Bl 7 - Sơ̆p Hlabơar Nơ̆r 'Bok Kei-Dei

Đak lip

¹ Kră Yang khan kơ Nôê thoi âu: “Ih păng đĭ-đăng hnam dơnŏ ih mơ̆t bĕ lăm duk, yua kơ lăm lu bơngai chăl dang ei Inh 'bôh ih jơ̆ minh 'nu bơngai tơpăt.

² Lăm lu kon sem brem 'lơ̆ng rơgoh, ih athei anhăk ba minh adrĕch tơpơh hơgrop, tơno păng akăn; gah lu sem brem mă ưh kơ 'lơ̆ng rơgoh minh adrĕch minh hơgrop, wă kơ pơm adrĕch jơ̆p kơpal teh đak.

³ Ih kư̆m athei anhăk ba lu sem păr, rim khŭl tơpơh hơgrop tơmông păng yŏng, wă kơ ih wei sư arih chek lar jơ̆p kơpal teh.

⁴ Yua kơ pă tơpơh năr dơ̆ng, inh gô ăn 'mi jruh tơ teh, lăm puăn-jĭt năr puăn-jĭt măng; Inh gô pơrăm lê̆ đĭ kơpal teh mă dôm kon sem brem mă đĭ adrĕch đơ̆ng inh đei pơjing.”

⁵ Na Nôê pơm kiơ̆ tôm dôm lu nơ̆r đơ̆ng Kră Yang đei pơkă kơ sư.

⁶ Kơplah đak lơ̆p, lah lai jơ̆p kơpal teh, Nôê đei tơdrâu-hrĕng sơnăm boih.

⁷ Nôê hăm akăn sư mơ̆t lăm duk, hơdai lu kon lu mŏ mai sư wă kơ klaih đơ̆ng đak lơ̆p.

⁸ Dôm lu kon sem brem mă 'lơ̆ng rơgoh păng lu kon sem brem mă ưh kơ 'lơ̆ng rơgoh, lu sem păr, lu kon hơdrông kơep lep-ler kơpal teh,

⁹ minh hơgrop tơno păng akăn, tơmông păng yŏng, năm đĭ tơ Nôê păng mơ̆t lăm duk 'blep trŏ thoi nơ̆r Kră Yang 'Bok Kei-Dei bơtho pơkă kơ sư.

¹⁰ Đơ̆ng rŏng kơ tơpơh năr, đak pơtơm jur jơ̆p kơpal teh.

¹¹ Kơplah noh Nôê tơdrâu-hrĕng sơnăm, khei 'bar năr mơjĭt-tơpơh, trŏ kơ năr noh, dôm lu tu đak đôh pơchah đak bluh đơ̆ng teh, đơ̆ng kơpal plĕnh kư̆m pơih tơjur đak.

¹² 'Mi jruh tơ teh lăm puăn-jĭt năr, puăn-jĭt măng.

¹³ Kŭm lăm năr noh, Nôê akăn sư, pêng 'nu kon sư, Sem, Cham, Japhet, hăm pêng 'nu mŏ mai sư kư̆m mơ̆t lăm duk.

¹⁴ Lu sư mơ̆t hơdai păng đĭ-đăng lu sem brem, lu sem dơrong kiơ̆ kơ adrĕch, lu kon hơdrông kơpal teh kư̆m kiơ̆ kơ adrĕch, sem păr kư̆m kiơ̆ kơ adrĕch păng đĭ-đăng lu sem kiơ mă đei pơnăr.

¹⁵ Hơgrop, hơgrop kiơ̆ Nôê mơ̆t lăm duk; wă khan đĭ-đăng dôm lu đei sĕch akar mă dui jơhngơ̆m.

¹⁶ Tơno minh akăn minh, đei tơmông đei yŏng, đĭ-đăng kư̆m mơ̆t lăm duk, kiơ̆ thoi nơ̆r Kră Yang 'Bok Kei-Dei khan pơkă, na Kră Yang tang lê̆ 'măng duk.

¹⁷ Đak lơ̆p kơpal teh puăn-jĭt năr puăn-jĭt măng, đak tŏk kơjung tưk duk kư̆m rai kơjung đơ̆ng teh dơ̆ng kơpal đak.

¹⁸ Kơpal teh, đak tih păng rai tŏk kơjung dêh, duk đông kơpal đak.

¹⁹ Đak tŏk rai dêh kơpal teh, đĭ-đăng lu kông kơjung kư̆m lơ̆p đĭ.

²⁰ Đak tŏk truh tơ mơjĭt-pơđăm hlok kơjung hloh kơ đĭ-đăng lu kơ̆l kông kơjung.

²¹ Đĭ-đăng dôm lu adrĕch sĕch akar arih kơpal teh lôch glơ̆k, mă lu sem păr, mă lu kon sem dơrong, kon sem bri, mă kon hơdrông kơep lep-ler păng đĭ kon bơngai.

²² Mă dui jơhngơ̆m trong muh lôch đĭ.

²³ Đĭ-đăng adrĕch khŭl arih kơpal teh pơrăm pơlôch đĭ, đơ̆ng kon bơngai truh tơ kon sem brem, lu hơdrông kơep lep-ler, lu sem păr; lăp Nôê hăm lu bơngai, lu sem brem lăm duk đĕch oei arih.

²⁴ Đak oei lơ̆p kơpal teh 'blep minh-hrĕng pơđăm-jĭt năr.