Both 33 - Sơ̆p Hlabơar Nơ̆r 'Bok Kei-Dei

Nơ̆r Môis sơkat pŭn hiôk kơ adrĕch adrung Isơrael

¹ 'Nâu nơ̆r Môis, bơngai Kră Yang 'Bok Kei-Dei, sơkat ăn pŭn hiôk kơ kon pơlei Isơrael adrol kơ sư wă lôch.

² Sư khan: Kră Yang truh đơ̆ng kông Sinai. Pơchrang hơdah kơpal lu bơ̆n đơ̆ng Seirơ, păng rang mơnhal đơ̆ng Kông Paran; Sư truh hăm lơ rơbâu hơngan linh jang, Rang hơdah kơmlat lĕch đơ̆ng ti 'ma Sư.

³ Sư 'mêm kơ kon pơlei pơla Sư tơpă; đĭ-đăng lu linh jang oei lăm tơpang ti Sư; Sơtơ̆p kŭl-tăng kơkuh 'bơ̆t jơ̆ng Sư. Sơng iŏk nơ̆r bơtho khan đơ̆ng Sư.

⁴ Tơdrong juăt mă Môis bơtho ăn kơ lu bơ̆n noh boih mŭk tơmam kơ adrĕch Jakôp.

⁵ Kơplah lu kră kon pơlei akŭm băl hơdai hăm lu khŭl adrĕch bơngai Isơrael. Na Kră Yang Sư boih pơtao kơ Jêsurun.

⁶ Apơi kơ Rubên oei arih ưh kơ lôch, ưh kơ tôch adrĕch. Mă khan Rubên bơngai kơtuei.a

⁷ Môis sơkat kơ Juđa thoi âu: Ơ Kră Yang, apinh Ih mơ̆ng bĕ nơ̆r lu bơngai Juđa krao apinh, ăn kơ sư brŏk tơ kon pơlei lu sư. Ăn kơ tơpang ti lu sư bơwei dŏng kon pơlei lu sư kơdih, Ơ Kră Yang apinh Ih tơgŭm sư blah lu bơngai ayăt kơ lu sư.

⁸ Môis sơkat kơ Lêwi thoi âu: Thumim păng Urimb Ih ăn boih kơ bơngai băt hli yom wei răk. Bơngai mă Ih pơlong lăng boih tơ Masa, bơngai mă Ih đei pơjah pơjăng boih tơ đak Mêriba;

⁹ Lêwi pơma khan: Inh ưh kơ lah 'bôh mĕ 'bă inh; Inh ưh kơnăl kơ 'nhŏng oh inh păng inh ưh kơ băt kon hơ'lơ̆p inh Yua kơ sư chu kiơ̆ nơ̆r Kră Yang. Kral kơchăng wei răk tơdrong pơgơ̆p Kră Yang.

¹⁰ Sư bơtho nơ̆r tơtă Kră Yang ăn kơ adrĕch Jakôp. Păng khôi juăt Kră Yang ăn kơ bơngai Isơrael Sư soh pơyơ̆r 'long 'bâu phu 'bơ̆t anăp Kră Yang. Pơyơ̆r tơmam soi 'buh tơ kơpal chơnang soi.

¹¹ Ơ Kră Yang! Apinh Ih ăn kơ lu sư đei jơhngơ̆m pran 'nao. Ăn pŭn kơ tơdrong jang đơ̆ng tơpang ti lu sư pơm. Apinh Ih teh tơgơ̆ lê̆ rơhiĕo lu bơngai ayăt, păng pơrăm lu bơngai areh kơ lu sư, wă kơ lu sư huay pă iung blah dơ̆ng!

¹² Môis sơkat kơ Bênjamin; ăn kơ bơngai mă Kră Yang 'mêm kơeng gơh oei hiôk-hian lăm Sư. Prăt năr đei Kră Yang wei-lăng sư, tơpă bơngai mă Kră Yang 'mêm oei tŏk-bŏk 'bar pah hơngiĕng Sư.

¹³ Môis sơkat kơ Jôsep thoi âu: Apinh Kră Yang ăn pŭn hiôk kơ dêh char ih. Đơ̆ng plĕnh Kră Yang tơjruh ăn kơ ih đak ngom. Păng ăn đak lĕch đơ̆ng lăm teh,

¹⁴ Lu tơmam gĭt yua hloh đei đơ̆ng măt 'năr, plei 'long hơ'bo 'lơ̆ng hloh đơ̆ng măt khei;

¹⁵ Lu tơmam 'lơ̆ng hloh đơ̆ng kơpal kông so sơ̆, Lu tơmam gĭt đơ̆ng teh kông groi oei ling-lang.

¹⁶ Apinh Kră Yang Tơ'ngla pơdah akâu lăm bơmreh jơ'bôt 'long ăn kơ teh pŭn hiôk đei 'ba hơ'bo rơkah rơkai. Ăn pŭn hiôk 'bĕnh blai kơpal kơ̆l Jôsep, kơpal klĕng, bơngai pơm yŏng lăm lu 'nhŏng oh sư.

¹⁷ Rơmo tơno kơdră sư 'lơ̆ng rŏ pran kơtang. Ake sư noh ake rơmo tơno bri. Ake noh boih sư tơ̆m kon pơlei pơla. Dĭng truh tơ kon pơlei oei tôch teh đak, noh boih rơbâu hơngan 'nu bơngai Êphraim, kư̆m thoi dôm rơbâu 'nu bơngai Manase.

¹⁸ Môis sơkat kơ Sabulôn păng Isakar: Ơ Sabulôn, hiôk chơt bĕ, kơplah duk ih lĕch năm chă mơdro sa lăm đak dơsĭ. Gah ih ơ Isakar, kư̆m athei hiôk chơt bĕ lăm ih chă jang sa.

¹⁹ Lu sư gô krao pơtơm lu kon pơlei tŏk tơ kông. Tơ noh, lu sư pơyơ̆r tơmam soi kiơ̆ kơ tơdrong juăt mă Kră Yang bơtho. Yua kơ lu sư đei iŏk yua tơmam rơkah rơkai đơ̆ng đak dơsĭ păng tơmam gĭt đơ̆ng lăm ala chuơh.

²⁰ Môis sơkat kơ Gat, hơri ư-ang kơ Tơ'ngla pơih ăn kơ Gat hơdral rai să. Sư arih thoi dăm-brang akăn, châu sa kon sem hek ti hăm kơ̆l.

²¹ Sư rơih kơ sư anih teh 'lơ̆ng hloh lăm dêh noh, teh noh să 'măn kơ lu bơngai pơgơ̆r. Kơplah lu bơngai kră chĕp kơ̆l kon pơlei akŭm, sư pơm keh tơdrong 'lơ̆ng tơpăt Kră Yang, păng pơm kiơ̆ dôm nơ̆r Kră Yang tơtă kơ bơngai Isơrael.

²² Môis sơkat kơ Đan: Đan thoi dăm-brang dăm mơlôh, plŏng dơhrông đơ̆ng char Basan năm blah ayăt sư.

²³ Môis sơkat kơ Naptali: Ơ Naptali pŭn hiôk đơ̆ng Kră Yang, 'bĕnh blai tơdrong pŭn hiôk đơ̆ng Kră Yang, ih iŏk bĕ teh gah bơmơ̆t truh gah gơal dơnâu Galilê.

²⁴ Môis sơkat kơ Aser: Apơi kơ Aser đei pŭn hiôk hloh kơ lu adrĕch adrung nai. Ăn kơ sư jing bơngai lu 'nhŏng oh sư lăp đon, Gơh tong jơ̆ng sư lăm đak rơmă ôliwơ!

²⁵ Lu 'long chơkăl tang 'măng jang pơm hăm bơsei mam păng kong, chăl arih ih sot dang yơ, jơhngơ̆m ih oei pran dang noh.

²⁶ Ưh kơ đei bu thoi Kră Yang 'Bok Kei-Dei Jêsurun, Tơ'ngla, păr tơ lu tăl plĕnh, năm dŏng tơgŭm ih. Tơ lăm lu hơmơ̆l, Sư 'lơ̆ng rŏ hloh.

²⁷ Kră Yang 'Bok Kei-Dei arih ling-lang noh anih ih kơ'nơp, gah ala kơ ih đei tơpang ti Kră Yang drơng tơgŭm, Sư puh lê̆ lu bơngai ayăt 'bơ̆t anăp ih, Na sư khan: Pơrăm pơlôch lu sư bĕ.

²⁸ Thoi noh bơngai Isơrael gô arih hiôk hơđơ̆ng: Kon sâu Jakôp oei tơ noh lăm dêh teh phe 'ba, hơ'bo păng tơm hơmu lơ. Đak ngom đơ̆ng plĕnh ruh hngôm.

²⁹ Ơ bơngai Isơrael ih pŭn hiôk dêh, kon pơlei Kră Yang dŏng pơklaih bơih, Kră Yang. Sư thoi khêl pĕng tơgŭm ih, thoi đao gưm pơm ăn kơ ih kĕ jei jơnei tih. Lu bơngai ayăt gô năm chă pơm lung, na ih gô pơjuă bơhlơ̆r anih kơjung lu sư.