Am 2 - Sơ̆p Hlabơar Nơ̆r 'Bok Kei-Dei

Nơ̆r khan lê̆ adrol gah tơdrong truh kơ Môap, Juđa păng Isơrael

¹ Kră Yang khan: Yua kơ đơ̆ng kon pơlei Môap pơm yoch rai hloh kơ adrol, thoi ei na inh ưh kơ lê̆ ôh wă phak lu sư; yua kơ sư đei soh boih kơting pơtao char Eđôm wă pơm chŭr.

² Inh gô ăn ŭnh truh tơ dêh Môap, sư gô sa lu kơđông kơjăp Kêriôt. Kon pơlei Môap gô lôch, kơplah đe ôr tơjrông tơjrang păng hlôm keng.

³ Inh gô pơrăm lê̆ lu 'bok sek tơlang lu sư păng pơlôch đĭ kră yŏng pơgơ̆r lu sư hơdai hăm sư, Kră Yang khan thoi noh.

⁴ Kră Yang khan: Yua kơ đơ̆ng kon pơlei Juđa rai pơm yoch hloh kơ adrol, na inh ưh kơ lê̆ ôh wă phak lu sư; Yua kơ lu sư achăng lê̆ boih khôi juăt Kră Yang păng ưh pă pơm kiơ̆ dôm nơ̆r Sư tơtă, dôm lu yang hơlĕnh pơdăr mă đơ̆ng 'bok yă lu sư kiơ̆, pơm kơ lu sư wơ̆l jrok.

⁵ Inh gô ăn ŭnh truh tơ dêh Juđa, sư gô sa pơđĭ dôm kơđông kơjăp Jêrusalem.

⁶ Kră Yang khan: Yua kơ đơ̆ng kon pơlei Isơrael rai pơm yoch hloh kơ adrol, na inh ưh kơ lê̆ ôh wă phak lu sư, yua kơ lu sư tĕch boih lu bơngai tơpăt yua kơ jên păng tĕch lu bơngai dơnuh hin yua kơ hơgrop chơkhŏ chuă.

⁷ Lu sư pơjuă lê̆ kơ̆l lu bơngai dơnuh hin tơ teh păng pơm kơ trong lu bơngai iơ̆m dim đŏng đĕo. 'Bă kon kư̆m ngôi kư̆ kă hăm minh 'nu drŏ-kăn, thoi noh pơm pơ'mê̆ kơ anăn 'lơ̆ng rơgoh Inh.

⁸ Lu sư 'bĭch jê̆ tơ chơnang soi, kơpal ao tai đe iŏk boih wă pơm tơmam pơkơ̆ng păng iŏk huch sa sik đêl đe duh tơ hnam yang sư.

⁹ Mă-lei ră, inh pơrăm boih bơngai Amôrit 'bơ̆t anăp lu sư, khŭl bơngai mă tih kơjung dang 'long Sêđar păng pran thoi tơm 'long kôih. Inh pơrăm boih lu plei sư kơpal păng rơh lu sư tơ ala sŭng.

¹⁰ Inh kư̆m chông iĕm lĕch đơ̆ng dêh Êyiptơ păng chông ba lu iĕm kơplah puăn-jĭt sơnăm lăm char glă wă ăn kơ lu iĕm đei teh jang sa đơ̆ng bơngai Amôrit.

¹¹ Inh đei pơjing tơiung lu bơngai khan lê̆ adrol lăm lu kon pơlei iĕm păng pơjing dôm lu bơngai Nasiril lăm lu kon tơdăm iĕm. Kră Yang khan: Ơ kon sâu Isơrael, hăm trŏ thoi ei?

¹² Mă-lei lu iĕm ăn pơgŏ boih lu bơngai Nasiril huch sik păng khă lu bơngai khan lê̆ adrol: Lê̆ pă khan lê̆ adrol!

¹³ Inh gô kơtĭt lu iĕm kơtă anih lu iĕm kư̆m thoi gre chơ 'ba 'bĕnh kơtĭt juă tơ teh.

¹⁴ Lu bơngai kơdâu kuăng ưh kơ gơh kơdâu klĕnh ôh, lu bơngai pran kơtang kư̆m gô pă kĕ mơ̆n păng lu bơngai nuih kư̆m ưh pă gơh pơklaih akâu sư kơdih.

¹⁵ Lu bơngai chĕp hră kư̆m đĭ ưh pă kĕ đơ̆ng; lu bơngai đei jơ̆ng hơbĕch hơbal kư̆m pă gơh weh, lu bơngai hao aseh kư̆m pă gơh pơklaih akâu sư kơdih,

¹⁶ Păng lu bơngai nuih hloh lăm lu bơngai pran kơtang gô kơdâu akâu hoh lăm năr noh, Kră Yang khan thoi noh.