Bl 46 - Sơ̆p Hlabơar Nơ̆r 'Bok Kei-Dei

Kră Yang 'Bok Kei-Dei pơdah kơ Jakôp

¹ Isơrael yak năm, chĕp ba dôm tơmam sư đei truh tơ Bêrsêba, sư pơyơ̆r tơmam soi kơ Kră Yang 'Bok Kei-Dei 'bă sư Isăk.

² Lăm măng ei đei kơtơ̆ng Kră Yang 'Bok Kei-Dei khan kơ sư thoi âu: Jakôp, Jakôp! Isơrael tơl: Đei inh tơ âu.

³ Kră Yang 'Bok Kei-Dei khan; Inh jơ̆ Kră Yang 'Bok Kei-Dei, Kră Yang 'Bok Kei-Dei 'bă ih. Jur bĕ tơ dêh Êyiptơ, hli kơ kiơ. Yua kơ tơ noh Inh gô ăn kơ ih jing minh adrĕch adrung tih.

⁴ Kơdih kâu Inh gô jur oei hơdai ih tơ noh păng Inh kơdih gô chông ih brŏk dơ̆ng. Jôsep gô prot măt ih.

Jakôp jur tơ dêh Êyiptơ

⁵ Jakôp pơtơm yak; đơ̆ng Bêrsêba, lu kon drŏ-nglo Jakôp 'bă lu sư hăm kon akăn lu sư hao gre đơ̆ng Pharaôn mă gơih năm iŏk lu sư ei.

⁶ Lu sư kư̆m anhăk ba lu sem dơrong păng mŭk tơmam lu sư đei jang sa tơ dêh Kanaan, wă jur tơ dêh Êyiptơ.

⁷ Thoi noh, Jakôp păng đĭ-đăng hnam dơnŏ sư, lu kon drŏ-nglo, lu sâu drŏ-nglo, lu kon drŏ-kăn, lu sư jur đĭ tơ dêh Êyiptơ.

Jô̆ kơsô̆ bơngai hnam dơnŏ Jakôp

⁸ 'Nâu lu kon drŏ-nglo Isơrael, wă khan Jakôp truh tơ dêh Êyiptơ: Kon kơdră Jakôp noh Rubên.

⁹ Kon drŏ-nglo Rubên noh: Hanok, Phalu, Hêsrôn păng Karmi.

¹⁰ Lu kon drŏ-nglo Simêôn noh: Jêmuel; Jamin, Ôhat, Jakin, Sôha păng Sôl noh kon akăn đơ̆ng dêh Kanaan.

¹¹ Lu kon drŏ-nglo Lêwi noh: Gersôn, Kêhat păng Mêrari.

¹² Lu kon drŏ-nglo Juđa noh: Er, Ônan Sêla, Pêres păng Sêra. Mă-lei Êro păng Ônan lôch, tơ lăm dêh Kanaan boih. Kon Pêres noh: Hêsrôn păng Hamul.

¹³ Lu kon drŏ-nglo Isakar noh: Thôla, Phuwa, Jop păng Sirôn.

¹⁴ Lu kon drŏ-nglo Sabulôn noh: Sêrot, Êlon păng Jahlel.

¹⁵ Păng lu kon drŏ-nglo păng minh 'nu drŏ-kăn anăn Đina, mă Lêa tơpŭ ăn kơ Jakôp kơplah lu sư oei tơ Phadan Aram, hăm lu sâu noh, đĭ-đăng đei pêng-jĭt 'nu.

¹⁶ Lu kon drŏ-nglo Gat noh: Siphôn, Hagi, Suni, Êsbon, Eri, Arôdi păng Arêli.

¹⁷ Lu kon drŏ-nglo Aser noh: Imna, Iswa, Iswi păng Bêria, hăm oh Sêra, oh drŏ-kăn sư noh, kon Bêria noh Hêber păng Makien.

¹⁸ 'Nâu lu kon drŏ-nglo duch Silpa tơpŭ ăn kơ Jakôp, hăm lu sâu sư, đĭ-đăng mơjĭt-tơdrâu 'nu. Sư noh đam La'ban ăn năm awih awăn kơ Lêa, kon drŏ-kăn sư.

¹⁹ Lu kon drŏ-nglo Rachel, akăn Jakôp, noh Jôsep păng Bênjamin.

²⁰ Jôsep đei akăn tơ dêh Êyiptơ anăn kon sâu noh Manase, Êphraim, mă Asơnat, kon drŏ-kăn Phôtiphêra, pơm 'bok soi tơm lăm pơlei Ôn, đei pơjing ăn kơ sư.

²¹ Lu kon drŏ-nglo Bênjamin noh: Bêla, Bêker, Asbel, Gêra, Naman, Êhi, Ros, Mupim, Hupim păng Ardơ.

²² Na, lu kon drŏ-nglo Rachel pơjing ăn kơ Jakôp păng đĭ lu sâu sư, mơjĭt-puăn 'nu.

²³ Kon drŏ-nglo Đan noh: Husim.

²⁴ Lu kon drŏ-nglo Neptali noh: Jaseel, Guni, Jeser păng Silem.

²⁵ Na, lu kon drŏ-nglo duch Bila tơpŭ ăn kơ Jakôp, hăm lu sâu sư, đĭ-đăng tơpơh 'nu. Duch âu đam La'ban năm awih wăn kơ Rachel kon drŏ-kăn sư.

²⁶ Lu sư jur năm truh tơ dêh Êyiptơ păng Jakôp, wă khan bơngai đơ̆ng Jakôp pơjing, tơdah ưh kơ đei jô̆ lu mŏ mai, lei tơdrâu-jĭt tơdrâu 'nu.

²⁷ Kon Jôsep mă đei pơjing tơ lăm dêh Êyiptơ đei 'bar 'nu, thoi lu bơngai lăm hnam dơnŏ Jakôp jur oei tơ Êyiptơ jô̆ đĭ-đăng đei tơpơh-jĭt 'nu.

Jôsep sơng iŏk 'bă sư

²⁸ Jakôp wơh Juđa năm adrol wă apinh Jôsep ăn kơ lu sư tŏk rok jih Gôsen. Thoi noh lu sư mơ̆t đĭ tơ Gôsen.

²⁹ Jôsep sư năm tơ Gôsen wă sơng, Isơrael, 'bă sư, sư tơ'bơ̆p 'bă sư na kuăr 'bă sư nhơ̆m mah đunh đang.

³⁰ Jakôp khan kơ Jôsep thoi âu: Kuă kơ kiơ lê̆ 'bă jah lôch năr 'nâu. Yua kơ 'bă đei 'bôh muh măt kon boih păng băt boih kon oei arih.

³¹ Đơ̆ng noh Jôsep khan kơ lu 'nhŏng oh sư thoi âu: Inh gô năm tŏk roi kơ Pharaôn thoi âu: Đĭ hnam dơnŏ 'bă inh păng lu 'nhŏng oh inh, đơ̆ng dêh Kanaan truh tơ âu wă oei păng inh boih.

³² Lu bơngai juăt tơdrong jang wei triu, rong sem dơrong. Lu sư đei chông ba đĭ lu triu sư păng chĕp đĭ mŭk tơmam lu sư kơdih.

³³ Păng Pharaôn krao lu 'nhŏng oh sư păng apinh thoi âu: Lu iĕm juăt kơ jang tơdrong jang kiơ?

³⁴ Athei khan tơbăt: Lu đĭch đam ih păng yă 'bok nhôn juăt kơ bơ̆jang wei sem dơrong iŏk đơ̆ng 'lơ̆p sơ̆ khơ̆ dang ei. Noh wă kơ iĕm oei tơ tơring Gôsen, yua kơ kon pơlei Êyiptơ, tơdrong arih lu sư ngăl lăng lu bơngai wei triu 'brơ̆ krưp dêh.