Bl 20 - Sơ̆p Hlabơar Nơ̆r 'Bok Kei-Dei

Abraham păng pơtao Abimêlek

¹ Abraham yak đơ̆ng noh truh tơ gah gơal, oei tơ tơring Nêgeo oei sơlam char Kêdê păng Sur. Đơ̆ng noh sư oei tơ tơring Gêrar.

² Abraham roi kơ đe gah akăn sư: “Sư âu oh drŏ-kăn inh.” Abimêlek, pơtao Gêrar, wơh bơngai năm krao iŏk Sara.

³ Mă-lei kiơ̆ kơmăng, pơtao Abimêlek apo 'bôh Kră Yang 'Bok Kei-Dei khan kơ sư, “âu, ih gô lôch yua kơ bơngai drŏ-kăn mă ih rôp iŏk noh, yua kơ sư đei klo boih.”

⁴ Na, pơtao Abimêlek kư̆m tam mă jê̆ bơngai drŏ-kăn noh ôh, na sư tơl: “Ơ Kră Yang, ih hăm trŏ wă pơlôch đĭ lu kon pơlei tơpăt hai?

⁵ Hăm trŏ sư đei khan kơ inh thoi âu: ‘Noh oh drŏ-kăn inh.’ Păng akăn sư khan: ‘Noh 'nhŏng inh?’ Inh pơm tơdrong âu hăm jơhngơ̆m tơpăt păng ti rơgoh.”

⁶ Lăm sư apo 'bôh, Kră Yang 'Bok Kei-Dei khan dơ̆ng thoi âu: “Inh kư̆m băt kơ ih yua kơ jơhngơ̆m tơpăt na pơm tơdrong noh; yua kơ thoi ei, na Inh găn ih hli kơ ih pơm yoch păng Inh; Inh ưh kơ wă kơ ih hơtŭt 'bơm bơngai noh.

⁷ Dang ei pơdrâu bĕ drŏ-kăn noh kơ klo sư, yua kơ klo sư bơngai khan lê̆ adrol, sư gô krao khan kơ ih na ih gô arih. Dah ưh kơ pơdrâu, ih athei băt ih hăm lu bơngai oei hơdai ih sĭt gô lôch.”

⁸ Pơtao Abimêlek iung đơ̆ng hrôih, krao lu đam sư, roi kơ lu sư dôm tơdrong noh, na lu sư mơ̆ng hlĭch dêh.

⁹ Đơ̆ng noh pơtao Abimêlek krao Abraham păng khan: “Ih pơm kiơ kơ inh thoi noh? Inh hăm đei pơm kiơ kơ ih ưh kơ hiôk mă ih đei pơm kơ inh păng đĭ lăm char inh đei yoch tih thoi noh? Ih pơm kơ inh mă đe ưh kơ biơh ôh kơ pơm.”

¹⁰ Pơtao Abimêlek khan dơ̆ng kơ Abraham: “Thoi yơ ih pơm thoi âu?”

¹¹ Abraham tơl: “Inh tơchĕng lăm dêh char âu ưh kơ đei bu băt hli yom kơ Kră Yang 'Bok Kei-Dei; na lu sư gô pơlôch inh, yua kơ 'ngeng kơ akăn inh.

¹² Mă-lei tơpă sư noh kư̆m oh drŏ-kăn inh, nhi minh pôm 'bă, mĕ phara păng inh iŏk sư pơm akăn.

¹³ Kơplah Kră Yang 'Bok Kei-Dei ăn kơ inh weh tơklah đơ̆ng hnam dơnŏ 'bă inh, na inh kư̆m khan kơ sư thoi âu: ‘Âu đơ̆ng ih na inh gơh hiôk mă tơ rim anih tơ yơ bơ̆n truh, athei khan: “Noh 'nhŏng inh.” ’ ”

¹⁴ Đơ̆ng noh, pơtao Abimêlek anhăk triu păng rơmo, đĭch drŏ-nglo, đam drŏ-kăn ăn kơ Abraham păng pơdrâu Sara akăn sư.

¹⁵ Pơtao Abimêlek khan: “Âu, dêh char inh asong ih oei, ih wă oei tơ yơ ih kư̆ oei tơ noh.”

¹⁶ Na pơtao kư̆m khan kơ Sara: “Inh ăn kơ ih minh-rơbâu hlak jên hu âu; kơsô̆ jên âu yua thoi minh hlak che pĕng 'bơ̆t anăp ih wă kơ đe huay kơ khan dôm tơdrong mă đei truh boih kơ ih; păng đe gô lăng ih thoi minh 'nu bơngai 'lơ̆ng tơpăt.”

¹⁷ Abraham krao apinh Kră Yang 'Bok Kei-Dei, na sư pơklaih ăn tơdrong jĭ pơtao Abimêlek, akăn sư hăm lu đam sư, thoi noh na đĭ-đăng lu sư đei hơ'lơ̆p ngăl dơ̆ng.

¹⁸ Adrol kơ noh ki, yua kơ tơdrong Sara, akăn Abraham, Kră Yang pơm ăn kơ hnam dơnŏ Abimêlek tă kơ hơwŏng ngăl.