Bôk Bơthô 4 - Sơ̆p Hlabơar Nơ̆r 'Bok Kei-Dei

Lu tơdrong lăm chăl arih

¹ Inh lăng tơ rŏng, 'bôh dôm tơdrong pơjuă pơđep băl tơ ala teh; to bơngai mă đe pơjuă pơđep nhơ̆m ơh sơ'ngon, ưh kơ đei bu pơlung lu sư! Lu bơngai gơh chă pơjuă pơđep, mă-lei ưh kơ đei bu dŏng pơlung lu bơngai mă đe pơjuă pơđep noh!

² Inh hiôk kơ lu bơngai lôch, yua kơ sư lôch boih lu sư noh hiôk hloh kơ lu bơngai mă oei arih.

³ Lu bơngai mă hiôk hloh kơ 'bar khŭl bơngai noh bơngai mă đe tam mă tơpŭ kơ sư, lu sư tam mă lah 'bôh tơdrong kơnê̆ lăm chăl arih âu.

⁴ Inh kư̆m 'bôh đĭ-đăng tơdrong kon bơngai jang gleh hrat, yua tơdrong gơh hơgei, noh jơ̆ yua kơ tơdrong sư 'ngeng areh klai dih băl. Tơdrong noh kư̆m tơdrong kơ đei, gô mơ̆ng kơ kial bơbơ̆t tơ yơ kiơ̆ tơ noh.

⁵ Bơngai kơtul sư kuăr ti ngôi đĕch, noh pơrăm sư kơdih.

⁶ Kơtrơ̆m jah đei đăi 'bĕnh hơya minh pah tơpang ti đĕch mă-lei đei tơdrong hiôk rơnŭk, noh sư hloh kơ đei 'bĕnh 'bar pah tơpang ti, mă-lei gleh pơmat, mơ̆ng kơ kial bơbơ̆t sư tơ yơ kiơ̆ tơ noh.

⁷ Na inh, 'bôh tơdrong kơđei ala teh 'nâu.

⁸ Thoi minh 'nu bơngai hơdrô̆, ưh kơ đei kon hơ'lơ̆p kư̆m ưh kơ đei 'nhŏng oh; mă-lei nŏng kơ jang adrin gleh hrat ưh pă pơdơh, măt sư lăng tơ mŭk tơmam ưh kơ đei layơ bơ̆l hăl; sư ưh kơ lah tơchĕng khan inh jang gleh hrat, yua kơ bu ơ̆t kơ sŏng sa jơnap hrŭk hơnĭl tơpă jơ̆ tơdrong kơ đei, chăl arih hiơ̆k bơngơ̆t gleh pơmat-tat, tơdrong arih răm-'băm pă kĕ.

⁹ 'Bar 'nu hloh kơ minh 'nu, yua kơ jang hơdai đei yua kơ 'bar 'nu.

¹⁰ Tơdah minh 'nu pơ̆k minh 'nu tơiung; mơnat 'biơ̆ kơ bơngai hơdrô̆ huŏng, ưh kơ đei bu tơiung!

¹¹ Kŭm thoi ei, 'bar 'nu 'bĭch hơdai tơtŏ; 'bĭch minh 'nu liơ gơh tơtŏ

¹² Minh drô̆, 'bônh kơ jei đe, mă-lei dah đei 'bar 'nu pơpôi jơhngơ̆m bu kĕ pơm kơ bre sư; minh dăng tơlei kŭi pêng 'yoi sư hơnat kơ kơtĕch.

¹³ Minh 'nu bơngai 'lơ̆p dơnuh hin, mă-lei hơgei, oei 'lơ̆ng hloh kơ pơtao kră kơtul, ưh kơ mơ̆ng nơ̆r đe bơtho tơ'bôh.

¹⁴ Bơngai 'lơ̆p 'nao tŏk đơ̆ng sơlŭng đe phak wă pơm pơtao, mă khan đe tơpŭ kơ sư dơnuh hin lăm dêh char sư.

¹⁵ Inh 'bôh đĭ-đăng bơngai arih oei lăm ala teh 'nâu oei lăp kơ 'lơ̆p ngăl, gô pôk sư pơm pơtao.

¹⁶ Mă-lei đei, lu bơngai iung đơ̆ng rŏng, ưh kơ lăp đon, kơ sư. Tơpă noh kư̆m tơdrong kơ đei, gô mơ̆ng kơ kial bơbơ̆t sư tơ yơ kiơ̆ tơ noh.