Both 31 - Sơ̆p Hlabơar Nơ̆r 'Bok Kei-Dei

Jôsuê pơtrơp đơ̆ng Môis

¹ Đơ̆ng noh Môis lĕch pơma nơ̆r 'nâu hăm đĭ-đăng lu bơngai Isơrael dôm lu nơ̆r tơ ala âu,

² Dang ei inh đei minh-hrĕng 'bar-jĭt sơnăm boih; inh ưh pă gơh lĕch păng ưh pă gơh mơ̆t dơ̆ng; Kră Yang đei khan hăm inh boih: Ih ưh pă gơh yak tŏk năm hlôi kơ đak Krong Jôrđăn, 'nâu dơ̆ng.

³ Kră Yang 'Bok Kei-Dei iĕm gô năm tŏk kơ đak krong adrol kơ iĕm Sư gô pơlôch đĭ lu kon pơlei âu 'bơ̆t anăp iĕm, lei na iĕm gô iŏk asong băl dêh lu sư; Jôsuê gô năm adrol jing yŏng iĕm, thoi Kră Yang khan boih.

⁴ Kră Yang gô pơm kơ lu kon pơlei noh thoi Sư đei pơm boih kơ Sihôn păng Ôk pơtao bơngai Amôrit kơplah Sư pơlôch pơrăm 'bar 'nu păng dêh char lu sư boih.

⁵ Kră Yang gô pơjao kon pơlei noh ăn kơ lu iĕm păng lu iĕm athei pơm kơ lu sư gô mơ̆ng kiơ̆ kơ nơ̆r inh athei lu iĕm pơm.

⁶ Athei nuih pran kơtang bĕ. 'Nĕ kơ hli tơrơ krưp dêh 'bơ̆t anăp lu kon pơlei noh yua kơ Kră Yang 'Bok Kei-Dei iĕm kư̆m gô năm hơdai hăm iĕm; Sư ưh kơ đei layơ achăng lê̆ iĕm kư̆m ưh kơ weh ataih đơ̆ng iĕm.

⁷ Đơ̆ng noh Môis krao Jôsuê khan kơ sư 'bơ̆t anăp đĭ-đăng bơngai Isơrael: Ih athei chơ̆n jơhngơ̆m; păng nuih kơtang bĕ, yua kơ ih gô năm mơ̆t hơdai hăm lu kon pơlei 'nâu lăm dêh char mă Kră Yang hlôi pơkă boih wă ăn kơ 'bok lu sư păng ih gô klah asong ăn kơ lu sư dêh noh.

⁸ Kră Yang boih gô năm adrol kơ ih, Sư gô oei hơdai hăm ih păng Sư ưh kơ achăng lê̆ ih, kư̆m ưh kơ weh ataih đơ̆ng ih. Ih 'nĕ kơ hli păng 'nĕ kơ rơdu jơhngơ̆m.

Đŏk khôi juăt

⁹ Môis chih khôi juăt 'nâu, pơjao ăn kơ lu 'bok soi, kon drŏ-nglo bơngai Lêwi lu bơngai tung Hom Tơdrong Pơgơ̆p Kră Yang păng pơjao ăn kơ đĭ-đăng lu kră bơngai Isơrael.

¹⁰ Păng pơkă kơ lu sư: Tôch rim kơ tơpơh sơnăm, lăm sơnăm ăn rơngei đơ̆ng hre, lăm năr pơm Giĕng Bơsŭn.

¹¹ Kơplah đĭ-đăng bơngai Isơrael năm kơkuh kơ Kră Yang 'Bok Kei-Dei iĕm, tơ anih mă Sư gô rơih, na lu iĕm athei đŏk ăn mă re kơ lu sư mơ̆ng khôi juăt 'nâu.

¹² Iĕm athei krao akŭm bĕ đĭ lu kon pơlei, drŏ-nglo drŏ-kăn, lu hơ'lơ̆p păng lu bơngai tơmoi mă oei lăm pơlei iĕm, wă kơ lu sư dai mơ̆ng, pơhrăm băt hli yom kơ Kră Yang 'Bok Kei-Dei iĕm păng kơchăng pơm kiơ̆ dôm lu nơ̆r đơ̆ng lăm khôi juăt 'nâu.

¹³ Lu kon hơ'lơ̆p iĕm, lu bơngai mă tam mă băt khôi juăt 'nâu, athei mơ̆ng păng athei pơhrăm iŏk băt hli yom kơ Kră Yang 'Bok Kei-Dei lu iĕm, đĭ lăm chăl arih lu iĕm mă oei tơ dêh lu iĕm wă mơ̆t iŏk noh, đơ̆ng rŏng kơ iĕm tŏk hlôi kơ đak Krong Jôrđăn.

Kră Yang khan lê̆ kơ Môis

¹⁴ Kră Yang khan kơ Môis: Năr ih lôch wă jê̆ boih; ih krao Jôsuê na măr iĕm năm 'bơ̆t anăp Inh tơ Bơsŭn Anih Akŭm. Tơ noh Inh wă pơjao ăn kơ Jôsuê jang. Thoi noh, Môis păng Jôsuê năm truh tơ Bơsŭn Anih Akŭm.

¹⁵ Kră Yang tơ'bôh akâu Sư, lăm jrăng hơmơ̆l păng hơmơ̆l dơ̆ng 'bơ̆t 'măng Bơsŭn Anih Akŭm.

¹⁶ Kră Yang khan kơ Môis: Ih gô pơdơh hăm lu 'bok ih; kon pơlei 'nâu gô kơkuh kơ yang nai lăm dêh lu sư wă năm mơ̆t lu sư gô achăng lê̆ Inh păng pơm glăi kơ tơdrong pơgơ̆p mă Inh đei pơgơ̆p boih hăm lu sư.

¹⁷ Năr ei kơnh Inh gô hil blĕk; Inh gô achăng lê̆ lu sư, ôn muh măt Inh đơ̆ng lu sư păng lu sư gô jing tơmam sa kơ lu kon pơlei nai. Lu sư gô đei tơdrong răm-'băm pơmat-tat. Lăm năr noh lu sư gô jet: Hăm trŏ bơ̆n đei tơdrong răm pơmat-tat yua kơ Kră Yang 'Bok Kei-Dei bơ̆n ưh kơ oei hơdai bơ̆n dơ̆ng?

¹⁸ Mă-lei lăm năr noh, Inh gô ôn muh măt Inh, yua kơ đơ̆ng đĭ-đăng lu tơdrong yoch kơnê̆ lu sư pơm năm kiơ̆ lu yang nai.

¹⁹ Thoi noh dang ei, chih bĕ nơ̆r hơri 'nâu păng bơtho ăn kơ kon pơlei bơngai Isơrael hơri, lu sư athei thuơk lăm đon kơ nơ̆r hơri 'nâu wă roi tơbăt ăn Inh kơ nơ̆r Inh chrih ayăt hăm lu sư.

²⁰ Đơ̆ng rŏng Inh chông ba lu sư mơ̆t lăm dêh char Inh hlôi pơkă boih hăm 'bok lu sư; dêh 'bĕnh kơ đak toh đak sut; lu sư gô sa phĭ păng bek, wơ̆t bơ̆jang kơkuh lu yang nai, lu sư gô pơdê lê̆ Inh păng pơm glăi kơ tơdrong pơgơ̆p Inh.

²¹ Lăp lu sư đei tơdrong pơmat-tat anat anot tơdrong kơnê̆ truh kơ lu sư, tơdrong hơri 'nâu gô roi tơbăt tơ'blŏk kơ lu sư, yua kơ tơdrong hơri 'nâu ưh kơ hiơt ôh, gô oei ling-lang lăm 'bơ̆r lu kon sâu lu sư. Inh băt lăm kơ̆l đon lu sư tơchĕng wă pơm hơmet boih, adrol kơ Inh wă chông ba lu sư mơ̆t lăm dêh char mă Inh đei pơkă wă ăn.

²² Lăm năr noh, Môis chih nơ̆r hơri 'nâu păng bơtho pơhrăm ăn kơ lu kon pơlei bơngai Isơrael;

²³ Kră Yang pơjao ăn tơdrong jang kơ Jôsuê kon drŏ-nglo Nun, khan: Ih athei chơ̆n jơhngơ̆m nuih kơtang, yua kơ ih gô ba kon pơlei Isơrael mơ̆t lăm dêh char mă Inh pơkă boih wă ăn kơ lu sư; Inh gô oei hơdai ih.

²⁴ Lăp Môis chih dôm lu nơ̆r khôi juăt 'nâu đơ̆ng tơm truh tơ tôch tơ lăm minh sơ̆p hla bơar keh đang boih.

²⁵ Na Môis athei lu bơngai Lêwi tung Hom Tơdrong Pơgơ̆p Kră Yang;

²⁶ iŏk bĕ sơ̆p hla bơar khôi juăt 'nâu, lê̆ 'bơ̆t cheng Hom Tơdrong Pơgơ̆p Kră Yang 'Bok Kei-Dei lu iĕm, lê̆ Sơ̆p hla bơar tơ noh 'bơ̆t cheng Hom Tơdrong Pơgơ̆p pơm nơ̆r tơbăt pơsĭt ayăt hăm lu iĕm:

²⁷ Yua kơ Inh băt kơ jơhngơ̆m iĕm arăng dêh kơplah inh oei arih oei hơdai hăm lu iĕm hlôi blah plơ̆ boih hăm Kră Yang thoi noh, pơma kiơ đơ̆ng rŏng kơ inh lôch kơnh, lu iĕm wă blah plơ̆ dang yơ dơ̆ng!

²⁸ Krao pơpôi akŭm bĕ lu kră đơ̆ng rim khŭl adrĕch adrung lu iĕm păng lu kră pơgơ̆r lu iĕm, đơ̆ng rim kơ adrĕch bơngai; wă kơ inh roi kơ lu sư kơtơ̆ng mơ̆ng lăm đon lu sư dôm lu nơ̆r 'nâu păng Inh wă apinh plĕnh păng teh pơm kơdranh chrih blah plơ̆ hăm lu sư.

²⁹ Inh băt gô răm-'băm tơpă, achăng lê̆ trong mă đơ̆ng inh bơtho khan, ning-mônh lu iĕm gô tơblĕk Kră Yang pơm tơdrong kơnê̆ 'mê̆, mă Kră Yang, ưh kơ lăp đon păng tơdrong răm pơmat-tat gô truh kơ lu iĕm.

Nơ̆r Môis hơri

³⁰ Đơ̆ng noh Môis đŏk dôm lu nơ̆r hơri 'nâu đơ̆ng tơm truh tơ tôch ăn kơ đĭ-đăng đon bơngai Isơrael mơ̆ng: