Am 4 - Sơ̆p Hlabơar Nơ̆r 'Bok Kei-Dei

Tơdrong kon pơlei Isơrael ưh kơ tơbral

¹ Mơ̆ng bĕ ơ lu rơmo akăn dêh Basan, oei tơ kông Samari, iĕm pơjuă lu bơngai dơnuh, pơgŏ pơđep lu bơngai hoh kơ đei, khan kơ lu klo iĕm: Chĕp ba sik tơ âu, lu nhôn huch!

² Kră Yang mă 'lơ̆ng rơgoh sư pơkă pơsĭt boih khan: 'Nâu, lu năr wă truh kơ lu iĕm, đe gô wŏk lê̆ lu iĕm, truh tơ kon pơlei iĕm mă oei klaih đe gô wah iŏk.

³ Lu iĕm gô lĕch trong tơnăr pơchah, rim 'nu lĕch tơpăt anăp kơdih păng đe gô klơ̆m lê̆ lu iĕm tơ Harmôn, Kră Yang khan thoi noh.

⁴ Năm bĕ tơ pơlei Bethel, na pơm yoch; năm bĕ tơ pơlei Gilgal, na pơm yoch rai thim dơ̆ng! Rim pơgê chĕp ba bĕ tơmam soi lu iĕm păng kư̆ kơtĕch pêng năr pơyơ̆r minh lăm mơjĭt đơ̆ng tơmam lu iĕm!

⁵ Soh bĕ tơmam soi đei 'buih. Roi tơbăt dôm tơmam soi pơyơ̆r hăm jơhngơ̆m hiôk; roi pơư bĕ wă kơ bơngai lăm teh đak băt; Ơ kon sâu bơngai Isơrael, lu iĕm oei 'maih wă kơ pơm tơdrong noh, Kră Yang khan thoi noh.

⁶ Bê̆ gah inh, inh ăn boih pơngot rơwĕt tơ lăm rim pơlei lu iĕm păng pơm ăn tơpŭng sa ưh kơmah, tơ lăm rim anih lu iĕm oei. Mă-lei ră lu iĕm kư̆m ưh kơ wă wih brŏk tơ inh! Kră Yang khan thoi noh.

⁷ Inh kư̆m ưh kơ ăn đak 'mi jur tơ lu iĕm lăm pêng khei adrol kơ bơyan kĕch yuă inh ăn boih 'mi tơ pơlei tih 'nâu mă-lei ưh kơ ăn 'mi tơ pơlei tih nai. Chŭn âu đei 'mi boih, mă-lei mir to ưh kơ đei 'mi na jô kro đĭ.

⁸ Thoi noh, bơngai lăm 'bar pêng tŏ pơlei tih năm tơ minh pôm pơlei chă đak wă nhă, mă-lei nhă ưh kơ hrăp ôh. Mă-lei lu iĕm kư̆m ưh kơ wă wih brŏk tơ inh 'mơ̆i, Kră Yang khan thoi noh.

⁹ Inh yua boih kial tŏ păng hơdrông sa 'ba wă bơtho lu iĕm. Đei lơ mir pơgar 'nhot, pơgar hơmu, 'long hơra, 'long ôliwơ lu iĕm đĭ kơ lep sa pơgoh. Mă-lei lu iĕm kư̆m ưh kơ wă wih brŏk tơ Inh 'mơ̆i Kră Yang khan thoi noh.

¹⁰ Inh đei ăn boih tơdrong jĭ hơpoh truh tơ lu iĕm, kư̆m thoi inh ăn tơ lăm dêh Êyiptơ. Inh đei yua đao gưm pơlôch lu kon tơdăm iĕm boih păng lu aseh iĕm inh kư̆m puh pơđĭ. Inh đei ăn boih 'bâu ôm đơ̆ng lăm kơđông lu iĕm păr đông tơ muh lu iĕm. Mă-lei lu iĕm kư̆m ưh kơ wă wih brŏk tơ inh, Kră Yang khan thoi noh.

¹¹ Inh đei pơrăm boih mơ'nah lăm lu iĕm, thoi Kră Yang 'Bok Kei-Dei đei pơrăm pơlei Sôđôm păng Gômôrơ, lu iĕm nhen thoi kơ tôch ŭnh sa đe dui iŏk đơ̆ng ŭnh. Mă-lei lu iĕm kư̆m ưh kơ wă wih brŏk tơ inh, Kră Yang khan thoi noh.

¹² Ơ Isơrael, yua kơ thoi noh na 'nâu inh gô pơm kơ ih; Ơ Isơrael. Yua kơ inh gô pơm kơ ih thoi noh, na ih athei hơmet bĕ wă tơ'bơ̆p Kră Yang 'Bok Kei-Dei ih.

¹³ Tơpă, sư boih pơjing lu kông păng pơjing kial. Păng roi ăn kơ kon bơngai băt tơdrong sư tơchĕng; sư pơm kơ hơdah jing măng mu păng yak năm lăm anih kơjung hloh kơpal teh. Anăn sư Kră Yang 'Bok Kei-Dei Tih hloh.