Both 1 - Sơ̆p Hlabơar Nơ̆r 'Bok Kei-Dei

Pêng 'bai Môis bơtho Kră Yang athei weh đơ̆ng Hôrêp

¹ Nâu nơ̆r Môis pơma khan kơ đĭ-đăng bơngai Isơrael, gah hơlĕch kơ đak Krong Jôrđăn, tơ lăm thŭng Araba jê̆ pơlei Supha sơlam pơlei Paran păng Tôphêl, La'ban. Haserôt păng Đisahap.

² Yak năm mơjĭt-mônh năr kơ trong đơ̆ng Hôrêp truh tơ Kades Barnêa, rok trong kông Seir.

³ Lăm sơnăm mă puăn-jĭt năr mă mônh khei mơjĭt-mônh, Môis pơma khan kơ kon pơlei Isơrael dôm tơdrong mă đơ̆ng Kră Yang. Kră Yang tơtă kơ sư athei pơma khan kơ lu đe noh.

⁴ Đơ̆ng rŏng kơ sư blah pơlôch Sihôn pơtao Amôrit oei tơ pơlei Hesbôn păng Ôk pơtao Basan oei tơ pơlei Astarôt păng pơlei Êdrei.

⁵ Tơ gah hơlĕch kơ đak Krong Jôrđăn, lăm dêh Môap, Môis pơtơm bơtho tơblang khôi juăt noh khan:

⁶ Kră Yang 'Bok Kei-Dei lu bơ̆n đei khan boih hăm lu bơ̆n tơ Hôrêp thoi âu: Lu iĕm oei tơ kông đunh dêh bơih.

⁷ Năm bĕ yak dăr dơ̆ng năm tơklă tơ kông groi kon pơlei Amôrit kư̆m năm truh tơ lu tơring jê̆ lu sư lăm thŭng glă Araba păng tơ kông groi bơmơ̆t teh dơnă tơ tơring gah gơal rok cheng đak dơsĭ, mơ̆t tơ dêh kon pơlei Kanaan păng char Liban, truh tơ đak krong tih noh krong Ơphrat.

⁸ Inh jao ăn kơ iĕm dêh âu; mơ̆t păng iŏk oei bĕ, dêh mă Kră Yang đei pơkă ăn kơ lu 'bok lu iĕm Abraham, Isăk, Jakôp, hăm lu kon sâu sư.

Pôk lu kră sek tơlang

⁹ Kơplah noh inh đei pơma hăm lu iĕm; minh 'nu inh ưh kơ kĕ wă pŭ pơđĭ lu iĕm.

¹⁰ Kră Yang 'Bok Kei-Dei lu iĕm ăn kơ iĕm bơngai rai lơ, năr 'nâu lu iĕm lơ thoi sơnglŏng kơpal plĕnh.

¹¹ Apinh Kră Yang 'Bok Kei-Dei 'bok lu iĕm pơm kơ lu iĕm chek lar rai lơ rơbâu hơtăl păng ăn pŭn hiôk, kiơ̆ kơ Sư đei khan pơkă boih kơ lu iĕm.

¹² Minh 'nu inh bơ̆jang pơm liơ gơh kĕ pŭ dôm tơdrong anat anot păng tơdrong lu kon pơlei pơjah pơjăng băl?

¹³ Rơih chă bĕ lăm adrĕch adrung lu iĕm lu bơngai hơgei đe ang juăt kơ sek tơlang inh gô pôk ăn lu sư pơm yŏng pơgơ̆r lu iĕm.

¹⁴ Lu kon pơlei tơl thoi âu: Tơdrong ih athei ăn noh 'lơ̆ng dêh. Lu nhôn gô pơm.

¹⁵ Thoi noh inh iŏk lu bơngai wă pơm yŏng đơ̆ng adrĕch adrung lu iĕm, lu bơngai hơgei đe ang păng đêl juăt kơ đei tơdrong truh pôk sư pơm yŏng lu iĕm, wei-lăng minh-rơbâu 'nu wei minh-hrĕng 'nu wei-lăng pơđăm-jĭt 'nu, dah wei-lăng mơjĭt 'nu bơngai păng wei-lăng lăm adrĕch adrung lu iĕm.

¹⁶ Kơplah ei kơnh, inh tơtă ăn kơ lu 'bok sek tơlang kơ lu iĕm; mơ̆ng bĕ tơduă 'nhŏng oh lu iĕm păng iŏk tơdrong tơpăt na sek tơlang tơdrong đei pơjah băl rim 'nu hăm lu 'nhŏng oh sư, dah hăm lu bơngai tơmoi nai mă oei hăm sư.

¹⁷ Lăm tơdrong jang sek tơlang, lu iĕm 'nĕ kơ mơ̆t minh pah; athei mơ̆ng mă bơngai iĕ dah bơngai pơm tih, 'nĕ hli kơ bơngai bu, yua kơ tơdrong sek tơlang âu kiơ̆ kơ Kră Yang 'Bok Kei-Dei, tơdah đei tơdrong kiơ anat kơ lu iĕm, athei chông ba tơ inh, inh gô mơ̆ng lăm tơdrong noh.

¹⁸ Thoi noh lăm kơplah noh inh gô pơkă kơ lu iĕm dôm tơdrong lu iĕm gô pơm.

Wơh bơngai năm chop lăng

¹⁹ Lu bơ̆n yak đơ̆ng Hôrêp năm rok hlôi kơ char glă să păng krưp dêh mă lu iĕm 'bôh boih. Rok tơklă kông groi kon pơlei Amôrit, kiơ̆ thoi Kră Yang 'Bok Kei-Dei bơ̆n đei pơkă kơ bơ̆n, đơ̆ng noh lu bơ̆n truh tơ Karđes Parnêa.

²⁰ Inh khan boih kơ lu iĕm: Lu iĕm truh boih tơ kông groi kon pơlei Amôrit, mă Kră Yang 'Bok Kei-Dei bơ̆n ăn kơ lu bơ̆n.

²¹ To, Kră Yang 'Bok Kei-Dei ih pơjao boih dêh âu kơ ih; năm tŏk bĕ, iŏk dêh noh, kiơ̆ thoi Kră Yang 'Bok Kei-Dei 'bok iĕm đei khan boih kơ lu iĕm; 'nĕ kơ rơdu 'nĕ kơ hli.

²² Đĭ-đăng lu iĕm năm tơ inh păng khan: Wơh bĕ lu bơngai năm adrol kơ lu nhôn, wă kơ lu sư năm chop lăng dêh noh păng wih roi ăn kơ lu nhôn, trong ayơ lu nhôn wă tŏk năm păng pơlei ayơ lu nhôn gô mơ̆t.

²³ Nơ̆r âu inh lăp đon, inh rơih mơjĭt-'bar 'nu drŏ-nglo đơ̆ng lăm lu iĕm, đơ̆ng rim adrĕch minh 'nu.

²⁴ Mơjĭt-'bar 'nu lu đe noh năm, tŏk tơ kông, năm truh tơ thŭng Êskôl chop lăng dêh noh.

²⁵ Lu sư phĕ chĕp ba plei 'long đơ̆ng dêh noh, ăn kơ lu bơ̆n; roi ăn kơ lu bơ̆n khan: Dêh mă Kră Yang 'Bok Kei-Dei bơ̆n ăn kơ lu bơ̆n 'lơ̆ng dêh.

²⁶ Mă-lei lu iĕm ưh kơ wă năm ôh păng sơngah kơ nơ̆r đơ̆ng Kră Yang 'Bok Kei-Dei lu iĕm tơtă.

²⁷ Lu iĕm pơma jŏk lăm bơsŭn lu iĕm khan: Yua kơ Kră Yang areh kơ lu bơ̆n, na chông tơlĕch bơ̆n đơ̆ng dêh Êyiptơ, wă jao lu bơ̆n lăm tơpang ti lu kon pơlei Amôrit, wă pơlôch pơrăm bơ̆n.

²⁸ Lu bơ̆n wă năm tơ yơ? 'Nhŏng oh lu bơ̆n pơm kơ lu bơ̆n hli na khan: Adrĕch noh tih păng kơjung hloh kơ lu bơ̆n; pơlei lu sư ei tih păng man dur kơjăp kơjung truh tơ plĕnh; tơ noh lu nhôn kư̆m 'bôh lu kon sâu kon pơlei Anakim tih kơjung.

²⁹ Na inh khan kơ lu iĕm: Lu iĕm 'nĕ kơ hli tơrơ kơ kiơ.

³⁰ Kră Yang 'Bok Kei-Dei lu iĕm năm adrol, sư gô tơblah dŏng lu iĕm, kư̆m thoi sư đei pơm boih 'bơ̆t anăp lu iĕm tơ dêh Êyiptơ.

³¹ Păng lăm char glă, jơ̆ anih lu iĕm 'bôh lăm trong lu iĕm yak năm, mă truh tơ anih 'nâu, Kră Yang 'Bok Kei-Dei pôk glơng iĕm thoi minh 'nu bơngai drŏ-nglo pôk glơng kon drŏ-nglo sư kơdih.

³² Mă-lei lu iĕm oei ưh kơ lui kơ Kră Yang 'Bok Kei-Dei lu iĕm 'mơ̆i.

³³ Jơ̆ Tơ'ngla năm adrol chông lu iĕm năm rok trong wă chơchă kơ lu iĕm minh anih oei; kơmăng yua ŭnh, kơ'năr yua hơmơ̆l, wă ba trong lu iĕm yak năm.

³⁴ Kơplah noh, Kră Yang kơtơ̆ng nơ̆r lu iĕm, na blĕk dêh păng pơkăm khan:

³⁵ Ưh kơ đei drŏ-nglo bu lăm adrĕch kơnê̆ âu gô 'bôh dêh 'lơ̆ng rŏ mă Inh đei pơkă wă ăn kơ lu 'bok iĕm.

³⁶ Lăp Kalep kon drŏ-nglo Jêphunê; sư gô 'bôh dêh noh păng Inh gô ăn kơ sư hăm kon sâu sư dêh noh, mă đêl jơ̆ng sư juă. Yua kơ sư kiơ̆ Kră Yang kơjăp 'lơ̆ng hăm đĭ jơhngơ̆m.

³⁷ Yua kơ đơ̆ng lu iĕm na Kră Yang kư̆m hil kơ inh, na khan: Ih kư̆m lei-lăi, ưh kơ gơh wă mơ̆t tơ dêh noh ôh.

³⁸ Jôsuê kon drŏ-nglo Nun, jơ̆ đĭch đam ih, sư gơh mơ̆t tơ dêh noh; pơm bĕ kơ jơhngơ̆m sư kơjăp, yua kơ đơ̆ng sư gô ăn kơ kon pơlei Isơrael gơh đei iŏk dêh noh.

³⁹ Lu kon hơ'lơ̆p lu iĕm păng lu iĕm khan thoi kơ minh pôm tơmam prăn đĕch păng lu kon drŏ-nglo iĕm dang ei tam mă băt ôh tơdrong 'lơ̆ng dah tơdrong kơnê̆, gô mơ̆t tơ dêh noh; Inh gô ăn kơ lu sư dêh âu bơ̆jang sa,

⁴⁰ Mă-lei bĕ lu iĕm, brŏk hơlơ̆k bĕ, chă thông huang tơ char glă tơklă đak Dơsĭ 'Brê.

⁴¹ Kơplah noh lu sư tơl inh: Lu nhôn pơm yoch hăm Kră Yang; lu nhôn gô năm blah păng pơm dôm tơdrong mă Kră Yang lu bơ̆n đei pơkă, kơ bơ̆n! Rim 'nu kơ lu drŏ-nglo lu iĕm hơmet tơlei tơ̆n chĕp đao hơlă tŏk tơ kông năm tơblah.

⁴² Kră Yang khan kơ inh: Khan bĕ kơ lu sư; 'nĕ kơ tŏk păng 'nĕ kơ tơblah, yua kơ Inh ưh kơ oei hơdai hăm lu iĕm ôh. Kơnh hli kơ lu iĕm tơblah jei đe.

⁴³ Thoi noh inh đei roi dơ̆ng kơ lu iĕm, mă-lei lu iĕm ưh kơ wă mơ̆ng ôh, pơma plơ̆ kơ nơ̆r Kră Yang tơtă; lu iĕm 'bĕnh hăm tơdrong pơang, lu iĕm tơdui băl năm tŏk tơ dêh kông groi.

⁴⁴ Kơplah noh lu bơngai Amôrit mă oei lăm kông groi noh, lĕch đơ̆ng kông druh puh lu iĕm thoi sut, blah pơrăm lu iĕm lăm Seir truh tơ Horma.

⁴⁵ Na lu iĕm brŏk nhơ̆m krao Kră Yang, mă-lei Kră Yang ưh kơ wă mơ̆ng păng ưh kơ đei pơgling đon mơ̆ng lu iĕm.

⁴⁶ Thoi noh lu iĕm oei tơ Kades đunh ưh kơ băt dang yơ!