Da 11 - Sơ̆p Hlabơar Nơ̆r 'Bok Kei-Dei

¹ Lăm sơnăm blŭng-a chăl Đarius pơm pơtao bơngai Mêdi, inh iung wă tơgŭm sư jing pran. Nơ̆r khan lê̆ adrol gah pơtao Grĕk pơrăm dêh char Pherơsơ păng pơtao gah yă-nơ̆m hăm pơtao gah gơal tơblah băl.

² Dang ei inh gô ăn kơ ih băt kơ tơdrong sĭt. 'Nâu, oei pă pêng 'nu pơtao lăm dêh char Pherơsơ iung blah đei dơ̆ng pơtao mă puăn, đei lơ mŭk tơmam hloh kơ đĭ-đăng; păng kơplah mŭk tơmam pơm ăn kơ pơtao noh jing pran, na sư gô pơtrŭt lơ bơngai blah dêh char Grĕk.

³ Mă-lei gô đei minh 'nu pơtao kơtang hloh iung blah păng kĕ pơgơ̆r tih păng pơm kiơ̆ hloi kơ sư wă.

⁴ Kơplah pơtao noh iung pran, na dêh char sư pơchah na klah song jing puăn, kiơ̆ kơ puăn pah trong kial đơ̆ng plĕnh, mă-lei ưh kơ đei pơsư̆ kơ kon sâu, kư̆m ưh pă kĕ pơgơ̆r thoi ki dơ̆ng; yua kơ dêh char sư đe gô buch pơjao ăn kơ bơngai nai plơ̆ng kơ lu bơngai noh.

⁵ Pơtao gah gơal gô pran, mă-lei đei minh 'nu yŏng pơgơ̆r linh, sư pran hloh kơ pơtao păng kĕ pơgơ̆r, tơdrong gơh kĕ sư tih dêh.

⁶ Dĭng truh tơ dôm sơnăm tuch-luch, lu pơtao noh pơpôi băl pôm đon; duch bia kon pơtao gah gơal năm tơ pơtao gah yă-nơ̆m wă tơguăt băl pôm đon mă-lei tơdrong pơtơm đơ̆ng ti duch bia kư̆m ưh kơ đunh, tơdrong pran kơtang đơ̆ng ti pơtao đơ̆ng gah yă-nơ̆m kư̆m pă đei; mă-lei duch bia hăm lu bơngai nai chông ba sư truh, hăm bơngai pơjing sư, hơdai hăm lu bơngai mă đei dŏng tơgŭm sư kơplah noh đe rôp đĭ.

⁷ Đei minh 'nu đơ̆ng hnam dơnŏ duch bia, iung wă tơplih kơ sư, na năm tơblah khŭl linh, mơ̆t tơ lăm kơđông gah yă-nơ̆m, blah iŏk na jei sư.

⁸ Sư iŏk pơđĭ lu rup yang anhăk ba tơ dêh char Êyiptơ, hăm iŏk pơđĭ lu rup man păng đĭ lu maih păng đĭ lu pơnhan chhĕr pơm păng hu păng maih hai; dang 'bar pêng sơnăm sư ưh kơ blah pơtao yă-nơ̆m.

⁹ Pơtao 'nâu gô năm tơ dêh char gah gơal, mă-lei sư hơlơ̆k brŏk tơ dêh char sư kơdih dơ̆ng.

¹⁰ 'Bar 'nu kon pơtao gah yă-nơ̆m năm blah, sư akŭm băl đei lơ lu linh hao aseh, gô truh, na yak năm 'bĕnh-'bang, lu sư wih năm blah truh tơ kơđông anih pơtao gơal.

¹¹ Na pơtao gah gơal blĕk dêh sư năm blah hloi pơtao gah yă-nơ̆m, sư hơmet lu linh gre aseh lơlap lơlang lu linh pơtao gah yă-nơ̆m noh sư gô rôp pơđĭ.

¹² Lu linh gah yă-nơ̆m noh tơklah tơklang đĭ, na lăm jơhngơ̆m pơtao gah gơal pơang, Sư khan sư gô pơlôch pơrăm lơ rơbâu hơngan bơngai, mă-lei ưh kơ kĕ jei sư ôh.

¹³ Pơtao yă-nơ̆m wih pơpôi khŭl linh lơ hloh dơ̆ng; păng đang kơ noh dang minh kơchon sơnăm, sư anhăk ba lu khŭl linh lơ hloh păng tơmam tơblah kư̆m lơ.

¹⁴ Kơplah noh đei lơ bơngai iung tơblah hăm pơtao gah gơal; păng lu kon sâu bơngai nuih pran lăm kon pơlei noh gô iung blah, wă kơ pơsĭt kơ tơdrong đei tơ'bôh, mă-lei lu sư gô lôch đĭ.

¹⁵ Na pơtao gah yă-nơ̆m truh; pơjing kơđông pơm minh pôm pơlei kơjăp; păng linh gah gơal, mă khan lu khŭl linh pran kơtang ră, mă-lei kư̆m ưh kơ kĕ kơ blah plơ̆, yua kơ tơdrong pran kơtang ưh pă đei.

¹⁶ Mă-lei lu linh mă năm blah lu sư pơm kiơ̆ mơ̆ng kơ lu sư wă păng ưh kơ đei bu kĕ blah lu sư dơ̆ng, sư gô oei hloi lăm teh đak noh ling-lang, pơgơ̆r tơdrong chă pơrăm đe.

¹⁷ Sư krao tơiung iŏk đĭ jơhngơ̆m pran kơtang đơ̆ng jơ̆p lăm dêh char sư kơdih năm blah sư hơlĕnh khan wă pơhiôk hăm pơtao gah gơal rôp ăn kon adruh sư pơm akăn wă pơrăm pơtao gah gơal ră, mă-lei sư ưh kơ kĕ păng ưh kơ jei sư.

¹⁸ Đơ̆ng noh lu sư weh drong tơ lu bŏl đak păng blah iŏk đei lơ anih. Mă-lei gô đei minh 'nu pơtao găn lê̆ tơdrong sư chă pơrăm đe noh păng pơm ăn kơ tơdrong noh tuh plơ̆ kơ lu sư.

¹⁹ Đơ̆ng noh lu sư wih tơ rŏng brŏk dơ̆ng tơ pơlei sư kơdih; mă-lei lu sư gô kơtơih păng pơ̆k, na chă pă đei 'bôh lu sư dơ̆ng.

²⁰ Dang ei đei dơ̆ng minh 'nu pơtao wă pơtrơp iŏk đơ̆ng sư, wơh lu bơngai chă năm pơgŏ pơđep tơ anih ư-ang kơ dêh char noh, mă-lei lăm hơdôm năr đĕch sư gô răm, ưh kơ trŏ kơ tơdrong tơhil dah tơdrong tơblah tơblŭng ayơ.

²¹ Đei dơ̆ng minh 'nu bơngai trŏ kơ đe areh yua kơ sư ưh kơ trŏ kơ đe wă pôk sư pơm pơtao, mă-lei sư gô năm kơplah đei tơdrong hiôk-hian, yua nơ̆r pơma hơlĕnh pơdăr na tơgar iŏk dêh char noh.

²² Khŭl linh lơlang 'bĕnh-'bang, gô kơdâu sơlah gah thuơ đĭ 'bơ̆t anăp sư, truh tơ yŏng lu bơngai mă Kră Yang đei pơkăm pơkă băl kư̆m lei-lăi.

²³ Mă khan pơkă pơkăm pơtao nai, sư kư̆m chă hơlĕnh, chĕp ba lu linh truh, lu linh noh đei pran kơtang đơ̆ng minh pôm kon pơlei tŏ sĕt đĕch;

²⁴ Sư gô yua kơplah đe oei hiôk-hian rơnŭk rơnua noh tơgar iŏk teh 'lơ̆ng hloi lăm tơring ei păng gô pơm lu tơdrong mă 'bok yă păng lu kră sơ̆ tam biơh pơm; iŏk dôm lu tơmam mă đêl sư tơgar iŏk, asong mŭk tơmam noh kơ lu bơngai mă kiơ̆ sư, chă đon blah iŏk anih kơđông, mă-lei sư pơgơ̆r ưh kơ đunh.

²⁵ Đơ̆ng noh pơtao hơmet ming jơhngơ̆m pran sư, yua khŭl linh lơ năm blah pơtao gah gơal. Pơtao gah gơal kư̆m gô blah hăm lu đe blah sư păng kư̆m chĕp ba lu khŭl linh lơ păng pran kơtang dêh; mă-lei sư ưh kơ kĕ ôh blah iŏk, yua kơ đei bơngai chă đon hơlĕnh hơgei dêh.

²⁶ Lu bơngai mă sŏng sa hơdai 'bơ̆t gô 'bang pơtao gô pơrăm pơtao; lu linh sư gô tơklah tơklang păng đei lơ bơngai lôch hiong.

²⁷ Đei 'bar 'nu pơtao noh, lăm jơhngơ̆m bre sư 'maih chă pơrăm băl, et sa hơ-oei minh pôm gô 'bang mă-lei pơma hơlĕnh băl, mă-lei tơdrong ưh kơ jing ôh, yua kơ gô đei năr tôch trŏ kơ năr đei pơkă boih.

²⁸ Pơtao noh gô wih brŏk tơ dêh char sư kơdih chĕp ba lơlap mŭk tơmam, jơhngơ̆m sư 'maih hơlĕnh blơ̆ hăm nơ̆r pơgơ̆p rơgoh noh păng sư gô pơm kiơ̆ thoi sư kơdih păng wih brŏk tơ dêh char sư kơdih.

²⁹ Dĭng truh kơ năr đêl pơkă sư gô wih dơ̆ng tơ gah gơal; mă-lei sư brŏk đơ̆ng rŏng kơ noh ưh pă thoi sư brŏk adrol ki.

³⁰ Yua kơ đei duk đơ̆ng tơring Kitim gô truh tơ noh tơblah hăm sư; lei na sư brŏk hăm tơdrong tơtok sơ'ngon. Sư blĕk dêh na gô pơm plơ̆ kơ tơdrong pơgơ̆p rơgoh păng pơm kiơ̆ kơ sư kơdih. Sư gô brŏk păng lăng gĭt kơ lu bơngai mă lê̆ tơdrong pơgơ̆p rơgoh noh.

³¹ Lu linh mă sư lăp đon, gô iung pơm 'mê̆-'mach kơ anih kơđông rơgoh, iŏk lê̆ tơmam soi 'buh mă juăt kơ pơyơ̆r păng pơm tơdrong kơnê̆, pơm kơ anih noh jing juơ.

³² Sư yua dôm tơdrong hơlĕnh pơdăr na pơhlŭ lu bơngai pơm kơnê̆ kơ tơdrong pơgơ̆p; mă-lei kon pơlei băt kơ Kră Yang 'Bok Kei-Dei oei pơm pran kơtang dêh.

³³ Lu bơngai hơgei hlôh wao gô bơtho lơ bơngai; mă-lei lu sư gô lôch kơ đao, lôch kơ ŭnh, lôch kơ đe phak lôch kơ đe plah tơgar lăm đunh sơnăm dêh.

³⁴ Kơplah lu sư pơ̆k huŏng, kư̆m đei mơ'nah gơh klaih; mă-lei gô đei lơ bơngai pơma hơlĕnh khan kiơ̆ lu sư.

³⁵ Kŭm đei lăm lu bơngai hơgei pơ̆k, wă kơ hŏk pơhrăm kơ lu sư, wă pơm ăn kơ lu sư rơgoh păng jing kok, truh tơ năr tôch, yua kơ tơdrong 'nâu gô đei năr pơkă.

³⁶ Pơtao âu gô pơm kiơ̆ kơ sư wă; pơư pơang pôk hơtŏk sư kơdih jing kơjung hloh kơ lu yang, pơma nơ̆r hlĭch chrơp blah plơ̆ 'Bok Kei-Dei Kră Yang lu yang. Sư gô đei tơdrong pŭn hiôk dĭng truh tơ năr Kră Yang 'Bok Kei-Dei hil, yua kơ dôm tơdrong kiơ mă đei pơkă boih gô đei trŏ 'blep.

³⁷ Sư ưh pă wêr lu yang yă 'bok sư păng kư̆m ưh pă lăng lu yang mă drŏ-kăn oei 'mêm. Sư lăng lu yang ưh pă rơ-a kiơ; yua kơ sư pôk hơtŏk sư kơjung hloh kơ đĭ-đăng.

³⁸ Mă-lei sư gô oei dơ̆ng tơ anih sư kơdih na sư gô kơkuh kơ yang lu kơđông, sư gô iŏk Hu, Maih, Tơmo gĭt păng dôm lu tơmam 'lơ̆ng rŏ, na kơkuh kơ yang mă 'bok yă sư ưh kơ băt.

³⁹ Sư gô gơnang kơ lu yang đơ̆ng tơmoi wă tơgŭm sư kĕ blah iŏk lu kơđông kơjăp păng sư gô pơang kơ bơngai bu mă kiơ̆ sư. Sư gô ăn kơ lu đe noh pơgơ̆r kon pơlei păng asong jên kăk păng teh jang sa.

⁴⁰ Truh tơnăr đơ̆ng rŏng, pơtao gah gơal gô truh tơblah hăm sư. Pơtao gah yă-nơ̆m gô chĕp ba khŭl linh gre aseh păng duk lơ, na tŏk blah pơtao noh thoi phŭt huơ̆r. Sư gô blah truh tơ lơ dêh char nai.

⁴¹ Sư gô mơ̆t truh tơ teh đak ư-ang păng đei lơ dêh char gô pơchah. Mă-lei lu bơngai Eđôm, lu bơngai Môap păng lu bơngai pơgơ̆r lăm lu kon pơlei Ammôn gô klaih đơ̆ng ti sư.

⁴² Sư gô plaih ti sư tơgar iŏk lơ dêh char păng dêh Êyiptơ kư̆m ưh kơ gơh klaih.

⁴³ Sư gô iŏk lơ tơmam gĭt, hu maih păng kư̆m iŏk pơđĭ tơmam gĭt đơ̆ng Êyiptơ; kon pơlei Libi păng kon pơlei Êthiôpi gô kiơ̆ đơ̆ng rŏng kơ sư.

⁴⁴ Mă-lei lu tơdrong roi tơbăt đơ̆ng gah hơlĕch păng gah yă-nơ̆m gô truh tơ sư pơm kơ sư hơwơ̆l, hiơ̆k bơngơ̆t; sư blĕk dêh na chă đon wă pơrăm păng pơlôch lơ bơngai.

⁴⁵ Sư gô pơjing anih kơđông pơtao sư tơ tŏk-bŏk đak dơsĭ păng kông rơgoh ư-ang. Mă-lei sư gô truh năr tôch kơ sư kơdih păng ưh kơ đei bu mă tơgŭm sư.