Bl 31 - Sơ̆p Hlabơar Nơ̆r 'Bok Kei-Dei

Jakôp wih brŏk tơ Kanaan

¹ Jakôp sư kơtơ̆ng lu kon La'ban đei pơma thoi âu: Jakôp iŏk đĭ mŭk tơmam 'bă bơ̆n păng yua kơ đơ̆ng mŭk măk 'bă bơ̆n, na mă đei mơdrŏng dêh thoi noh.

² Jakôp kư̆m lăng muh măt mih sư, sư băt hloi mih sư pă gan hiôk thoi sơ̆ boih.

³ Kră Yang khan kơ Jakôp thoi âu: Brŏk bĕ tơ dêh char 'bok yă 'bă ih, tơ 'nhŏng oh ih, inh gô tơgŭm ih.

⁴ Jakôp wơh bơngai năm krao Rachel hăm Lêa năm tơ anih sư oei wei sem dơrong sư tơ bri.

⁵ Păng khan kơ măr sư thoi âu: Inh 'bôh muh măt 'bă măr iĕm ưh pă gan hiôk hăm inh thoi sơ̆ boih, mă-lei Kră Yang 'Bok Kei-Dei, 'bă inh tơgŭm inh.

⁶ Tơpă măr iĕm kư̆m băt boih inh đei bơ̆jang tơgŭm 'bă iĕm đĭ jơhngơ̆m.

⁷ Gah 'bă măr iĕm ưh kơ lăp, na pơdê inh păng tơplih đei hloh kơ mơjĭt wơ̆t gah mă apah inh jang; mă-lei Kră Yang 'Bok Kei-Dei ưh kơ ăn sư pơrăm inh tŏ sĕt.

⁸ Wă 'bă iĕm khan: Dôm lu triu 'brông noh pơm tơmam apah kon, lu triu tuh kon 'brông, mưh sư khan: Lu triu ưh kơ đei sŏk 'brông hơglŭk hơglăk lu triu tuh kon thoi noh.

⁹ Thoi noh, Kră Yang 'Bok Kei-Dei iŏk triu đơ̆ng 'bă lu iĕm na ăn kơ inh.

¹⁰ Tơdrong truh thoi âu: Wă lu triu tơno kiơ̆ akăn, inh tep apo 'bôh lu triu tơno kiơ̆ akăn lăm khŭl noh tă kơ lu triu tơno brông păng đei sŏk brông, hơglŭk hơglăk ngăl.

¹¹ Linh jang Kră Yang 'Bok Kei-Dei khan kơ inh lăm inh apo thoi âu: Ơ Jakôp! Inh tơl: Đei inh tơ âu:

¹² Linh jang khan: Ngơk lăng tơ to: Đĭ-đăng lu triu tơ noh oei kiơ̆ akăn mă đei tuh kon tă kơ đei sŏk bring brông ngăl păng hơglŭk hơglăk; yua kơ inh 'bôh boih La'ban pơm kơ ih.

¹³ Inh âu boih mă Kră Yang 'Bok Kei-Dei tơ'bôh kơ ih tơ Bethel, anih mă ih đei pik đak rơmă 'bơ̆t jrăng păng đei krao apinh Inh. Dang ei, iung bĕ, lĕch đơ̆ng char âu na wih brŏk tơ tơring char 'nhŏng oh ih.

¹⁴ Rachel păng Lêa tơl sư thoi âu: Lu nhôn hăm pă đei tơmam kiơ mŭk drăm kiơ dơ̆ng lăm hnam 'bă nhôn kih?

¹⁵ Yua kơ sư đei tĕch păng rôp nhôn oei kơ ih, đơ̆ng noh sư sa pơđĭ lê̆ jên tơmam đêl tĕch noh, lei hăm trŏ sư lăng nhôn thoi bơngai chă oei sa tơ sư đĕch?

¹⁶ Mŭk tơmam mă Kră Yang 'Bok Kei-Dei iŏk đơ̆ng ti 'bă nhôn, tơmam lu nhôn hăm lu kon nhôn. Na dang ei ih pơm kiơ̆ bĕ nơ̆r Kră Yang 'Bok Kei-Dei đei bơtho khan.

¹⁷ Jakôp iung hloi, hiŏng pôk kon akăn sư hơtŏk tơ kơdŭ aseh lăk-đa.

¹⁸ Sư puh ba đĭ lu sem dơrong păng iŏk đĭ mŭk tơmam sư, mă dôm mŭk tơmam đêl sư jang sa tơ Phadan Aram, wă kơ brŏk tơ Isăk, 'bă sư tơ Kanaan.

¹⁹ Kơplah La'ban oei năm yuă sŏk lu triu sư, na Rachel năm iŏk tơtông lu rup yang lăm hnam 'bă sư.

²⁰ Jakôp hơlĕnh kơ La'ban, yua kơ ưh kơ roi, sư wă kơdâu klĕnh.

²¹ Thoi noh na sư iung chĕp ba đĭ dôm mŭk măk tơmam sư, klĕnh yak tơpăt găn đak krong Ơphrat truh tơ kông groi tơring Gileat.

La'ban druh 'moi Jakôp

²² Truh năr mă pêng, đe roi tơbăt kơ La'ban khan Jakôp kơdâu klĕnh boih.

²³ La'ban pơtơm lu 'nhŏng oh sư druh Jakôp lăm tơpơh năr kơ trong păng tam hĭ 'bơ̆t kông tơring Gileat.

²⁴ Mă-lei lăm măng sư tep apo, Kră Yang 'Bok Kei-Dei khan kơ La'ban bơngai Aram thoi âu: Mă 'lơ̆ng dah kơnê̆ ih wei akâu ih 'nĕ pơma kơ Jakôp hŏ?

²⁵ Thoi noh La'ban druh tam Jakôp oei pơm bơsŭn sư tơ kơpal kông groi Gileat.

²⁶ La'ban khan kơ Jakôp thoi âu: Mon pơm kiơ thoi noh? Ih đei hơlĕnh kơ mih chông pơđĭ lu kon drŏ-kăn mih thoi bơnă.

²⁷ Kơdâu klĕnh kơ kiơ, hơlĕnh ưh kơ roi kơ inh adrol? Ăn ưh, Inh năm ba hiôk-hian, reh brŏ hơri teh hơgơ̆r 'mơ̆i.

²⁸ Na 'nâu ih tă tơ pơm kơtul dêh thoi noh, pă ăn inh chă chŭm hơ-on lu sâu drŏ-nglo drŏ-kăn mih.

²⁹ Ti inh gơh wă pơrăm ih; mă-lei Kră Yang 'Bok Kei-Dei 'bă ih đei khan kơ inh măng hei thoi âu: Mă 'lơ̆ng, mă kơnê̆, ih wei akâu ih 'nĕ pơma kơ Jakôp hŏ?

³⁰ Dang ei, yua kơ jơhngơ̆m ih 'maih brŏk dêh tơ 'bă ih, na mă năm boih 'nâu, mă-lei yua kơ kiơ tơtông ba lu rup yang?

³¹ Jakôp tơl thoi âu: Yua kơ inh hli kơ mih rôp pơgơ̆t lê̆ bre kon drŏ-kăn mih.

³² Mă-lei chă lăng rup man noh tơ bu bơngai noh mih pơlôch hĭ! 'Bơ̆t tơm măt lu 'nhŏng oh bơ̆n, ih chă lăng lăm tơmam inh păng dah tơmam ih kiơ lăm noh ih kư̆ iŏk bĕ? Na Jakôp sư ưh kơ băt kơ Rachel iŏk rup yang mih sư noh.

³³ Thoi noh La'ban mơ̆t tơ lăm bơsŭn Jakôp, bơsŭn Lêa, bơsŭn bre 'bar 'nu đam sư ưh kơ đei 'bôh kiơ. Đơ̆ng bơsŭn Lêa năm mơ̆t tơ lăm bơsŭn Rachel.

³⁴ Na, Rachel đei iŏk dôm lu rup man noh, ôn lăm an lăk-đa, na sư hơ-oei kơtĭt kơpal. La'ban chă pơih jơ̆p lăm anih ưh kơ 'bôh rup yang.

³⁵ Rachel khan kơ 'bă sư thoi âu: Yua kơ lăm kon đei tơdrong lu drŏ-kăn, na ưh kơ gơh iung sơng 'bă. Apinh yŏng tơ'ngla 'nĕ kơ hil kơ kon. Sư chă ưh kơ đei 'bôh rup yang tơ yơ.

³⁶ Jakôp sư blĕk na hil kơ La'ban: Inh đei yoch kiơ na mă ih hrăn nŏng druh inh thoi noh!

³⁷ Ih đei pơih boih dôm tơmam lăm kơdŭng inh, hăm đei 'bôh tơmam kiơ gah ih iŏk tơlĕch 'bơ̆t anăp lu 'nhŏng oh bơ̆n lăng, wă kơ sư sek tơlang păng jao inh kơ ih.

³⁸ Lăng deh đei 'bar-jĭt sơnăm boih inh oei hơdai lăm hnam ih, triu, bơbe, ih hăm huach păng inh ưh tam layơ sa 'nhĕm bơbe dah triu tơno 'mơ̆i.

³⁹ Kŭm ưh tam biơh chĕp ba kơ ih triu ayơ đơ̆ng sem bri hek sa; dah đei, lê̆ kơdih inh 'mong kơ ih. Ih kư̆ hrăn khan ling-lang athei inh 'mong kơ đêl đe tơtông kơ'năr dah kơmăng.

⁴⁰ Kơ'năr inh tŏ sa, kơmăng inh găng tơngiĕt, tep kư̆m ưh kơsŭk.

⁴¹ Noh lăm 'bar-jĭt sơnăm oei lăm hnam ih, mơjĭt-puăn sơnăm tơgŭm jang wă kơ đei oei kơ bre kon adruh ih păng tơdrâu sơnăm wă kơ đei lu sem dơrong đơ̆ng ih, mă-lei ih kư̆m oei đei đon tơplih mơjĭt wơ̆t wă ăn apah inh.

⁴² Tơdah Kră Yang 'Bok Kei-Dei 'bă inh, Isăk Kră Yang 'Bok Kei-Dei 'bok inh Abraham, mă hli yom, ưh kơ tơgŭm yŏng inh, băt dang ei ih pơpuh tơbrŏk inh tơ noh. Kră Yang 'Bok Kei-Dei đei 'bôh boih tơdrong jang inh pơmat-tat đơ̆ng ti chă pơjing, lei na măng hei ih 'bôh boih sư sek tơlang tơpăt thoi noh.

⁴³ La'ban tơl Jakôp thoi âu: Lu drŏ-kăn âu kon inh, lu kon hơ'lơ̆p âu sâu inh, dôm lu sem dơrong noh kư̆m sem dơrong inh păng ih lăng đĭ tơmam âu, đơ̆ng inh ngăl; mă-lei năr âu inh wă pơm kiơ kơ lu kon drŏ-kăn inh lu sâu inh noh?

⁴⁴ Âu, dang ei, bĕ! Lu bơ̆n pơma pơkăm pơkă băl, wă pơsĭt kơ ba, mih hăm mon.

Jakôp hăm La'ban pơma pơkăm băl

⁴⁵ Jakôp iŏk minh pôm tơmo, pơdơ̆ng wă pơm tơdra;

⁴⁶ Păng khan kơ lu 'nhŏng oh sư thoi âu: Dônh lu tơmo pơpôi tơ âu: Lu sư dônh pơpôi, jing minh pôi hơlôk, đơ̆ng noh lu sư hơ-oei sŏng sa cheng pôi ei.

⁴⁷ La'ban anăn pôi tơmo noh Jêgar Sahaduta,a Jêgar Sahaduta kiơ̆ kơ nơ̆r Aram khan pôi tơmo sĭt Galet kiơ̆ kơ nơ̆r Hêbrơ wă khan pôi tơmo sĭt gah Jakôp krao anăn Galet b

⁴⁸ La'ban khan thoi âu: Pôi tơmo âu wă pơsĭt kơ ba. Thoi noh lu sư krao anăn Galet.

⁴⁹ Kŭm đei krao Misbac yua kơ La'ban pơma thim thoi âu: Kơplah lu bơ̆n wă tơklah băl, apinh Kră Yang wei-lăng ih hăm inh.

⁵⁰ Dah ih pơjuă pơđep lu kon drŏ-kăn inh păng dah chă akăn plơ̆ng dơ̆ng, athei kơchăng bĕ! Ưh kơ trŏ kon bơngai hmă đĕch ôh sek tơlang kơ bơ̆n mă-lei Kră Yang 'Bok Kei-Dei 'mơ̆i pơm kơdranh kơ ba.

⁵¹ La'ban khan dơ̆ng kơ Jakôp thoi âu: 'Nâu pôi tơmo, 'nâu jrăng tơm mă ih đei pơdơ̆ng 'bơ̆t tơm măt ba âu.

⁵² Pôi tơmo 'nâu păng jrăng 'nâu wă pơm kơdranh thoi âu: Inh ưh kơ gơh yak hloh kơ tơmo âu, wă năm tơ ih, ih kư̆m ưh kơ gơh yak hloh kơ tơmo âu wă truh tơ inh, dah đei tơdrong wă pơrăm băl.

⁵³ Apinh Kră Yang 'Bok Kei-Dei Abraham, Kră Yang 'Bok Kei-Dei Nahôr, Kră Yang 'Bok Kei-Dei 'bă lu sư noh sek tơlang kơ bơ̆n! Jakôp pơkăm hăm anăn Kră Yang Isăk, 'bă sư, na sư pơkă hăm jơhngơ̆m hli yom.

⁵⁴ Đơ̆ng noh, lu sư pơyơ̆r tơmam soi kơpal kông păng pơtơm lu 'nhŏng oh sư sŏng sa. Thoi noh lu sư sŏng sa păng tep hloi kơpal kông noh minh măng.

⁵⁵ La'ban iung đơ̆ng hrôih, chŭm lu kon drŏ-kăn, lu sâu sư păng sơkat khan thŭ đei pŭn hiôk kơ iĕm, đơ̆ng noh sư wih brŏk tơ hnam sư dơ̆ng.