Both 14 - Sơ̆p Hlabơar Nơ̆r 'Bok Kei-Dei

Kon sem rơgoh păng ưh kơ rơgoh

¹ Lu iĕm jing kon Kră Yang 'Bok Kei-Dei lu iĕm, dah đei bơngai lôch 'nĕ kơ 'bet akâu kơdih, dah hơkôih sŏk klĕng;

² yua kơ iĕm jing minh adrĕch 'lơ̆ng rơgoh ăn kơ Kră Yang 'Bok Kei-Dei iĕm; Kră Yang rơih iŏk boih iĕm đơ̆ng lăm lu adrĕch kon pơlei kơpal teh âu. Wă jing tơmam Sư kơdih lĕch đơ̆ng đĭ-đăng, adrĕch kon pơlei pơla oei ala teh âu.

³ 'Nĕ kơ sa minh anăn tơmam kiơ mă Inh areh lăng krưp kơnê̆.

⁴ 'Nâu lu sem brem mă lu iĕm gơh sa: Rơmo, triu, bơbe,

⁵ juei, jĭl bram, bơbe bri, kơtŏng, keh, rơmo bri, triu bri

⁶ Lăm lu sem brem, mă lu iĕm gơh sa noh lu kon sem brem ayơ đei kơchôp blah 'bar păng gơh mơkan.

⁷ Mă-lei lăm lu kon sem brem gơh mơkan đei kơchôp blah 'bar, 'nâu mă lu kon sem brem lu iĕm ưh kơ gơh sa: Thoi lăk-đa, tơpai bri păng kơne kơdŭt rong lăm hnam, lu sư gơh mơkan; mă-lei ưh kơ đei kơchôp blah 'bar, jô̆ lu 'noh kon sem ưh kơ rơgoh.

⁸ Păng nhŭng kư̆m ưh kơ 'lơ̆ng rơgoh; yua kơ sư đei kơchôp blah 'bar, mă-lei ưh kơ gơh mơkan: Jô̆ tơmam noh ưh kơ rơgoh ăn kơ lu iĕm, 'nĕ kơ sa 'nhĕm kon sem brem noh păng kư̆m 'nĕ kơ hơtŭt 'bơm akâu dah lu sư lôch.

⁹ Đĭ-đăng lu ka oei arih lăm đak mă lu iĕm gơh sa, ka đei pơnăr păng kơchap.

¹⁰ Lu ka mă ưh kơ đei pơnăr păng ưh kơ đei kơchap lu iĕm ưh kơ gơh sa ôh; sư kơnê̆ ưh kơ gơh rơgoh.

¹¹ Lu iĕm gơh sa dôm lu sem păr rơgoh 'lơ̆ng,

¹² mă-lei, 'nâu sem păr mă lu iĕm ưh kơ gơh sa: Klang, grơ̆, klang kok,

¹³ klang gơsum, klang kơtơp kiơ̆ kơ adrĕch sư;

¹⁴ dôm lu sem ak

¹⁵ sem tre-yang, sem bơrơ̆m, sem tre-wĕt, klang kơsum kiơ̆ kơ adrĕch sư,

¹⁶ bơrơ̆m iĕ, bơrơ̆m tih, bơrơ̆m kok,

¹⁷ bơrơ̆m char glă, sem bŏng ko, klang kial,

¹⁸ klang kok, tre-yang păng hơmiĕt, hơda kiơ̆ kơ khŭl sư.

¹⁹ Kon sem kơep lep-ler đei pơnăr păr jing kơnê̆ kơ lu iĕm.

²⁰ Lu iĕm gơh sa lu kon sem kơep lep-ler đei pơnăr 'lơ̆ng rơgoh.

²¹ Lu iĕm 'nĕ kơ sa minh pôm kon sem brem lôch kơmăp, gơh ăn kơ lu bơngai tơmoi mă oei lăm pơlei ih, ăn kơ sư sa, kư̆m gơh tĕch ăn kơ bơngai tơmoi. Yua kơ ih jơ̆ adrĕch rơgoh 'lơ̆ng ăn kơ Kră Yang 'Bok Kei-Dei lu iĕm. 'Nĕ kơ pai hơbĭ 'nhĕm bơbe kon hăm đak toh mĕ sư.

Iŏk tơmam pơyơ̆r minh lăm mơjĭt.

²² Lu iĕm 'nĕ kơ hiơt kơ pơyơ̆r minh lăm mơjĭt gah tơmam bơ̆n đêl rei bơih, mă đơ̆ng lăm mir chŭn bơ̆n đei lăm rim sơnăm.

²³ Lu iĕm gơh sa tơmam pơyơ̆r minh lăm mơjĭt noh lu phe 'ba, sik hơmu, đak rơmă, plei 'long ôliwơ păng lu kon gơgơ̆l rơmo kơdră dah triu 'bơ̆t anăp Kră Yang 'Bok Kei-Dei iĕm, lăm anih Sư gô rơih iŏk wă 'măn Anăn Sư wă kơ iĕm pơhrăm iŏk băt hli yom kơ Kră Yang 'Bok Kei-Dei iĕm ling-lang.

²⁴ Tơdah Kră Yang 'Bok Kei-Dei iĕm ăn pŭn kơ iĕm, tơdah anih mă Kră Yang rơih wă 'măn Anăn Sư ataih dêh, dĭng mah ưh kơ gơh wă năm ba tơmam pơyơ̆r minh lăm mơjĭt ei.

²⁵ Lu iĕm athei iŏk minh lăm mơjĭt noh tơplih iŏk jên hu, chĕp jên hu na năm tơ anih Kră Yang 'Bok Kei-Dei lu iĕm gô rơih.

²⁶ Lu iĕm iŏk jên hu noh răt dôm tơmam kiơ mă iĕm wă, rơmo dah triu, sik hơmu, dah tơdrô kơtang, tơmam sa kiơ mă iĕm 'maih wă sa; na iĕm păng hnam dơnŏ gô huch sa chơt hiôk 'bơ̆t anăp Kră Yang 'Bok Kei-Dei iĕm.

²⁷ 'Nĕ kơ hiơt achăng lê̆ lu bơngai Lêwi mă oei hơdai lăm pơlei iĕm, yua kơ lu sư ưh kơ đei teh jang sa lăm lu iĕm.

²⁸ Tôch truh sơnăm mă pêng, iĕm iŏk tơmam minh lăm mơjĭt tơmam iĕm đei lăm sơnăm noh păng tah mong lê̆ tơ anih mong lăm pơlei.

²⁹ Lu bơngai Lêwi, yua kơ lu ưh kơ đei mŭk tơmam teh jang sa tơ lăm lu iĕm ôh păng lu bơngai tơmoi, lu bơngai mơti păng lu bơngai yă adro mă oei hơdai lăm pơlei iĕm, kư̆m gô năm sa phĭ mah; thoi ei Kră Yang 'Bok Kei-Dei iĕm ăn pŭn kơ dôm tơdrong jang đơ̆ng tơpang ti iĕm kơdih pơm.