Bôk Bơthô 2 - Sơ̆p Hlabơar Nơ̆r 'Bok Kei-Dei

Tơdrong chơt hiôk, kư̆m ưh kơ đei kiơ.

¹ Inh pơma lăm to: “Inh pơlong hiôk chơt 'nă hal lăng 'mơ̆i, lăng lăng hăm đei kiơ hiôk. “Mă-lei inh 'bôh tơdrong noh kư̆m jơ̆ tơdrong kơ đei mơ̆n.

² Inh khan: Hiĕk 'noh wơnh; chhôk hơnôk kơ kiơ?

³ Inh pơlong et tơdrô wă kơ akâu inh kơdih chơt hiôk, mă-lei tơdrong hơgei oei chông anhăk inh, inh wă lăng lăng tơdrong kiơ 'lơ̆ng 'biơ̆ ăn kơ kon bơngai kơplah 'bơ̆t bơ̆n oei arih 'biơ̆ năr lăm teh đak âu.

⁴ Inh jang tôm tơdrong; inh pơm hnam pơm mir pơgar pơtăm 'long hơmu.

⁵ Pơjing pơm mir pơgar 'long sa plei;

⁶ inh sir sơlŭng să pơm dơnâu mong đak wă ruh mir 'long wơ̆ iung.

⁷ Inh răt lu đĭch đam drŏ-nglo drŏ-kăn, đơ̆ng noh đĭch đam đei kon hơ'lơ̆p lơ lăm hnam nhôn inh đei khŭl rơmo, khŭl triu lơ hloh kơ đĭ-đăng bơngai pơtao oei tơ pơlei Jêrusalem adrol kơ inh.

⁸ Inh kư̆m mong 'măn hu maih păng dôm tơmam gĭt lu pơtao tơ lăm, lu pơlei tih. Inh kư̆m chă pơlung ăn kơ inh kơdih iŏk bơngai drŏ-nglo drŏ-kăn hơri, hăm tơdrong hiôk bơngai drŏ-nglo, wă iŏk akăn, akăn kơnhŏng lơ.

⁹ Thoi noh inh jing mơdrŏng mơng tih hloh kơ đĭ-đăng lu bơngai oei tơ pơlei Jêrusalem adrol kơ inh; lăm tơdrong, tơdrong gơh hơgei oei oei hăm inh.

¹⁰ Inh ưh kơ lê̆ minh tơdrong kiơ mă măt inh 'maih wă, kư̆m ưh kơ sơngah kơ tơdrong kiơ mă jơhngơ̆m hiôk lăp jơhngơ̆m inh hiôk chơt kơ tơdrong đêl inh jang gleh lap păng noh bơih jơ̆ tơdrong mă apah inh đêl tơdrong inh jang gleh.

¹¹ Inh tơchĕng hơlen lăng dôm tơdrong đêl ti inh pơm. Tuh bơuh bơang pă băt dang yơ gleh hrat, inh lăng dôm tơdrong noh jơ̆ tơdrong kơ đei ưh kơ hlôh yua kơ kiơ thoi pơmơ̆ng kơ kial bơbơ̆t sư tơ yơ kiơ̆ tơ noh, kon bơngai ưh kơ đei pơm kiơ mă đei yua lăm ala teh âu.

¹² Inh tơchĕng lăng tơdrong hơgei, tơdrong kơtul kơwao wơnh bơlŭk. Bơngai tơplih pơtao, sư gơh pơm kiơ̆ kơ sư jang kư̆m thoi pơtao sơ̆ đĕch,

¹³ inh 'bôh tơdrong hơgei, sư yua 'biơ̆ kơ tơdrong kơtul, kư̆m thoi hơdah sư yua 'biơ̆ kơ măng mu.

¹⁴ Bơngai hơgei sư đei măt hơdah trong sư yak, na bơngai kơtul bơlŭk sư yak chơjơ̆ lăm măng mu. Mă khan lei, inh kư̆m băt 'bar trong noh kư̆m gô tơdrong răm lei-lăi.

¹⁵ Na inh khan: “Tơdrong mă truh kơ bơngai kơtul, kư̆m gô truh kơ inh thoi noh mơ̆n; thoi noh, hơgei hloh thoi inh âu đei yua kiơ?” Inh khan kơdih akâu: “Noh tơdrong kơ đei mơ̆n.”

¹⁶ Tơpă đe kư̆m ưh kơ 'blŏk kơ bơngai hơgei dah bơngai kơtul ling-lang khŏm khŏm ôh, yua kơ bơ̆n băt lăm năr hơtuch kơnh bơngai hơgei dah bơngai kơtul đe kư̆m hiơt đĭ. Ơ! Bơngai hơgei dah bơngai kơtul kư̆m lôch lei-lăi.

¹⁷ Lei, inh đĭ areh kơ chăl arih inh, yua kơ dôm tơdrong truh tơ ala teh âu pơm kơ inh pơmat, đĭ-đăng tơdrong ưh kơ đei ưh kơ yua kiơ, thoi gô mơ̆ng kơ kial bơbơ̆t tơ yơ kiơ̆ tơ noh.

¹⁸ Inh kư̆m areh dôm tơdrong đêl inh jang pơm pơjing tơ ala teh âu, yua kơ wă pơsư̆ ăn đĭ kơ bơngai đơ̆ng rŏng kơ inh.

¹⁹ Bu băt bơngai noh hơgei dah mă kơtul mă khan thoi yơ, sư gô wei pơgơ̆r dôm tơdrong kiơ mă inh đei pơm yua tơdrong gơh hơgei păng jang gleh hrat inh noh kư̆m kơ đei.

²⁰ Inh tơtĭnh lăng tơ rŏng lăng dôm tơdrong đêl inh jang pơm pơjing gleh hrat lăm ala teh âu.

²¹ Yua kơ đei bơngai jang yua tơdrong gơh hơgei, hlôh wao jơhngơ̆m pran pơm pơjing lê̆, đơ̆ng noh wă pơsư̆ mŭk tơmam ăn kơ lu bơngai mă ưh kơ đei jang gleh hrat kiơ, noh kư̆m tơdrong kơ đei păng minh tơdrong klai tơpă.

²² Lei, hăm đei yua kiơ kơ bơngai gleh pơmat, hrat jơhngơ̆m nŏng kơ bơ̆jang lăm ala teh âu?

²³ Rim năr tơ'bơ̆p tơdrong chhŭr nuih, tơdrong jang ơh klai; mă kơmăng kơ̆l đon sư kư̆m pă đei pơdơh hiôk. Tơdrong noh kư̆m tơdrong kơ đei.

²⁴ Tơdrong 'lơ̆ng hloh mă kon bơngai gơh pơm noh sŏng sa, nhă đak păng chơt hiôk lăm tơdrong jang. Inh 'bôh boih tơdrong noh Kră Yang 'Bok Kei-Dei ăn.

²⁵ Tơpă dah ưh kơ đei đơ̆ng Kră Yang ăn bu gơh đei sŏng sa, gơh hiôk lăm tơdrong jang sư.

²⁶ 'Bok Kei-Dei ăn tơdrong hơgei hlôh băt păng ăn hiôk chơt kơ đe bu mă pơm trŏ thoi sư lăp đon; mă-lei sư ăn kơ lu bơngai yoch khŏm jang gleh hrat na gơh đei tơmam, mong 'măn lê̆, đơ̆ng noh ăn kơ lu bơngai pơm trŏ thoi 'Bok Kei-Dei lăp đon, tơdrong noh kư̆m tơdrong kơ đei, gô mơ̆ng kơ kial bơbơ̆t tơ yơ kiơ̆ tơ noh.