Both 27 - Sơ̆p Hlabơar Nơ̆r 'Bok Kei-Dei

Chơnang soi tơ kông Ebal

¹ Môis păng lu đe kră bơngai pơgơ̆r bơtho khan Isơrael pơkă nơ̆r 'nâu ăn kơ kon pơlei: Wei răk bĕ dôm nơ̆r inh tơtă ăn kơ iĕm năr 'nâu.

² Lăm năr iĕm tŏk hlôi kơ đak Krong Jôrđăn wă mơ̆t tơ dêh mă Kră Yang 'Bok Kei-Dei iĕm ăn kơ lu iĕm, na iĕm athei pơdơ̆ng lu tơmo tih păng bah chŭr tơ tơmo noh.

³ Na chih dôm nơ̆r khôi juăt 'nâu, mưh iĕm năm hlôi boih kơ đak Krong Jôrđăn mơ̆t tơ dêh mă Kră Yang 'Bok Kei-Dei iĕm ăn, mă dêh 'bĕnh kơ đak toh păng đak sut, thoi Kră Yang 'Bok Kei-Dei 'bok iĕm pơkă boih hăm iĕm.

⁴ Dah lu iĕm tŏk hlôi boih kơ đak Krong Jôrđăn, athei iĕm pơdơ̆ng tơmo 'nâu tơ kơpal kông Êbal păng bah chŭr, thoi nơ̆r inh bơtho khan ăn kơ lu iĕm năr 'nâu.

⁵ Tơ anih noh, iĕm kư̆m athei pơm minh pôm chơnang soi ăn kơ Kră Yang 'Bok Kei-Dei iĕm, chơnang soi păng tơmo; 'nĕ kơ yua tơmam bơsei wă blah tơmo.

⁶ Iĕm athei pơm chơnang soi kơ Kră Yang 'Bok Kei-Dei păng tơmo oei 'lơ̆ng ưh kơ tơphĕ, na pơyơ̆r lu tơmam soi 'buh tơ kơpal noh ăn kơ Kră Yang 'Bok Kei-Dei iĕm.

⁷ Kŭm athei pơyơ̆r tơmam soi bơnê, sa kơtă hloi tơ anih noh hiôk chơt 'bơ̆t anăp Kră Yang 'Bok Kei-Dei iĕm.

⁸ Iĕm athei chih tơ tơmo đĭ dôm lu nơ̆r khôi juăt 'nâu, chih mă rơđah tơpă.

Tơdrong hiap pơtê̆ kơpal kông Ebal

⁹ Môis păng lu 'bok soi adrĕch bơngai Lêwi khan kơ lu kon pơlei Isơrael: Ơ lu bơngai Isơrael, athei ngăn păng mơ̆ng bĕ! Năr 'nâu, lu iĕm jing kon pơlei Kră Yang 'Bok Kei-Dei iĕm boih.

¹⁰ Thoi noh iĕm athei mơ̆ng bĕ nơ̆r Kră Yang 'Bok Kei-Dei iĕm păng wei răk pơm kiơ̆ dôm lu nơ̆r Sư tơtă păng dôm khôi juăt Sư, mă inh bơtho khan ăn kơ iĕm năr 'nâu.

¹¹ Năr noh. Môis bơtho khan kơ kon pơlei;

¹² Mưh lu iĕm tŏk hlôi kơ đak Krong Jôrđăn boih, lei đe Simêôn, Lêwi, Juđa, Isakar, Jôsep păng Bênjamin athei dơ̆ng kơpal kông Gêrasim, wă sơkat ăn pŭn hiôk kơ kon pơlei.

¹³ Mă đe Rubên, Gat, Aser, Sabulôn, Đan, Neptali athei dơ̆ng kơpal kông Êbal, wă hiap pơtê̆.

¹⁴ Bơngai Lêwi pơma 'bơ̆r re hăm đĭ-đăng lu bơngai Isơrael thoi âu:

¹⁵ Hiap pơtê̆ bĕ kơ bơngai bu pơm rup yang, man dah hling, tơmam mă Kră Yang areh krưp dêh, tơdrong jang đơ̆ng tơpang ti kon bơngai, pơdơ̆ng kơkuh sư noh tơ anih hlơp! Đĭ-đăng kon pơlei gô khan: A-men!

¹⁶ Hiap pơtê̆ bĕ kơ bơngai bu pơdê mĕ 'bă sư! Đĭ-đăng kon pơlei gô khan: A-men!

¹⁷ Hiap pơtê̆ bĕ kơ bơngai bu tŭn rĭ hơdral hăm bôl buăl sư! Đĭ-đăng kon pơlei gô khan: A-men!

¹⁸ Hiap pơtê̆ bĕ kơ bơngai bu pơm ăn kơ bơngai măt tol jrok trong! Đĭ-đăng kon pơlei gô khan: A-men!

¹⁹ Hiap pơtê̆ bĕ kơ bơngai bu sek ưh kơ tơpăt kơ lu bơngai tơmoi, lu bơngai mơti păng lu yă adro! Đĭ-đăng kon pơlei gô khan: A-men!

²⁰ Hiap pơtê̆ bĕ kơ bơngai bu 'bĭch hơdai hăm akăn kơnhŏng 'bă sư kơdih; bơngai 'noh pơm pơ'brơh kơ 'bă sư kơdih! Đĭ-đăng kon pơlei gô khan: A-men!

²¹ Hiap pơtê̆ bĕ kơ bơngai bu 'bĭch hăm minh pôm kon sem brem! Đĭ-đăng kon pơlei gô khan: A-men!

²² Hiap pơtê̆ bĕ kơ bơngai bu 'bĭch hơdai hăm mŏ dah oh sư kơdih, dah minh pôm 'bă, mĕ phara, dah minh pôm mĕ 'bă phara! Đĭ-đăng kon pơlei gô khan: A-men!

²³ Hiap pơtê̆ bĕ kơ bơngai bu 'bĭch hơdai hăm tơnei drŏ-kăn sư kơdih! Đĭ-đăng kon pơlei gô khan: A-men!

²⁴ Hiap pơtê̆ bĕ kơ bơngai bu teh pơlôch ôn kon pơlei sư! Đĭ-đăng kon pơlei gô khan: A-men!

²⁵ Hiap pơtê̆ bĕ kơ bơngai bu sa tơmam apah wă pơlôch bơngai ưh kơ đei tơdrong yoch! Đĭ-đăng kon pơlei gô khan: A-men!

²⁶ Hiap pơtê̆ bĕ kơ bơngai bu ưh kơ wei răk pơm kiơ̆ dôm lu nơ̆r lăm khôi juăt 'nâu! Đĭ-đăng kon pơlei gô khan: A-men!