ZAKARI 9 - Kalate Zambe Nnomo a Mfefe Mfefé Nkôñelan

Meyoñ me ne Israél bebé ma nyiiban

¹ Mbañete Nti. Nkobô wé wo kui afôla si y'Adrak, a nkobô te wo ke tebe tisone Damas. Nti a nji fombô ve *meyoñ y'Israél étam, ve fe bôte bese be vee.

² A kobô fe Amat, bebé a Damas, a bitisone bi: Tir a Sidoñ, mbie bi n'atyeñ abui.

³ Tir a nga lôñ émien ôlem, a nga kôane argent, aval'ane tyia é ne mezen, a kôane fe or abim ane mbuluk ô ne minjoñ.

⁴ Ve Nti a ye vaa nye biôm bite, a ye kpwé minka'alé mié e mañ été, a nduan ja ye di'i tison.

⁵ Tisone Askalôn ja ye ko woñ, ñyenan a ye yene jame te, Gaza a ye fô'ôban a woñ, Ekroñe fe avale da, amu a kooé na a dimiliya mvolan a mbe a yange'e. Gaza a ye bo teke fe njô bôt, Askalône ki teke fe bôt,

⁶ mbunda'ane *meyoñ a ye tabe Asdôd. Nti a jô na: avale di nde ma ye tyame mebune Befilisteñ,

⁷ ma ye wôlé tit é nji kui metyi, nge na é nga veban e be bengunemelan e menyu map. Bôte bap ba ye nyiñ, ba ye bi ma ane Zambe, avale fe ane ayoñe Yuda, Ekroñ a ye nyiin ayoñe dam avale Beyébuzieñ be nga bo.

⁸ Ma ye telé beba'ale mbôma'ane si jam, asu ya kamane je e be *minsamba mewosan mia lôt, Teke môt a ye beta zu kpwe'ele ayoñe bôte dam, amu éyoñe ji mise mam me lôô de.

Njô bôt a ye zu telé mvo'é

⁹ Va'ak a Yérusalém! Loñ ôyenga a tisone Siôn! O lôô njô bôt a zu be wo, a too *zôsôô a ndañan, nsilibane si a bete éjakase yôp, e mon éjakase yôp, e mon ngal éjakas.

¹⁰ A ye vaa bevagoñe bita Efrayim, a bikabela e Yérusalém; a ye bu'u bilaé bita, a ye telé *mvo'é e meyoñ; a ye bo njôô ataté mañe ma a kui ma mevok, ataté Efrat a kui aku'u si.

Nkôtane mimbôk

¹¹ Nti a jô na: amu élate bia be mia bi nga bo, ñyemetan a metyi biyem ba tyik, ma zu kôté ba ya be mia be ne *nda mimbô'ô été nje ja funan anjeñ e ne teke mendim.

¹² A mia mimbôk mia nyiñ a ndi *nlem, bula'an e tisone jenan, nje mimfin mi nto mbetan. Ma kate mia de éyoñe jina na: ma ye ya'ane mia minju'u mienan a mbamba be mam biyoñ bibaé.

¹³ Ma ye belane Yuda an'élaé bita, Efrayim nye a ye bo akoñe y'été. A Siôn, ma ye lôme bôte bôé be té ba ya grés mintañete. Ma ye belane be ane nkpwaté mekône nyô a wosan.

¹⁴ Nti a ye vam ayoñe bôte dé yôp. Akoñe dé da ye ke ane feleves. Nti nyô a ne Zambe a ye loñe toñ, a ye so a akôse ya nké.

¹⁵ Nti y'émo a ye kaman ayoñe dé, a ye wua meta'a, asu ya tyam a ko'o ntebane ngame yat ôse: meta'a mete ma ye bo na metyi besiñ me kui, aval'ane nge woone le, nge metyi ya biyem ba tyik asu metuna'a, mme ma jalé bisua ba miame bie metyi, a wo'oban e meku'u y'ata'a metuna'a.

¹⁶ Nti, nyô a ne Zambe, a ye nyii ayoñe dé éyoñe te, aval'ane mba'ale mintômba a nyii mbame wé! Efunan ane meko'o y'ékat me n'édima, ba ye faé e *si nyô,

¹⁷ e vôme mvom a abeñ bia ye jôô. Fôn a mfefé woon bia ye ve ngu e be bisoé bendôman a bisoé bengon.