Bl 39 - Sơ̆p Hlabơar Nơ̆r 'Bok Kei-Dei

Jôsep oei lăm char Êyiptơ

¹ Đe chĕp ba Jôsep tơ dêh char Êyiptơ, Kơna Pôtipha bơngai char ei, bơ̆jang pơm yŏng linh gak 'bok Pharaôna răt iŏk Jôsep đơ̆ng lu bơngai Ismael chông ba ei.

² Jôsep oei tơ lăm hnam dơnŏ tơ'ngla sư bơngai Êyiptơ đei Kră Yang tơgŭm, na jing tơdrong jang sư 'lơ̆ng đei yua.

³ Yŏng tơ'ngla sư 'bôh đei Kră Yang tơgŭm tôm tơdrong jang sư, na tơdrong jang sư pơm keh 'lơ̆ng ngăl.

⁴ Thoi noh Jôsep đei yŏng tơ'ngla sư lăp đon păng gơnang; yŏng sư jao kơ sư jang, wei-lăng mŭk măk lăm hnam dơnŏ, jao ăn đĭ-đăng mŭk tơmam kơ sư.

⁵ Đơ̆ng năr sư jao kơ Jôsep đĭ-đăng mŭk tơmam lăm hnam sư, na Kră Yang ăn hnam sư đei pŭn hiôk; yua kơ đơ̆ng Jôsep wei-lăng ei, Kră Yang kư̆m ăn pŭn kơ rim mŭk tơmam sư đei noh mơ̆n, mă khan tơmam lăm hnam dah tơ lăm mir chŭn.

⁶ Yŏng tơ'ngla sư jao đĭ-đăng mŭk tơmam sư kơ Jôsep wei-lăng, sư ưh pă hiơ̆k kơ mŭk tơmam noh boih, pă pôm tơdrong sŏng sa sư kơdih. Jôsep bơngai 'lơ̆ng hơbŏ, muh măt rơhau iơ̆m dim.

Jôsep đe phak

⁷ Đunh 'biơ̆ đơ̆ng rŏng kơ pơjao ei, akăn yŏng tơ'ngla sư lăng tơ Jôsep na khan: Năm tơ âu na 'bĭch hăm inh.

⁸ Jôsep sơngah păng sư khan thoi âu: Yŏng tơ'ngla inh pơjao ăn kơ inh đĭ-đăng mŭk tơmam sư păng lăng âu, yŏng tơ'ngla inh pă đei tơtăm kơ kiơ boih lăm tơdrong jang.

⁹ Lăm hnam 'nâu ưh kơ đei bu tih hloh kơ inh păng kư̆m ưh kơ pơkơ̆m inh tơdrong kiơ, mă-lei gah ih, ưh kơ gơh ôh, yua kơ ih akăn yŏng tơ'ngla inh. Thoi yơ inh gơh pơm tơdrong kơnê̆ 'mê̆-'mach dêh thoi noh, na kư̆m pơm yoch păng Kră Yang 'Bok Kei-Dei mơ̆n.

¹⁰ Mă khan rim năr akăn yŏng tơ'ngla sư hrăn kơ pơhlŭ ră, mă-lei Jôsep ưh kơ đei chu nơ̆r noh, ưh kơ 'bĭch hơdai dah oei hăm sư tŏ sĕt.

¹¹ Lăm minh năr ei Jôsep mơ̆t tơ hnam wă bơ̆jang; kơplah noh lăm hnam kơbĭ bu oei hnam.

¹² Na yă ei rôp ao Jôsep păng khan: Năm 'bĭch hăm inh! Mă-lei Jôsep plôh achăng lê̆ ao sư tơ ti yă ei na Jôsep kơdâu lĕch tơ 'nguaih.

¹³ Kơplah noh yă ei 'bôh ao Jôsep oei tơ lăm ti sư, Jôsep kơdâu lĕch tơ 'nguaih boih.

¹⁴ Na sư krao lu bơngai awih awăn kơ sư păng khan: Iĕm lăng! Hơiă dêh đe âu iŏk minh 'nu tơdăm bơngai Hêbrơ oei tơ âu na sư pơ'brơh, năm jê̆ tơ inh na 'maih 'bĭch hăm inh, mă-lei inh ôr.

¹⁵ Wă inh ôr sư plôh. Achăng lê̆ ao sư tơ âu, na kơdâu klĕnh tơ 'nguaih.

¹⁶ Na yă ei lê̆ hloi ao Jôsep 'bơ̆t cheng sư dĭng 'bôh yŏng tơ'ngla Jôsep brŏk.

¹⁷ Roi ăn kơ yŏng tơ'ngla Jôsep lei-lăi thoi sư roi adrol hei; bơngai Hêbrơ mă đĭch bơ̆n ih răt ba tơ âu, hei sư năm tơ inh;

¹⁸ Mă-lei wă inh ôr krao na sư plôh achăng lê̆ ao sư 'bơ̆t inh âu, na kơdâu klĕnh tơ nai.

¹⁹ Lăp yŏng tơ'ngla sư kơtơ̆ng nơ̆r akăn sư roi khan, đĭch ih pơm thoi âu, na sư blĕk 'brê kơ măt.

²⁰ Na rôp hloi Jôsep tah hloi lăm hnam phak, tơ anih mă phak lu bơngai pơm yoch hăm 'bok pơtao. Thoi noh Jôsep oei lăm hnam phak.

²¹ Kră Yang tơgŭm Jôsep păng 'mêm kơ sư ưh kơ tơplih, ăn yŏng wei-lăng hnam bơnă oei 'mêm kơ sư.

²² Yŏng hnam phak jao đĭ-đăng lu bơnă kơ Jôsep, ưh kơ đei tơdrong jang kiơ mă ưh kơ đơ̆ng Jôsep ăn 'mơ̆i.

²³ Yŏng wei hnam phak ưh pă đei jang kiơ boih, lê̆ kơ Jôsep ngăl, yua kơ Kră Yang tơgŭm sư, mă tôm tơdrong jang kiơ đơ̆ng sư pơm tă kơ jing ngăl.