Bôk Bơthô 1 - Sơ̆p Hlabơar Nơ̆r 'Bok Kei-Dei

Tơdrong lăm ala teh đak âu, tơdrong ưh kơ yua kiơ

¹ Nơ̆r 'bok bơtho, sư kon drŏ-nglo Đawit, pơtao oei lăm pơlei Jêrusalem.

² 'Bok mă bơtho noh khan: “Đĭ-đăng dôm tơdrong ưh kơ yua kiơ̆ hloi, tơdrong kơđei ngăl. Ưh kơ đei bu kĕ hlôh tôm tơdrong lăm chăl arih bơ̆n.”

³ Dôm tơdrong kon bơngai jang gleh hrat lăm ala teh 'nâu, hăm đei yua kiơ̆ ưh!

⁴ Đơ̆ng chăl 'nâu, truh tơ chăl nai, mă-lei teh 'nâu oei oei khŏm khŏm đĕch.

⁵ 'Năr lĕch, đơ̆ng noh 'năr mơ̆t, sư wơ̆t hơlơ̆k tơ anih đêl sư lĕch noh dơ̆ng.

⁶ Kial tơthu tơ gah gơal, wơ̆t tơ gah yă-nơ̆m, sư wơ̆t wih ưh kơ pơdơh, đơ̆ng noh wơ̆t tơ đêl trong sư blŭng-a dơ̆ng.

⁷ Đĭ-đăng đak krong ro truh tơ đak dơsĭ ngăl, mă-lei ưh kơ kĕ kơ 'bĕnh; sư wơ̆t hơlơ̆k dơ̆ng tơ đêl anih sư lĕch blŭng-a noh.

⁸ Đĭ-đăng tôm tơmam oei oei hơnơ̆ng, 'bơ̆r kon bơngai ưh kơ gơh roi ôh; măt lăng ưh kơ bơ̆l, đon mơ̆ng ưh kơ hăl.

⁹ Tơdrong kiơ hlôi đei boih, tơdrong noh tơ anăp oei đei; tơdrong kiơ mă hlôi pơm boih, tơdrong noh oei pơm dơ̆ng; ưh kơ đei kiơ̆ 'nao lăm ala teh 'nâu.

¹⁰ Dah đei minh pôm tơmam kiơ mă đe khan: “Lăng bĕ, tơmam 'nâu 'nao,” mă tơpă tơmam noh sư hlôi đei đơ̆ng lu chăl adrol kơ lu bơ̆n sơ̆ boih.

¹¹ Đe ưh pă 'blŏk boih lu chăl adrol sơ̆, lu bơngai truh đơ̆ng rŏng kư̆m ưh kơ 'blŏk lu chăl adrol noh mơ̆n.

Hơgei kư̆m tơdrong kơ đei

¹² Inh boih 'bok bơtho, hlôi pơm pơtao lu bơngai Isơrael lăm pơlei Jêrusalem.

¹³ Inh nŏng kơ yua tơdrong gơh hơgei wă tơchĕng pơwao dôm tơdrong jang tơ ala teh âu; noh jơ̆ minh tơdrong gleh hrat mă 'Bok Kei-Dei pơjao boih kơ kon bơngai wă kơ jang.

¹⁴ Inh 'bôh boih dôm tơdrong đei jang tơ ala teh âu; đĭ-đăng tơdrong kơ đei ngăl, mơ̆ng kơ kial bơbơ̆t tơ yơ kiơ̆ tơ noh.

¹⁵ Tơdrong kiơ hlôi đŏng boih, ưh kơ gơh 'bơ̆ jing tơpăt dơ̆ng păng tơmam kiơ ưh kơ đei kư̆m ưh kơ đei.

¹⁶ Inh pơma lăm to khan: “Âu inh đei boih tơdrong hơgei tih hloh kơ đĭ-đăng lu bơngai mă oei adrol kơ inh tơ pơlei Jêrusalem. Jơhngơ̆m inh 'bôh tơpă boih lơ tơdrong hlôh băt, gơh hơgei.”

¹⁷ Inh kư̆m nŏng kơ hŏk wă kơ băt tơdrong hơgei păng wă kơ băt tơdrong kơtul bơlŭk; inh băt kơnăl tơdrong noh kư̆m mơ̆ng kơ kial bơbơ̆t tơ yơ, sư kiơ̆ tơ noh.

¹⁸ Yua kơ tơdah đei tơdrong gơh hơgei lơ, tơdrong ơh sơ'ngon kư̆m lơ, bu hlôh băt roi lơ, bơngai noh gô chhŭr nuih rai lơ.