Pilimoni 1 - Loina Nuahuana

Loyauwedo

¹ Yauwedo tasigu Pilimoni, 'owa Yesu Keliso 'ina topaihowa 'aigeda, gide taugu. Ma taugu Paulo deliya bo'i silagugauwa Yesu Keliso 'ina paihowa weyahina, ma bewa Timoti 'i'abihetegau ta bewa 'ino leta 'aleleleleyawa.

² Ma 'ima helau mabwaiyami 'oimiya, 'owa ma nuhudai Apiya ma tasidai Alikipo, tauna ba'idada tahehetapewa Yesu Keliso 'ina paihowa weyahina, ma wete 'ima helau tohekalesiyao mabwaiyadi taudi 'ino hada silolotapwalolo 'oidiya.

³ Cida Bada Yesu Keliso ma Tamada Yehoba 'idi helauwega tuwa wamiya yaliyaya.

Pilimoni mumugana bwebwe'ana

^4-5 Wasau yahesagoha pwaiya beno 'ino helau ma 'ino hemisa 'ida Bada Yesu 'oina, ma 'ana tomuliyao mabwaiyadi wete 'oidiya, 'oinega tuta mabwaiyana 'igu 'ahwanoi 'oidiyega ma'igu loyauwedo, Yehoba 'oina weyahiu.

⁶ Nuwanuwagu ma 'ida he'iya'iyagu Keliso 'oinega 'ida 'abihewaiwaiyego ma wete ginaula mabwaiyadi bwebwe'adi Keliso 'oinega silatulatuma 'uda sanapudi.

⁷ Tasigu, 'ino helauwega tohekalesiyao 'u'abihetediya ma 'adi lotohona 'i'abihe bwebwe'aneya, ma 'ino helau ta wasau bwebwe'ana yahesagoheya, ta yayaliyaya madouna.

Paulo nuwanuwana ma Pilimoni 'ida tagwale Onesimo 'oina

^8-9 Nuwanuwagu ma helauwega ginaula 'aigeda 'upaihowa. Taugu Paulo, 'ino bada, ma deliya yamiyamiya Yesu Keliso weyahina, 'oinega sawasawahigu ma Keliso saninega yaloinego ma ginaulaina 'upaihowa, ma tuwa hesi, helauwega yahegwaego,

¹⁰ beno ya'ahwanoiyego natugu Onesimo weyahina, tauna 'ima miya deliya 'oinega ya'ahwa natuneya, 'ina hemisa Keliso 'oina weyahina.

¹¹ Mwalo loheyaina Onesimo 'ino paihowa 'oiuwa geya bwebwe'ana, ma bewa 'inuwabuiya ta 'ina paihowa 'oiguwa bwebwe'ana, ma wete yasanapuya mumugana weyahiu 'ibwebwe'ana pwaiya.

¹² Coinega Onesimoina yahesumana hileyawa, ta ma'igu nuwagala,

¹³ weyahina nuwanuwagu yanuwahi ma tauna 'ihesuwahego ma 'i'abihetegau 'igu miya deli 'oina.

¹⁴ Ma nata geya yanuwanuwahi, weyahina 'owa 'ana toloina. Ma wete nuwanuwagu 'ino tagwala 'oiguwa helauwega 'upaihowa ma sahena 'igu he'i'ima 'oinega.

¹⁵ Nuwana bewa tauna huhuna ta Onesimo 'i'ebesinegowa tuta muhemuhena tuwa, ma 'eguma 'ihilawa nata ba'idau wamiya hataya.

¹⁶ Mwalo tauna 'ino topaihowa, ma sauga bewa geya 'abehega 'ihetopaihowamo, ma tauna wete ta'ahwa tasine Yesu Keliso 'oinega. Tauna bo'i ya'ahwa tasineya, ma 'owa 'ilobwainegowa ma 'u'ahwatasina moisa, weyahina tauna 'ino topaihowa ma wete tasiu 'ida Bada 'oinega.

¹⁷ Pilimoni 'owa ma taugu ta'ahwa tasineya, 'oinega 'agu helau 'oiuwega, 'eguma yahapwesawa, gide wete Onesimo 'utoehila.

¹⁸ To'aha gide mwalo 'ina pui, nana 'ana haga 'ulagu, 'abwa taugu yahemaise.

¹⁹ Taugu Paulo bewa nimaguwega yalelelele 'abehega mabwaiyana yahemaise hegumwali. Ma hesi sahena 'a haga 'oiguwa weyahina yagwaegwae, beno mwalo taugu 'igu paihowega ta yaluyaluwau 'i'ehau pwaiya.

²⁰ Cae tasigu, nuwanuwagu ma Keliso saninega Onesimo 'uhelauwe, ma 'ina pui 'unuwasam, beno 'abihetena madouna 'oiguwa, ma 'ane 'agu lotohona 'ibwebwe'ana mabwaiyana.

²¹ Cigu nuwatuhu bewa yaleleyawa, ma'igu hemisa ma 'abehega 'igu gwaeyedi 'uhesagohedi, ma 'umuliyedi, ma wete 'u'abihemadou.

²² Ginaula 'aigeda wete nuwanuwagu, beno 'igu 'ebe'eno 'ino hada, 'u'atububu, weyahina yanuwatuhuya 'abehega 'ino 'ahwanoi Yehoba 'oina 'oinega ma muhemuhena ma deliyega silihasigau ta yatauyawa 'oiuwa.

²³ Epapila ba'idagu Yesu Keliso 'ina paihowa weyahina ta deliya silagumaiya, ma Epapilaina 'ina helau 'oiuwa.

²⁴ Gide wete taudi ba'idagwao 'apaipaihowa: Maki ma Alisitako ma Dimasa ma Luke, 'idi helau wete 'oiuwa.

²⁵ Cida Bada Yesu Keliso tuwa yaluyaluwau 'ihehelauwe ma 'umiya bwebwe'ana. Taugu Paulo.