Bl 16 - Sơ̆p Hlabơar Nơ̆r 'Bok Kei-Dei

Duch Hagar, tơpŭ kơ Ismael

¹ Âu, Sarai, akăn Abram, ưh kơ đei hơ'lơ̆p; sư đei minh 'nu đam drŏ-kăn bơngai Êyiptơ, anăn Hagar.

² Sarai khan kơ Abram thoi âu: “'Nâu, Kră Yang pơm kơ inh hơwŏng hơwŏ, na apinh ih oei hơdai hăm đam inh, rŏ lăng sư gô đei kon na kon noh dang kon inh.” Abram chu hloi nơ̆r Sarai athei.

³ Đơ̆ng rŏng kơ Abram oei tơ dêh Kanaan mơjĭt sơnăm, Sarai, akăn sư, rôp Hagar đam sư bơngai Êyiptơ, ăn kơ klo sư oei.

⁴ Sư oei hăm đam akăn sư na đam sư anăp. Kơplah đam sư băt kơ akâu kơdih sư anăp boih sư areh kơ yă yŏng tơ'ngla sư.

⁵ Sarai khan kơ Abram thoi âu: “Tơdrong mă inh chu iŏk mơlâu mak-ai kơ ih. Inh đei jao boih đam drŏ-kăn inh kơ ih, na dang ei sư 'bôh sư anăp boih, na sư areh kơ inh. Apinh Kră Yang sek tơlang kơ ba.”

⁶ Abram tơl Sarai thoi âu: “Âu, đam drŏ-kăn noh lăm tơpang ti ih, wă sek thoi yơ, mơ̆ng kơ ih lăp đon.” Na Sarai pơm kơnê̆ kơ Hagar, na Hagar kơdâu jăk đơ̆ng sư.

⁷ Mă-lei linh Jang 'lơ̆ng Kră Yang 'bôh Hagar tơ lăm char glă tu đak 'bơ̆t cheng trong năm tơ char Sur.

⁸ Na jet: “Hagar đam Sarai, ih đơ̆ng yơ?” Hagar tơl: “Inh weh đơ̆ng muh măt Sarai, yŏng tơ'ngla inh.”

⁹ Linh jang 'lơ̆ng Kră Yang bơtho khan kơ sư thoi âu: “Ih athei brŏk tơ yŏng tơ'ngla ih păng chu yom sư.”

¹⁰ Linh jang 'lơ̆ng Kră Yang khan dơ̆ng: “Kră Yang gô ăn kơ adrĕch adrung ih jing rai lơ, lơlap lơlang dĭng pă kĕ jô̆ dơ̆ng.”

¹¹ Na khan dơ̆ng. “'Nâu, ih oei anăp, ih gô tơpŭ kơ minh 'nu kon drŏ-nglo, ih gô krao anăn sư Ismael, a yua kơ Kră Yang đei kơtơ̆ng tơdrong ih ơh sơ'ngon.

¹² Kon hơ'lơ̆p noh gô thoi aseh bri; tơpang ti sư gô iung blah khŭl đe nai, đe nai kư̆m gô blah sư, sư gô oei ayăt kơ lu 'nhŏng oh sư.”

¹³ Hơgar anăn Kră Yang mă đei pơma hăm sư thoi âu: “Ih boih Kră Yang 'Bok Kei-Dei mă 'bôh inh,” yua kơ sư khan: “Inh 'bôh boih Kră Yang 'Bok Kei-Dei mă 'bôh inh.”

¹⁴ Yua kơ đơ̆ng noh đe anăn tu đak âu tu đak Lahairoib tu đak mă tŏk-bŏk Kalđê hăm Bêrê.

¹⁵ Đơ̆ng noh Hagar tơpŭ kơ minh 'nu kon drŏ-nglo, Abram anăn sư Ismael.

¹⁶ Âu dơ̆ng, đang kơ Hagar tơpŭ ăn kơ Abram. Ismael boih, kơplah noh Abram noh đei tơhngam-jĭt tơdrâu sơnăm.