Bôk Bơthô 9 - Sơ̆p Hlabơar Nơ̆r 'Bok Kei-Dei

¹ 'Nâu tơdrong mă inh oei tơchĕng. Lu bơngai pơm 'lơ̆ng tơdrong hơgei păng tơdrong lu sư pơm, đĭ-đăng oei lăm tơpang ti Kră Yang 'Bok Kei-Dei ngăl; sư 'mêm kơ bu, areh kơ bu, kon bơngai ưh kơ đei bu băt ôh: Đĭ-đăng tơdrong noh, tơdrong tơ anăp kơnh ngăl.

² Tôm tơdrong đei hơgăt kơ kon bơngai lei-lăi băl ngăl: Bơngai pơm 'lơ̆ng dah bơngai pơm kơnê̆, bơngai 'lơ̆ng rơgoh dah bơngai 'mê̆-'mach, bơngai pơyơ̆r tơmam soi dah bơngai ưh kơ pơyơ̆r, bơngai 'lơ̆ng dah bơngai pơm yoch, bơngai đei nơ̆r pơkăm pơkă dah bơngai hli kơ nơ̆r pơkă, đĭ-đăng đei iŏk hơdai minh tơdrong đơ̆ng 'Bok Kei-Dei 'măn lê̆ boih.

³ Tơdrong mă sơ'ngon dêh lăm ala teh âu, đĭ-đăng bơngai tă kơ lei-lăi ngăl. Mă loi lu bơngai đei, jơhngơ̆m 'bĕnh kơ tơdrong kơnê̆ păng kơplah lu sư oei arih ưh kơ băt tơchĕng, kiơ̆ kơtul kơwao tuch-luch đĭ-đăng gô lôch ngăl.

⁴ Kơbĭ bu gơh klaih đơ̆ng noh? Arih oei đei hơmĕng; yua kơ minh pôm kon kŏ oei arih sư hloh kơ minh pôm Dăm-brang lôch.

⁵ Bơngai arih sư băt kơdih sư gô lôch; mă-lei bơngai lôch ưh pă băt kiơ boih, kư̆m ưh kơ đei tơmam apah bơnê kiơ mơ̆n, yua kơ đe gô hiơt ưh pă đei bu 'blŏk kơ lu sư dơ̆ng.

⁶ Mă đĭ kơ tơdrong 'mêm, tơdrong areh, tơdrong pơjah tơgar, đĭ-đăng kư̆m gô hiong hiach đĭ; lu sư kư̆m pă đei kiơ lăm dôm tơdrong jang lăm ala teh âu.

⁷ Lei sŏng sa hiôk hal bĕ păng huch đak hơmu ih mă chơt hiôk bĕ! Yua kơ Kră Yang 'Bok Kei-Dei ăn boih kơ inh dôm tơdrong noh.

⁸ Mă layơ ih kư̆m athei hrŭk hơbĕn ao kok 'nao ling-lang thoi năr et sa tih păng 'nĕ hiơt pik pơgang 'bâu phu kơpal kơ̆l ih.

⁹ Dôm lu năr lăm chăl arih ih mă ưh kơ yua Kră Yang 'Bok Kei-Dei ăn boih kơ ih lăm ala teh 'nâu, ih athei oei sa mă hiôk chơt bĕ hăm kon akăn ih mă ih 'mêm kơeng; yua kơ noh jơ̆ tơdrong apah kơ ih đơ̆ng tơdrong gleh hrat.

¹⁰ Mă dôm kiơ ih gơh pơm jang bĕ đĭ jơhngơ̆m tôch kơ ih kĕ; yua kơ tơ anih lôch mă ih wă năm, tơ noh ưh pă đei minh tơdrong jang, kiơ mă ih gơh pơm, mă chă đon mă gơh hơgei, mă kơ̆l 'ngok, hlôh băt.

Mă kơtul mă hơgei đei lei-lăi

¹¹ Inh 'bôh dơ̆ng đei tơ lăm ala teh 'nâu. Bơngai kơdâu hrĕnh kư̆m ưh kơ jei sư ling-lang lăm năr kơdâu pơjei, bơngai pran kư̆m ưh kơ kĕ tơblah jei ngăl, bơngai hơgei kư̆m ưh kơ đei tơmam sa phĭ mah ngăl, bơngai hlôh wao kư̆m ưh kơ mơdrŏng ngăl, bơngai đei 'bơ̆r đon kư̆m ưh kơ đei pŭn hiôk, yua kơ jơ lăp gô truh kơ đĭ-đăng rim bơngai lei-lăi.

¹² Ưh kơ đei bu băt ôh layơ sư lôch thoi ka đom lăm hơnhuăl, thoi sem 'leh hơđong, kư̆m thoi noh mơ̆n, kon bơngai bơ̆n đom lăm năr tơdrong truh, 'bôh 'băi truh hloi ưh kơ tam băt.

¹³ Inh kư̆m đei 'bôh lăm ala teh âu, Thoi tơdrong hơgei 'bôh sư hơgrih 'biơ̆.

¹⁴ Đei minh pôm pơlei iĕ, bơngai oei tŏ sĕt đĕch, đei minh 'nu pơtao mơdrŏng pran kơtang năm wă wang blah pơlei noh.

¹⁵ Lăm pơlei đei minh 'nu bơngai dơnuh hin mă-lei hơgei, sư yua tơdrong hơgei sư pơklaih pơlei noh; mă-lei đơ̆ng rŏng kơ 'noh ưh kơ đei bu 'blŏk hơdơ̆r kơ bơngai dơnuh hin.

¹⁶ Inh khan bơngai hơgei hloh kơ tơdrong kơtang. Mă-lei tơdrong hơgei bơngai dơnuh hin đe pơjăm. Păng sư pơma ưh kơ đei bu wă mơ̆ng.

¹⁷ Nơ̆r bơngai hơgei pơma đei pơyom hloh kơ nơ̆r bơngai pơm yŏng kơtul ôr hơdrăi.

¹⁸ Tơdrong hơgei đei pran hloh kơ đao hơlă, mă-lei lăp minh 'nu bơngai đĕch pơm glăi đĕch, sư pơrăm đĭ tơdrong 'lơ̆ng.