Bl 41 - Sơ̆p Hlabơar Nơ̆r 'Bok Kei-Dei

Jôsep tơblang tơdrong Pharaôn apo

¹ 'Bar sơnăm đơ̆ng rŏng Pharaôn apo 'bôh sư oei ngôi 'bơ̆t cheng đak krong Nil.a

² 'Nâu đơ̆ng đak krong Nil sư 'bôh tơpơh tŏ rơmo bek 'lơ̆ng, oei sa 'nhĕt sip cheng đak krong Nil.

³ Đơ̆ng noh đei tơpơh tŏ rơmo đơ̆ng nai dơ̆ng, kơnê̆ hơkĕ hơkong, lĕch đơ̆ng đak krong ei đơ̆ng rŏng, na kư̆m dơ̆ng hơdai jê̆ lu rơmo adrol noh cheng krong ei.

⁴ Tơpơh tŏ rơmo hơkĕ hơkong kơnê̆ noh, luăn đĭ tơpơh tŏ rơmo bek 'lơ̆ng, đơ̆ng noh Pharaôn hơđơ̆r hĭ.

⁵ Pharaôn sư tep dơ̆ng, sư apo 'bôh mă 'bar dơ̆ng, 'bôh tơpơh tŏ hơie 'ba akâu 'lơ̆ng, chăt hơdai lăm minh hơdong.

⁶ Đơ̆ng rŏng kơ noh, tơpơh hơie 'ba bo păng kial đơ̆ng hơlĕch tơthu, chăt kiơ̆ tơpơh hơie 'ba adrol noh.

⁷ Tơpơh hơie 'ba bo luăn đĭ tơpơh hơie 'ba akâu. Pharaôn sư hơđơ̆r hloi; păng băt âu tơdrong apo 'bôh.

⁸ Pơgê dơning, jơhngơ̆m sư hiơ̆k bơngơ̆t, na athei krao lu bơngai hơgei, lu bơngai juăt kơ tơblang lăm dêh Êyiptơ năm tơ sư, na pơtao roi dôm tơdrong sư apo 'bôh noh lu sư mơ̆ng, mă-lei ưh kơ đei bu gơh tơblang ăn tơdrong apo noh kơ pơtao.

⁹ Bơngai mă jang lăng hơmet đak nhă khan kơ Pharaôn thoi âu: Dang ei inh 'blŏk kơ tơdrong yoch inh.

¹⁰ Adrol ki sơ̆, ih blĕk hil kơ nhi bơngai pơm 'bĕng păng tah nhi lăm hnam phak lăm anih noh bơngai kuan wei-lăng anih noh.

¹¹ Lăm minh măng ei, nhi kư̆m đei tep apo, nhi apo 'bôh, tơdrong nhi apo ei wă khan đei tơdrong truh phara băl.

¹² Tơ noh kư̆m đei minh 'nu tơdăm bơngai Hêbrơ kư̆m phak hơdai nhi, sư đam 'bok wei-lăng hnam bơnă, nhi roi ăn kơ sư dôm tơdrong nhi apo, na sư tơblang ăn kơ nhi tơdrong apo noh wă khan kiơ truh kơdih kơdih.

¹³ Na, dôm tơdrong ei trŏ 'blep thoi sư đei tơblang: Pơtao ăn kơ inh jang thoi đêl, bơngai mă pơm 'bĕng noh pơtao atol pơlôch sư.

¹⁴ Pharaôn athei krao hloi Jôsep; lu sư plôh tơlĕch hloi Jôsep đơ̆ng hnam phak, sư hơkôih sŏk kang tơplih hơbĕn ao tai sư, na năm 'bơ̆t anăp Pharaôn.

¹⁵ Pharaôn khan kơ Jôsep thoi âu: Inh đei tep apo 'bôh mă-lei ưh kơ đei bu gơh tơblang; thoi noh, inh đei kơtơ̆ng đơ̆ng đe khan, đe đei apo 'bôh na roi kơ ih, ih đei tơblang ăn trŏ 'blep.

¹⁶ Jôsep drơ̆ng: Noh ưh kơ đơ̆ng inh, mă-lei đơ̆ng Kră Yang 'Bok Kei-Dei ăn tơdrong tơblang hiôk-hian kơ pơtao.

¹⁷ Pharaôn khan: Tơdrong apo 'bôh ei thoi âu: Inh oei ngôi 'bơ̆t cheng đak krong Nil.

¹⁸ 'Nâu inh 'bôh tơpơh tŏ rơmo tih bek 'lơ̆ng lĕch đơ̆ng đak krong, năm sa 'nhĕt sip 'bơ̆t cheng đak.

¹⁹ Đơ̆ng noh inh 'bôh tơpơh tŏ rơmo hơkĕ hơkong kơnê̆ kư̆m lĕch kiơ̆ đơ̆ng rŏng inh kư̆m tam mă biơh 'bôh rơmo hơkĕ dêh thoi ei lăm char Êyiptơ âu.

²⁰ Tơpơh tŏ rơmo hơkĕ hơkong luăn pơđĭ lê̆ lu tơpơh tŏ lu rơmo bek lĕch adrol noh.

²¹ Luăn đĭ tơ lăm klak, mă-lei lăng thoi ưh kơ đei luăn yua kơ rơmo hơkĕ oei hơkĕ thoi đêl.

²² Na inh hơđơ̆r hĭ, đơ̆ng rŏng kơ noh inh tep apo 'bôh dơ̆ng, noh tơpơh hơie 'ba akâu 'lơ̆ng chăt hơdai lăm minh hơdong.

²³ Đơ̆ng rŏng kơ noh, 'bôh đei tơpơh hơie 'ba kro bo, yua kơ đơ̆ng kial gah hơlĕch tơthu, kư̆m chăt lĕch hơdai tơnơm 'ba adrol noh.

²⁴ Na tơpơh hơie 'ba bo noh luăn pơđĭ lê̆ tơpơh hơie 'ba akâu noh. Inh đei roi boih kơ lu bơngai hơgei juăt kơ tơblang ră, mă-lei ưh kơ đei bu gơh tơblang.

²⁵ Jôsep tơl Pharaôn thoi âu: 'Bar tơdrong apo mă 'bok pơtao 'bôh wă tơbăt lăm minh tơdrong đĕch, Kră Yang 'Bok Kei-Dei tơbăt ăn kơ pơtao adrol kơ tơdrong wă jê̆ truh.

²⁶ Tơpơh tŏ rơmo bek 'lơ̆ng noh, wă khan tơpơh sơnăm; tơpơh 'ba bo noh wă khan tơpơh sơnăm; tơdrong apo 'bôh noh sư wă tơbăt kơ minh đĕch.

²⁷ Tơpơh tŏ rơmo hơkĕ hơkong kơnê̆ mă lĕch đơ̆ng rŏng rơmo bek noh, wă khan tơpơh sơnăm; păng tơpơh hơie 'ba bo đơ̆ng kial tơthu noh wă khan tơpơh sơnăm pơngot rơwĕt.

²⁸ Noh mă inh đei roi kơ 'bok pơtao boih; Kră Yang 'Bok Kei-Dei roi tơbăt kơ 'bok pơtao, Sư gô pơm.

²⁹ Âu, lăm jơ̆p-jang kơ dêh char Êyiptơ gô đei tơpơh sơnăm phĭ rơkah rơkai.

³⁰ Mă-lei đơ̆ng rŏng kơ tơpơh sơnăm sŏng sa noh gô đei tơpơh sơnăm pơngot rơwĕt, kon tơring tơrang gô hiơt kơ đei 'ba rơkah rơkai păng pơngot rơwĕt gô pơm ăn kơ jơ̆p teh đak răm rai.

³¹ Păng tơdrong pơngot rơwĕt âu tih dêh, na kon tơring tơrang pă 'blŏk boih lăm sơnăm đei 'ba rơkah rơkai.

³² 'Bar wơ̆t pơtao apo, 'noh Kră Yang 'Bok Kei-Dei wă pơsĭt Sư gô pơm tơpă păng Sư kư̆m wă ăn jah truh ngei.

³³ Dang ei pơtao athei jah chă minh 'nu bơngai hơgei đei đon hlôh wao, jao ăn kơ sư pơm yŏng pơm kơ̆l lăm dêh char Êyiptơ âu.

³⁴ Kŭm chă lu wei-lăng tơring, tơgŭm chă ra mong minh lăm pơđăm, lăm tơpơh sơnăm đei 'ba rơkah rơkai ei.

³⁵ Lu sư chă ra tơgop đĭ phe 'ba lăm tơpơh sơnăm phĭ rơkah rơkai tơ anăp ei, mong ăn kơ pơtao Pharaôn 'ba, 'măn tơ pơk sư lăm rim pơlei păng jao ăn kơ lu sư wei-lăng.

³⁶ Lu tơmam sa phe 'ba wă 'măn lê̆ kơ tơpơh sơnăm pơngot rơwĕt wă truh tơ dêh char Êyiptơ, wă kơ char âu huay kơ đei bơngai lôch kơ pơngot rơwĕt noh.

Pôk Jôsep pơm tih.

³⁷ Dôm nơ̆r âu Pharaôn hăm kuan tih lăp đon.

³⁸ Pharaôn khan kơ lu kuan tih thoi âu: Lu bơ̆n chă bơngai bu dơ̆ng gơh băt thoi bơngai 'nâu, đei jơhngơ̆m đon gơh hơgei đơ̆ng Kră Yang 'Bok Kei-Dei?

³⁹ Pharaôn pơma păng Jôsep khan: Yua kơ Kră Yang 'Bok Kei-Dei ăn boih kơ ih băt tơdrong âu, na pă đei bu hơgei hlôh wao thoi ih boih.

⁴⁰ Thoi noh, ih tŏk pơgơ̆r hnam pơtao; đĭ-đăng kon pơlei pơla pơtao gô chu yom kơ ih pơma. Inh tih hloh kơ ih tŏ sĕt yua kơ inh oei lăm tang-dŏ pơtao đĕch.

⁴¹ Pharaôn khan dơ̆ng kơ Jôsep thoi âu: Lăng bĕ! Âu inh pơjao ăn kơ ih pơgơ̆r đĭ lăm dêh char Êyiptơ.

⁴² Pơtao plôh hloi tơkhiĕn đơ̆ng ti sư tơ'bot ăn kơ Jôsep, athei đe pơhrŭk ăn kơ sư ao che rơmuăn păng tơ'băk ăn kon kiơng maih 'bơ̆t hơko sư;

⁴³ Na athei hao gre đơ̆ng rŏng kơ gre pơtao, đei bơngai yak adrol ôr khan thoi âu: Drap kơkuh bĕ! Âu đei jao kơ Jôsep wă pơgơ̆r đĭ dêh char Êyiptơ boih.

⁴⁴ Pharaôn khan kơ Jôsep thoi âu: Inh Pharaôn mă-lei dah ưh kơ đei nơ̆r ih lăm đĭ dêh char Êyiptơ ưh kơ đei bu gơh yơ̆r ti hiŏng jơ̆ng tơ kơpal.

⁴⁵ Pharaôn krao anăn Jôsep plơ̆ng noh Saphônat Panêahb rôp ăn adruh anăn Asơnat, kon adruh Pôtiphêra, 'bok soi tơm pơlei Ônc ăn kơ sư pơm akăn. Sư ngăl năm tơ jơ̆p lăm dêh char Êyiptơ.

⁴⁶ Jôsep pơtơm jang hăm Pharaôn, pơtao Êyiptơ, kơplah noh sư đei pêng-jĭt sơnăm boih. Thoi noh, sư đơ̆ng hnam pơtao Pharaôn sư chă năm dăr tơ jơ̆p kơ dêh char Êyiptơ.

⁴⁷ Lăm tơpơh sơnăm phĭ đei 'ba rơkah rơkai, teh pơjing chăt 'lơ̆ng 'bĕnh-'bang.

⁴⁸ Jôsep ra mong lê̆ lu phe 'ba tơ jơ̆p lăm dêh char Êyiptơ kơplah tơpơh sơnăm phĭ; lăm rim pơlei, kư̆m mong dôm phe 'ba đơ̆ng mir chŭn tăp dăr kơ pơlei noh.

⁴⁹ Thoi noh, Jôsep akŭm lê̆ 'ba mi lơlang lơlap, thoi pơlao chuơh cheng dơsĭ, dĭng mah đe pă kĕ jô̆, yua kơ lơ dêh.

Jôsep đei hơ'lơ̆p anăn Manase păng Êphraim

⁵⁰ Adrol kơ sơnăm pơngot rơwĕt truh, na Asơnat kon adruh Pôtiphêra, 'bok soi tơm pơlei Ôn, tơpŭ ăn kơ Jôsep 'bar 'nu kon drŏ-nglo.

⁵¹ Jôsep anăn kon mă kơdră sư Manased yua kơ khan: Kră Yang 'Bok Kei-Dei pơm ăn kơ inh đei hiơt đĭ dôm tơdrong gleh pơmat păng đĭ-đăng hnam dơnŏ 'bă inh.

⁵² Sư anăn kon mă 'bar noh Êphraime yua kơ khan: Kră Yang 'Bok Kei-Dei ăn kơ inh pŭn hiôk tih lăm dêh char mă inh pơmat-tat.

Tơdrong pơngot pơtơm truh

⁵³ Tơpơh sơnăm phĭ jơnap tơ Êyiptơ đĭ boih.

⁵⁴ Na truh boih kơ tơpơh sơnăm pơngot, trŏ 'blep thoi Jôsep đei tơblang noh. Tơ jơ̆p-jang kơ dêh char đei pơngot rơwĕt, mă-lei tơ lăm dêh char Êyiptơ oei đei tơmam sa.

⁵⁵ Đơ̆ng noh, jơ̆p lăm dêh char Êyiptơ kư̆m pơngot rơwĕt, kon pơlei năm tơ Pharaôn apinh tơmam sa. Pharaôn khan tơtă kơ kon pơlei thoi âu: Năm bĕ tơ Jôsep pơm kiơ̆ thoi sư athei.

⁵⁶ Kơplah jơ̆p-jang kơ dêh char Êyiptơ pơngot, na Jôsep pơih pơk na tĕch ăn 'ba kơ kon pơlei lăm dêh char Êyiptơ.

⁵⁷ Lăm char ei pơngot rai dêh, yua kơ jơ̆p-jang teh đak kư̆m dai pơngot rơwĕt tih, na mă đơ̆ng yơ yơ kư̆m năm răt 'ba đơ̆ng Jôsep tĕch.