Both 22 - Sơ̆p Hlabơar Nơ̆r 'Bok Kei-Dei

¹ Tơdah iĕm 'bôh rơmo dah triu lu 'nhŏng oh bơ̆n jrok, 'nĕ kơ lăng đĕch athei dui ba puh sư brŏk ăn kơ 'nhŏng oh iĕm.

² Tơdah tơ'ngla sư ưh kơ oei jê̆ iĕm păng dah iĕm ưh kơ băt kơ bơngai noh, na athei dui rơmo, triu noh tơmơ̆t tơ hnam iĕm, dĭng truh tơ lu 'nhŏng oh năm chă apinh, na pơdrâu tơwih ăn kơ tơ'ngla sư dơ̆ng.

³ Iĕm kư̆m athei pơm thoi noh dah 'bôh aseh iĕ, ao tai dah tơmam kiơ đe huŏng hiong, dah jrok wơ̆l mă iĕm đei 'bôh. 'Nĕ kơ sơngah, pơm khan ưh kơ 'bôh.

⁴ Tơdah iĕm 'bôh aseh iĕ dah rơmo lu 'nhŏng oh bơ̆n puh pơ̆k tơ rok trong, 'nĕ khan lăng đĕch; athei pơgring tơiung sư.

⁵ Bơngai drŏ-kăn ưh kơ gơh hrŭk hơbĕn ao bơngai drŏ-nglo păng bơngai drŏ-nglo kư̆m ưh kơ gơh hrŭk hơbĕn ao drŏ-kăn; yua, kơ Kră Yang 'Bok Kei-Dei iĕm lăng areh krưp dêh.

⁶ Tơdah iĕm 'bôh tơ rok trong dah tơ kơpal 'long dah tơ teh, đei tơpu sem, yŏng sư oei 'nơ̆m kon dah kơtăp, 'nĕ kơ rôp yŏng hăm kon sư.

⁷ Iĕm athei achăng lê̆ yŏng sư păr, na rôp iŏk kon sư, wă kơ iĕm gơh đei pŭn hiôk păng arih sot.

⁸ Mưh iĕm pơm hnam 'nao, athei pơm 'long pĕng găn tăp dăr kơ bơbŭng, kơnh hli kơ đei bơngai huŏng đơ̆ng bơbŭng hnam noh, bơ̆n huay pă pŭ kơting, đơ̆ng hnam 'nao noh.

⁹ 'Nĕ kơ pơtăm lăm pơgar hơmu iĕm 'long nai, iĕm athei pơyơ̆r đĭ dôm lu tơmam iĕm đei yua lăm pơgar, plei hơmu dah tơmam đơ̆ng 'long nai.

¹⁰ 'Nĕ kơ tah 'long ăt hơdai rơmo hăm aseh iĕ, mưh iĕm wă rơuơ.

¹¹ 'Nĕ kơ hrŭk hơbĕn ao đe tanh che hrâu sŏk triu păng lơ brai phara.

¹² Ih athei sĭt reng lem 'bơ̆t puăn pah mum ao tai iĕm hrŭk.

¹³ Tơdah minh 'nu bơngai drŏ-nglo iŏk akăn, 'bĭch hăm sư boih, đơ̆ng rŏng areh hrĕch achăng lê̆,

¹⁴ na chă roi sa kơnê̆ kơ adruh noh, khan. Inh oei boih kơ adruh noh, wă inh jê̆ sư, inh 'bôh băt kơ sư ưh pă 'lơ̆ng hơnĭl boih.

¹⁵ Kơplah noh mĕ 'bă bơngai adruh noh gô roi pơdah tơbăt gah adruh noh oei hơlai 'lơ̆ng, 'bơ̆t anăp lu kră 'bơ̆t 'măng jang pơlei.

¹⁶ 'Bă bơngai drŏ-kăn ei gô roi kơ lu kră pơlei: “Inh ăn kon adruh inh oei kơ bơngai 'nâu pơm akăn sư, mă-lei sư areh hrĕch achăng kon inh,

¹⁷ bơngai âu chă roi khan kơnê̆ kơ sư: ‘Inh ưh kơ 'bôh khan kon ih oei 'lơ̆ng hơnĭl.’ 'Nâu tơdrong wă kơ băt kơnăl kơ kon adruh inh oei 'lơ̆ng hơnĭl.” Na mĕ 'bă sư iŏk ao tai adruh ei lơ̆k bơyar 'bơ̆t anăp lu kră pơlei ei.

¹⁸ Lu kră pơlei noh gô rôp bơngai drŏ-nglo noh, teh bơtho pơjĭ sư.

¹⁹ Lu sư gô đô̆ bơngai drŏ-nglo noh minh kĭ hu.a Ăn kơ 'bă bơngai adruh noh, yua kơ bơngai drŏ-nglo noh pơ'brơh anăn adruh jing kơnê̆ kơ minh 'nu adruh hơlai bơngai Isơrael. Bơngai drŏ-kăn noh oei jing akăn sư; sư ưh pă gơh achăng boih kơplah sư oei arih.

²⁰ Mă-lei dah tơdrong drŏ-nglo khan noh trŏ tơpă, bơngai adruh noh ưh pă 'lơ̆ng hơnĭl bơih.

²¹ Lei lu kră pơlei athei chông ba drŏ-kăn noh truh 'bơ̆t 'măng hnam 'bă sư, kon pơlei gô klơ̆m pơlôch drŏ-kăn noh hăm tơmo, yua kơ bơngai drŏ-kăn noh đei pơm tơdrong yoch kơnê̆ lăm Isơrael. Pơm pơyô ngôi kư̆ kă adrol kơ chă klo, kơplah sư oei lăm hnam 'bă sư. Thoi noh. Lu iĕm gô pơm rơgoh hŭt lê̆ tơdrong yoch kơnê̆ đơ̆ng lăm lu iĕm.

²² Tơdah đe rôp minh 'nu bơngai drŏ-nglo 'bĭch hơdai hăm akăn bơngai nai, đĭ măr sư noh đe gô pơlôch; thoi noh lu iĕm gô pơm rơgoh hŭt lê̆ tơdrong yoch kơnê̆ đơ̆ng lăm Isơrael.

²³ Tơdah đei minh 'nu bơngai drŏ-nglo tơ'bơ̆p minh 'nu adruh hơlai hle hlôi hơkơ̆t boih na 'bĭch hơdai hăm sư.

²⁴ Lu iĕm athei chông ba đĭ 'bar 'nu bơngai noh lĕch năm 'bơ̆t 'măng jang pơlei, na iŏk tơmo klơ̆m pơlôch măr sư; bơngai drŏ-kăn glăi yua kơ ưh kơ đei ôr krao lăm pơlei dŏng sư, bơngai drŏ-nglo glăi yua kơ pơm yoch hăm akăn bơngai nai; iĕm gô pơm rơgoh hŭt lê̆ tơdrong yoch kơnê̆ đơ̆ng lăm lu kon pơlei iĕm.

²⁵ Mă-lei tơdah bơngai drŏ-nglo tơ'bơ̆p bơngai drŏ-kăn hơkơ̆t hăm đe boih, na tơrôp 'bĭch hơdai tơ lăm bri, na minh 'nu bơngai drŏ-nglo đĕch đe pơlôch.

²⁶ 'Nĕ kơ pơm kiơ kơ bơngai drŏ-kăn adruh noh; yua kơ sư ưh kơ đei pơm yoch kiơ trŏ kơ lôch. Tơdrong pơm 'nâu nhen thoi minh 'nu bơngai bruh pơlôch lu bơngai rông 'bôt sư,

²⁷ yua kơ bơngai drŏ-nglo tơ'bơ̆p bơngai drŏ-kăn hlôi hơkơ̆t hăm đe tơ bri mă drŏ-kăn ei ôr krao, kư̆m ưh kơ đei bơngai bu dŏng.

²⁸ Tơdah minh 'nu bơngai drŏ-nglo tơ'bơ̆p minh 'nu bơngai drŏ-kăn oei adruh hơlai tam mă hơkơ̆t hăm đe, na tơrôp adruh ei 'bĭch hơdai, na đe tơ'bơ̆p 'bôh hloi kơtă ei,

²⁹ bơngai drŏ-nglo noh athei ăn kơ 'bă bơngai drŏ-kăn noh tơdrâu-hrĕng gram hu, đơ̆ng noh na gô iŏk drŏ-kăn ei pơm akăn sư, yua kơ sư pơ'brơh kơ drŏ-kăn noh, sư oei arih sot dang yơ, kư̆m ưh kơ gơh tơbrŏk hrĕch achăng bơngai drŏ-kăn noh.

³⁰ Ưh kơ đei bơngai bu gơh iŏk oei đêl akăn kơnhŏng 'bă sư pơm pơ'brơh kơ 'bă sư.