2 Yoni 1 - Loina Nuahuana

Loyauwedo

¹ Taugu 'imi bada, ma 'owa wahine Yehoba 'ihesinuwegowa manatumwao 'imi leta bewa yaleleyawa. Moisa tuwa 'ateguwega yahelauwegomi. Taudi wete gide 'eda moisa 'ana tomuliyao sihelauwegomiya,

² weyahina sanapu moisa 'ateda 'imiyamiya ma 'oida 'imiyahataya.

³ Coinega Tamada Yehoba ma Natuna Yesu Keliso 'idi helau ma 'idi 'atemuyamuya 'oidiyega nata tamiya daumwala, ma'ida gwae moisa, eema wete ma'ida helau.

Keliso 'ote'otetelina wa'abiyahi

⁴ Mwalo natumwao tupwadi ya'itediya 'eda dumwadumwaluna simuliyeya, gide 'ada loina Tamada 'oinega, 'oinega yayaliyaya madouna.

⁵ Nuhugu yo, yahegwaego wete bewa geya 'abehega loina hauhauna ya'ebwaego, ma hesi loina miyamiyanaina wahesagohe nugeteya, 'abehega mabwaiyada tahelau hilegita.

⁶ Weyahina 'eguma tahelau hilegita, beno Yehoba 'ina loinao tamulimuliyedi, ma loinaina mwalo wahesagoheya 'abehega helau 'ana 'eda 'oinega tatauya.

⁷ Ma to'abowao baibaiwadi sihapwesa pwaiya bale'uwa ma siuhauhala sigwae, “Yesu Keliso geya 'iheloheya.” Ceguma taiya gide 'i'abo 'esa, tauna Keliso 'ana 'aleha.

⁸ Coinega to'abowedi 'oidiyega wa'itayahigomi, ma 'imi paihowa 'ana maisa geya'abwa wauleule, ma hesi mabwaiyana wa'ewa.

⁹ Ma 'eguma watauya pui ma Keliso 'ina he'ita wa'ebesine, 'omi Yehoba wa'ebe'ebesine, ma hesi 'eguma Keliso 'ina he'itao wa'abiyahi momosidi, Tamadai ma wete Natuna 'oimiya simiyamiya.

¹⁰ Ceguma taiya 'oimiya 'inaowa ma 'ina he'ita hagana, geya'abwa wabwaubwauwe 'imi hada, ma geya'abwa waloloyauwedowe,

¹¹ nata gide 'ina paihowa galana waleme.

Gwae 'ana 'ebe losaloha

¹² Nuwatuhu baibaiwana simiyamiya eema nuwanuwagu weyahidi yaleleyawa, ma tuwa, weyahina yanuwatuhu yahiya 'abehega 'abwa yatauyawa 'omi mahetegwao tahegwaegwae, eema tayaliyaya moisa.

¹³ Tasiu tauna wete hesihesinuwana Yehoba 'oinega, tauna natunao 'idi helau 'oiuwa.