Biblia Todo Logo
Bìoball air-loidhne

- Sanasan -

Both 7 - Sơ̆p Hlabơar Nơ̆r 'Bok Kei-Dei


Puh pơrăm kon pơlei Kanaan

1 Layơ Kră Yang 'Bok Kei-Dei iĕm chông ba iĕm mơ̆t iŏk dêh mă Sư pơkă păng puh tơweh đĭ lu adrĕch đe 'bơ̆t anăp iĕm, noh lu kon pơlei Hêtit, kon pơlei Girgasit kon pơlei Amôrit, kon pơlei Kanaan, kon pơlei Pêrisit, kon pơlei Hêwit păng kon pơlei Jêbus, wă khan tơpơh adrĕch tih păng pran hloh kơ iĕm.

2 Layơ Kră Yang 'Bok Kei-Dei jao lu adrĕch noh kơ iĕm păng iĕm blah pơrăm đĭ lu sư jei iĕm, kơplah noh iĕm athei pơlôch đĭ lu sư, 'nĕ kơ pơgơ̆p hơdai hăm lu sư păng kư̆m 'nĕ kơ mơnat kơ lu sư mơ̆n.

3 Lu iĕm kư̆m 'nĕ kơ pơm pô̆ 'băn hăm lu sư, kư̆m 'nĕ kơ ăn kon drŏ-kăn iĕm oei kơ kon drŏ-nglo lu sư, kư̆m 'nĕ kơ iŏk oei kon drŏ-kăn lu sư ăn kơ kon drŏ-nglo iĕm.

4 Yua kơ lu adrĕch 'nâu gô pơhlŭ kon drŏ-nglo ih, achăng lê̆ Inh, na awih awăn kơ lu yang nai, đơ̆ng noh kơnh Kră Yang gô hil mĭl kơ iĕm, na sư gô pơlôch ih hloi.

5 Mă-lei 'nâu iĕm athei pơm kơ lu sư: Pơrăm lê̆ lu chơnang soi, teh pơchah lê̆ lu gơ̆ng pơm yang lu sư păng athei kăl tơpăk lê̆ yang Asêrim păng soh pơđĭ rup yang đơ̆ng sư man dah traih.

6 Yua kơ iĕm jing minh adrĕch 'lơ̆ng rơgoh ăn kơ Kră Yang 'Bok Kei-Dei iĕm; Sư rơih iŏk iĕm đơ̆ng lu adrĕch kơpal teh đak âu. Wă kơ iĕm jing kon pơlei pơla Sư.

7 Kră Yang 'mêm kơeng păng rơih iŏk lu iĕm ưh kơ sĭ yua kơ lu iĕm bơngai lơ hloh kơ adrĕch lu đe nai ôh. Tơpă lu iĕm tŏ sĕt hloh kơ lu adrĕch lu đe nai.

8 Mă-lei yua kơ Kră Yang 'mêm kơ lu iĕm păng wei nơ̆r pơkă hăm lu 'bok iĕm sơ̆, Kră Yang yua tơpang ti pran kơtang Sư dui lu iĕm lĕch hlôi đơ̆ng pơm đĭch păng dŏng pơklaih đơ̆ng tơpang ti Pharaôn, pơtao dêh Êyiptơ.

9 Thoi noh na iĕm athei băt kơnăl kơ Kră Yang 'Bok Kei-Dei iĕm, 'noh boih Kră Yang 'Bok Kei-Dei, wă khan Kră Yang 'Bok Kei-Dei tơpăt, wei tơdrong pơgơ̆p păng 'mêm truh tơ rơbâu jơhnơr kơ lu bơngai bu mă 'mêm kơ Sư păng wei răk dôm nơ̆r sư tơtă.

10 Păng pơm 'mong kơ lu bơngai bu mă areh kơ Sư, na pơlôch pơđĭ lê̆ lu sư. Sư ưh kơ pơhiơ̆ ôh pơm kơ bơngai bu mă areh kơ Sư, Sư gô pơm plơ̆ hloi hăm lu bơngai sơngah kơ Sư.

11 Thoi noh, iĕm athei kơchăng pơm kiơ̆ dôm nơ̆r tơtă, tơdrong juăt păng nơ̆r tơbăt, mă inh đei bơtho ăn kơ iĕm năr âu.

12 Tơdah iĕm mơ̆ng păng pơm kiơ̆ dôm lu tơdrong juăt âu, Kră Yang 'Bok Kei-Dei iĕm gô wei nơ̆r pơgơ̆p păng tơdrong 'mêm mơnat mă Sư đei pơkă hăm lu 'bok iĕm sơ̆.

13 Kră Yang sư 'mêm mơnat kơ iĕm, ăn tơdrong pŭn hiôk kơ iĕm ăn kơ lu kon sâu iĕm rai lơ hrôh ngôh; Sư gô ăn tơdrong pŭn hiôk kơ lu kon iĕm đơ̆ng blu pôih, ăn tơmam đơ̆ng teh, ăn phe 'ba, hơ'bo, plei hơmu păng đak rơmă plei 'long ôliwơ kơ iĕm, ăn rơmo, triu rai lơ lăm teh đak, mă sư đei pơkă pơkăm boih hăm 'bok iĕm, wă ăn kơ iĕm.

14 Lu iĕm gô đei pŭn hiôk hloh kơ lu adrĕch nai, lăm lu iĕm gô ưh kơ đei bơngai bu mă hơwŏng, drŏ-nglo dah drŏ-kăn, tơno dah akăn lăm sem dơrong iĕm.

15 Kră Yang huay ăn kơ iĕm tơdrong jĭ jăn păng tơdrong jĭ apoh đơ̆ng dêh Êyiptơ mă-lei Sư gô ăn tơdrong jĭ noh truh kơ lu bơngai mă areh kơ ih.

16 Iĕm athei pơrăm lê̆ đĭ lu adrĕch mă Kră Yang 'Bok Kei-Dei iĕm jao ăn kơ iĕm boih kư̆m 'nĕ kơ mơnat kơ lu sư păng kư̆m 'nĕ kơ kơkuh kơ lu yang sư; yua kơ tơdrong noh gô pơm hơđong hơ'năk kơ iĕm.

17 Lu iĕm 'nĕ kơ khan lăm jơhngơ̆m iĕm: Lu adrĕch 'nâu lơ pran hloh kơ bơ̆n, liơ bơ̆n gơh kĕ puh tơweh lê̆ lu sư?

18 'Nĕ kơ hli kơ lu sư, mă-lei iĕm athei 'blŏk dôm tơdrong kiơ, mă Kră Yang 'Bok Kei-Dei iĕm đei pơm boih kơ Pharaôn păng đĭ dêh Êyiptơ.

19 Dôm tơdrong pơlong lăng tih dêh măt lu iĕm 'bôh boih, dôm lu tơdrong mơsêh tih hlĭch chrơp, tơpang ti mơsêh, pran kơtang Kră Yang 'Bok Kei-Dei iĕm đei chông tơlĕch iĕm đơ̆ng dêh Êyiptơ boih. Kră Yang 'Bok Kei-Dei iĕm kư̆m gô pơm kơ đĭ-đăng lu adrĕch mă iĕm hli noh.

20 Na Kră Yang 'Bok Kei-Dei iĕm gô wơh ong năm druh sôch lu sư, dĭng mă lu bơngai kơdâu ôn, kư̆m pơlôch pơrăm đĭ lu sư.

21 'Nĕ hli tơrơ kơ lu sư; yua kơ Kră Yang 'Bok Kei-Dei iĕm oei hơdai iĕm, noh jơ̆ Kră Yang 'Bok Kei-Dei mă pran kơtang hloh păng trŏ kơ hli.

22 Kră Yang 'Bok Kei-Dei iĕm gô puh lê̆ adrĕch 'nâu 'bơ̆t anăp iĕm 'net 'net; iĕm ưh kơ gơh pơlôch lu sư minh 'măng tăm ôh, kơnh hli kơ sem bri rai lơ na pơrăm iĕm dơ̆ng;

23 Mă-lei Kră Yang 'Bok Kei-Dei iĕm gô jao lu sư kơ iĕm păng gô pơm kơ lu sư đei tơdrong hli rŭng răng tih, dĭng truh layơ mă lu sư lôch hiong đĭ.

24 Sư gô pơjao lu pơtao lăm tơpang ti iĕm, na iĕm gô sŭt đĭ anăn lu sư đơ̆ng ala teh âu; ưh kơ đei bơngai bu kĕ dơ̆ng 'bơ̆t anăp iĕm, dĭng truh tơ iĕm pơlôch đĭ lu sư.

25 Iĕm athei soh pơđĭ lu rup yang lu sư. 'Nĕ kơ hưch ham, 'nĕ kơ iŏk kơdih hu dah maih đơ̆ng lăm lu sư man rup noh, kơnh hli kơ iĕm 'leh hơđong; yua kơ tơmam 'noh yua kơ tơmam noh Kră Yang 'Bok Kei-Dei areh dêh.

26 'Nĕ kơ chĕp ba tơmơ̆t lăm hnam iĕm tơmam mă trŏ areh dêh noh, kơnh hli kơ iĕm wang dai lôch răm. Iĕm athei lăng areh krưp, yua kơ tơmam noh trŏ kơ wă pơrăm.

©Bahnar Bible Association. All rights reserved.

Lean sinn:



Sanasan