Bôk Bơthô 5 - Sơ̆p Hlabơar Nơ̆r 'Bok Kei-Dei

Răk nơ̆r pơkă

¹ Kơchăng bĕ mưh ih mơ̆t lăm hnam 'Bok Kei-Dei. Năm mă jê̆ na mơ̆ng, 'lơ̆ng hloh kơ bơngai kơtul pơyơ̆r tơmam soi, lu bơngai mă ưh kơ băt sư đei pơm yoch.

² 'Nĕ kơ hăt pơma păng jơhngơ̆m ih 'nĕ kơ hăt hot lĕch nơ̆r pơkă 'bơ̆t anăp Kră Yang 'Bok Kei-Dei, yua kơ Kră Yang 'Bok Kei-Dei oei tơ kơpal plĕnh ti, na ih oei tơ ala teh. Lei ih athei wei 'bơ̆r rim nơ̆r pơma mă 'lơ̆ng.

³ Đơ̆ng ih hrăn tơtăm na jing apo; kơnê̆ đơ̆ng pơma lơ jing kơtul.

⁴ Tơdah ih đei pơma pơkă hăm Kră Yang 'Bok Kei-Dei athei jah pơm pơkeh nơ̆r pơkă noh; yua kơ lu bơngai kơtul ưh kơ đei pơm kơ Kră Yang lăp đon. Lei jah pơkeh nơ̆r ih pơkă noh.

⁵ Kơtrơ̆m 'nĕ pơkă, 'lơ̆ng hloh kơ pơkă mă ưh kơ pơm.

⁶ 'Nĕ ăn kơ 'bơ̆r ih pơm kơ akâu ih yoch na athei năm khan kơ 'bok soi, inh pơkă 'bơm glăi boih. Liơ ih pơm kơ Kră Yang 'Bok Kei-Dei yua kơ đơ̆ng nơ̆r ih pơkă, na mah Kră Yang pơrăm lê̆ đĭ tơdrong đêl ti ih pơm!

⁷ Tơ yơ đei tơdrong apo lơ păng pơma lơ hnang, 'noh kư̆m tơdrong kơ đei; mă-lei ih athei hli yom kơ Kră Yang 'Bok Kei-Dei.

Mơdrŏng tơdrong kơđei

⁸ Dah ih 'bôh lăm tơring ih đei bơngai mă đe pơjuă pơđep sư dah 'bôh pơm ưh kơ trŏ, ưh kơ tơpăt hơnơ̆ng, lei ih 'nĕ kơ chrêu kơ đon; yua kơ đei bơngai pơm tih kư̆m đei bơngai tih hloh kơ sư oei răp lăng, đơ̆ng noh oei đei 'bok mă tih hloh đĭ kơ bre noh dơ̆ng.

⁹ Kon pơlei juăt kơ choh jang chŭn mir, kăl kơ đei pơtao 'lơ̆ng pơgơ̆r na teh đak sư gơh đei yua tôm tơdrong.

¹⁰ Lu bơngai ham kơ jên đei jên lơ kư̆m khan ưh kơmah; lu bơngai ham kơ mŭk tơmam đei lơ dôm yơ kư̆m ưh kơ hrăp. Tơdrong noh kư̆m tơdrong kơ đei.

¹¹ Dah đei mŭk tơmam rai lơ dang yơ, bơngai sa kư̆m rai lơ dang noh mơ̆n. Tơ'ngla đei mŭk tơmam noh hăm đei lơi yua kiơ kơ sư. Măt sư kư̆ hrăn pơglăn tơ mŭk tơmam noh.

¹² Lu bơngai jang gleh hrat, mă sŏng sa tŏ sĕt dah lơ tep hiôk kơmăng; mă-lei lu bơngai mơdrŏng, đei sa rơkah rơkai, mă-lei tep ưh kơ hiôk.

¹³ Đei minh tơdrong kơnê̆ dêh mă inh 'bôh tơ ala teh âu: Bơngai mơdrŏng mong mŭk tơmam ưh kơ hơđơ̆ng hiôk.

¹⁴ Dah đei tơdrong răm truh, dôm lu mŭk tơmam 'nâu hiong đĭ; sư đei kon hơ'lơ̆p, mă-lei pă đei ăn kơ kon sư kiơ.

¹⁵ Bơ̆n lĕch đơ̆ng klak mĕ akâu hoh, bơ̆n lôch brŏk tơ teh kư̆m hoh thoi noh mơ̆n, brŏk tơpang ti hoh ưh kơ đei chĕp ba kiơ đơ̆ng tơdrong jang mă gleh hrat noh.

¹⁶ 'Nâu kư̆m minh tơdrong kơnê̆ dêh tơpă. Bơ̆n lĕch đơ̆ng klak mĕ thoi yơ kư̆m gô brŏk tơ teh thoi 'noh mơ̆n. Lu bơngai mă jang gleh hrat wă hiong ngôi mơ̆ng kơ kial bơbơ̆t, hăm đei lơi yua kiơ ưh?

¹⁷ Ih sa rai oei arih tơ lăm măng mu, đei lơ tơdrong ơh sơ'ngon chhŭr nuih, gleh lap, jĭ jăn.

¹⁸ Inh 'bôh tơdrong mă 'lơ̆ng kơ kon bơngai noh sŏng sa păng hiôk chơt lăm tơdrong jang gleh hrat tơ ala teh mă bơ̆n đei pơm noh, đĭ khei sơnăm lăm chăl arih âu mă Kră Yang 'Bok Kei-Dei đei ăn boih, noh tơdrong mă đei 'măn lê̆ kơ bơ̆n.

¹⁹ Hloh kơ noh dơ̆ng bơngai bu Kră Yang 'Bok Kei-Dei ăn kơ sư mơdrŏng, đei mŭk tơmam lơ sư gơh yua gơh iŏk tơmam noh păng hiôk chơt lăm tơdrong jang sư mă hrat gleh noh boih tơdrong Kră Yang 'Bok Kei-Dei asong ăn.

²⁰ Sư noh gô hiơt pă 'blŏk bơih dôm lu năr gleh hrat, ơh sơ'ngon lăm chăl arih sư mă đĭ hlôi bơih, yua kơ Kră Yang 'Bok Kei-Dei ăn kơ lăm jơhngơ̆m sư đei tơdrong hiôk chơt.