Bl 49 - Sơ̆p Hlabơar Nơ̆r 'Bok Kei-Dei

Nơ̆r sơkat lê̆ adrol đơ̆ng Jakôp ăn kơ lu kon drŏ-nglo sư

¹ Jakôp krao lu kon drŏ-nglo sư akŭm păng sư khan thoi âu: Akŭm tơ âu bĕ, inh gô roi ăn kơ iĕm tơdrong gô truh kơ lu iĕm ning-mônh.

² Ơ lu kon drŏ-nglo Jakôp akŭm bĕ wă mơ̆ng, Mơ̆ng nơ̆r Isơrael 'bă lu iĕm.

³ Rubên! Kon kơdră inh, Jơhngơ̆m pran inh blŭng-a tơdrong pran kơtang inh Đei tơdrong pơyom păng mơsêh.

⁴ Kon nhen thoi đak poh-yă, na e pă đei tih hloh boih. Yua kơ kon tŏk tơ giơng 'bă, E tŏk kơpal giơng 'bă pơm mơgrĭ kơnê̆ noh!

⁵ Simêôn păng Lêwi noh 'nhŏng oh minh pôm mĕ 'bă. Khêl đao lu sư yua wă pơm kơnê̆.

⁶ Apơi jơhngơ̆m inh huay kiơ̆ kơ đon kơnê̆. Tơdrong ư-ang inh huay kơ hơdai lu sư; Yua kơ lu sư đei pơlôch boih bơngai lăm năr sư ơh blĕk. Koh huan jơ̆ng rơmo tơno kiơ̆ thoi lu sư kơdih wă.

⁷ Trŏ kơ hiap tơpă mưh lu sư hil yua kơ tơdrong noh 'mê̆ brư̆ tơpă. Inh gô pơm kơ lu sư tơklah tơklang đơ̆ng lăm adrĕch Jakôp. Tơklah lê̆ lu sư đơ̆ng lăm kon pơlei Isơrael.

⁸ Ơ Juđa! Lu 'nhŏng oh e gô bơnê kơ e. Ti e gô 'bơm lu hơko lu ayăt kơ e, Lu kon drŏ-nglo inh gô sơtơ̆p kŭl-tăng 'bơ̆t anăp e.

⁹ Juđa jơ̆ dăm-brang mơlôh; Ơ dăm! E đei rôp bơnă na anhăk ba brŏk, Sư sơtơ̆p kŭl-tăng, thoi dăm-brang tơno drum. Thoi dăm-brang akăn; hăm đei bu pơ̆n tơiung?

¹⁰ 'Long jra pơgơ̆r ưh kơ đei layơ tơpleh đơ̆ng ti Juđa. Dôm lu tơdrong pơjing khôi juăt ưh kơ tơklah đơ̆ng 'bar pah jơ̆ng sư. Dĭng yŏng Silôa truh păng lu kon pơlei chu yom kơkuh kơ yŏng noh.

¹¹ Sư chô̆ aseh dăm sư tơ tơm 'long hơmu. Kon aseh sư tơ dơng hơmu 'lơ̆ng hloh, Kŭm iŏk pham hơmu sut ao tơtŏ sư.

¹² Măt sư 'brê yua kơ đak hơmu. Hơnĕnh sư kok yua kơ đak toh.

¹³ Sabulôn oei tơ cheng dơsĭ. Noh jơ̆ anih duk dơ̆ng pơdơh; Bơnơ̆ hơdral sư tơklă tơ Siđôn.

¹⁴ Isakar jơ̆ minh pôm aseh iĕ pran kơtang, Oei 'bĭch pơdơh cheng kơdŭng an.

¹⁵ Sư 'bôh boih anih pơdơh 'lơ̆ng rŏ, Păng teh jang sa 'lơ̆ng jing dêh. Sư pơgrê hơngiĕng sư wă tung trăp. Chu iŏk tơdrong jang gleh pơmat.

¹⁶ Đan gô sek tơlang kơ kon pơlei pơla sư, Minh 'nu lăm khŭl adrĕch Isơrael.

¹⁷ Đan gô thoi 'bih răp cheng trong. Minh pôm 'bih bôm lăm trong tôch, kăp kơnơl aseh. Pơm ăn kơ bơngai hao aseh gô huŏng hơtat.

¹⁸ Ơ Kră Yang! Inh chang tơdrong dŏng pơklaih đơ̆ng Ih!

¹⁹ Gah Gat đe gô năm blah sư, Mă-lei sư blah drŭt păng druh pơdor.

²⁰ Đơ̆ng anih Aser đei tơmam sa 'lơ̆ng. Sư gô chă tơmam 'bâu phu ăn kơ pơtao.

²¹ Neptali thoi juei akăn tơlĕch đơ̆ng hơdrong, Pơma dôm yơ tă kơ nơ̆r rơngơp păng pơđơ̆k ngăl.

²² Jôsep thoi tơmơ̆ng hla 'long adrih 'lơ̆ng, Chăt cheng tu đak. Dơng tơ'bla hro jơ̆p kơ dur.

²³ Lu bơngai chĕp hră pơgreh sư. Prah 'brơ̆m tơ sư păng drŭt blah.

²⁴ Đơ̆ng ti Kră Yang mơsêh Jakôp, Thoi noh hră sư huay kơ pơpơ̆; Đơ̆ng Kră Yang wei-lăng triu brĕ, noh tơmo kŭk Isơrael. Na 'bar pah ti sư jing pran.

²⁵ Kră Yang 'Bok Kei-Dei đơ̆ng 'bă gô tơgŭm e; Kră Yang mơsêh mơyang gô ăn pŭn hiôk kơ e, Wă khan tơdrong pŭn hiôk jruh đơ̆ng plĕnh. Hăm tơdrong pŭn hiôk jruh đơ̆ng anih jrŭ. Tơdrong pŭn hiôk đơ̆ng toh păng đơ̆ng lăm klak mĕ.

²⁶ Pŭn hiôk đơ̆ng 'bă sơkat rai tŏk. Kơjung hloh kơ pŭn hiôk mă đơ̆ng 'bok yă 'bă, Dĭng truh tơ wĕch kông ling-lang khŏm khŏm hloi: Dôm lu pŭn hiôk 'nâu gô oei tơ kơpal kơ̆l Jôsep, 'Bơ̆t klĕng bơngai mă pơm yŏng kơ lu 'nhŏng oh sư kơdih.

²⁷ Bênjamin thoi kŏ-so ngăl kăp hek, Pơgê hrôih drôih chă kăp sa sem bri. Gơsơ̆ klah asong sem bri mă đei boih.

²⁸ Lu bơngai noh jing kơ̆l kơ mơjĭt-'bar adrĕch Isơrael; păng noh boih nơ̆r 'bă lu sư pơma 'bơ̆t kơplah 'bă sư sơkat wă kơ đei pŭn hiôk, hơpơi sơkat ăn pŭn hiôk kơdih kơdih rim 'nu kơ lu kon sư.

Nơ̆r Jakôp hơpơi đơ̆ng adrol kơ sư lôch

²⁹ Đơ̆ng noh, sư đei pơma pơkă kơ lu kon drŏ-nglo sư thoi âu: 'Bă gô brŏk kiơ̆ 'bok yă, lu đe kon gô 'bŭ 'bă hơdai 'bok yă, tơ anih trôm tơmo lăm mir Êphrôn, bơngai Hêtit.

³⁰ Wă khan hơgơp tơmo tơ tơmăn Makbêla hơlĕch kơ Mamrê, tơ tơring Kanaan, mă Abraham đei răt wă pơm bơsat păng răt hloi mir đơ̆ng Êphrôn.

³¹ Tơ anih noh, đe 'bŭ Abraham păng yă Sara, akăn sư, Isăk păng Rê'bêka, akăn sư; păng kư̆m tơ anih noh 'bă kư̆m đei 'bŭ Lêa mơ̆n.

³² Mir chŭn păng hơgơp tơmo tơ noh mă đei răt đơ̆ng kon pơlei Hêtit.

³³ Kơplah sư hơpơi pơma dôm nơ̆r noh kơ lu kon drŏ-nglo sư đang boih, na Jakôp yon jơ̆ng sư tơ giơng dơ̆ng, na kơtĕch jơhngơ̆m, wih brŏk kiơ̆ yă 'bok sư.