ dôm lu nơ̆r âu đei chih lê̆ boih păng đei chơ̆m pơsĭt kơ chăl tuch-luch ei.

¹⁰ Gô đei lơ bơngai pơm kơdih akâu sư rơgoh jing kok păng đei pơhrăm pơmat. Mă-lei lu bơngai kơnê̆ kư̆ hrăn pơm kơnê̆; lăm lu bơngai khĕnh hơwĕng kơnê̆ dêh ưh kơ đei bu hlôh; mă-lei lu bơngai gơh hơgei gô hlôh.

¹¹ Đơ̆ng chăl mă lê̆ boih dôm tơdrong soi, tơmam soi 'buh mă juăt kơ pơyơ̆r păng tơdrong kơnê̆ 'mê̆ brư̆ jing juơ juŏ gô pơjing ming plơ̆ng dơ̆ng, gô đei minh-rơbâu 'bar-hrĕng tơsĭn-jĭt năr.

¹² Pŭn hiôk dêh kơ lu bơngai bu chang gô, truh tơ minh-rơbâu pêng-hrĕng pêng-jĭt pơđăm năr!

¹³ Bê̆ ih năm bĕ, dĭng truh chăl tôch. Ih gô pơdơh; păng truh tơ năr tôch ei, ih gô iung arih na iŏk tơmam apah.