Both 34 - Sơ̆p Hlabơar Nơ̆r 'Bok Kei-Dei

Môis lôch

¹ Đơ̆ng tơmăn glă char Môap, Môis tŏk tơ kông Nêbô, tơ kơ̆l kông Pisga, tơklă anăp pơlei Jêrikô; đơ̆ng noh Kră Yang ăn kơ sư lăng 'bôh jơ̆p kơ dêh char, đơ̆ng Gileat truh tơ char Đan;

² jơ̆p kơ char Naptali păng dêh Êphraim păng Manase, đĭ kơ dêh Juđa truh tơ đak dơsĭ gah bơmơ̆t, a

³ tơring gah gơal, jơ̆p tơmăn glă, thŭng dơnă Jêrikô; noh pơlei tih 'long gol, truh tơ Soar.

⁴ Kră Yang khan kơ Môis: 'Nâu bơih dêh char mă Inh pơkă wă ăn kơ Abraham, Isăk păng Jakôp. Inh gô ăn dêh âu kơ lu adrĕch adrung ih. Inh tơ'bôh ăn kơ ih lăng dêh noh, mă-lei ih ưh kơ gơh mơ̆t tơ noh ôh.

⁵ Môis, đĭch đam Kră Yang, lôch tơ lăm dêh char Môap, trŏ thoi Kră Yang khan.

⁶ Kră Yang 'bŭ sư lăm thŭng glă tơ dêh Môap, tơklă Bêt Pêôr; truh tơ dang ei ưh kơ đei bơngai bu mă băt kơ bơsat 'bŭ sư tơ yơ.

⁷ Môis lôch, kơplah sư đei minh-hrĕng 'bar-jĭt sơnăm; măt sư oei hơdah 'lơ̆ng, jơhngơ̆m sư oei pran.

⁸ Kon pơlei pơla bơngai Isơrael nhơ̆m hmoi pơdong Môis lăm pêng-jĭt năr tơ anih tơmăn glă char Môap; dôm lu năr nhơ̆m hmoi păng năr pơdong Môis hlôi keh đang bơih.

⁹ Jôsuê kon drŏ-nglo Nun, đei 'bĕnh blai kơ tơdrong gơh hơgei, yua kơ Môis đei dan tơpang ti tơ akâu Jôsuê boih; na kon pơlei bơngai Isơrael chu nơ̆r sư păng pơm kiơ̆ dôm tơdrong Kră Yang bơtho pơkă kơ Môis.

¹⁰ Đơ̆ng năr noh, lăm lu bơngai Isơrael ưh kơ đei bơngai bu khan lê̆ adrol nhen thoi Môis, mă Kră Yang băt juăt kơ tơ'bơ̆p pơma dơnuh,

¹¹ 'Nguaih kơ Môis ưh kơ đei bơngai khan lê̆ adrol mă Kră Yang wơh pơm lu tơdrong hlĭch, mơsêh chrơp thoi noh, 'bơ̆t anăp pơtao Pharaôn păng yŏng pơgơ̆r păng đĭ-đăng kon pơlei lăm dêh char Êyiptơ.

¹² Ưh kơ đei bu gơh tơ'bôh tơdrong pran kơtang păng jang tơdrong tih krưp tơpă trŏ kơ hli tơrơ thoi tơdrong jang Môis đei pơm 'bơ̆t anăp đĭ-đăng kon pơlei Isơrael.