ZAKARI 8 - Kalate Zambe Nnomo a Mfefe Mfefé Nkôñelan

Ngaka'a * mvo'é a afok

¹ Ajô Nti a ne ngul ése e nga zu be ma na:

² avale di Nti ya ngul ése a jô na: me ne aban abui asu Siôn, nya nye'an a bili ma asu dé

³ ajô te ma jô na: me bulaneya Yérusalém, ma beta kôm éto e Siôn. Ba ye loone Yérusalém na: tison ja ba'ale élat. A nkôle Siôn wom wo ye bo jôé na: nkôl ô n'étyi.

⁴ Yaa ma yemete njôane wu na: minnôm, befam a binga ba wulu a *ntum, amu abui mimbu dap, ba ye beta zu tabe bito ya Yérusalém.

⁵ Bobefam a bobebinga ba ye beta zu ézuk, a bo bivôé e minjoñe ya tison.

⁶ Mfa'a bôte y'Israél ba ye nyiñe melu mete, jam da zu te da yené ane jam e se nguleya boban, ve ma me ne nguleya bo étua jame te, ma, Nti y'émo ése.

⁷ Ma ve mia de ngaka'a na: ma ye nyii ayoñe bôte dam, nde e nga ke minkôm e bifuse bi si ya jôp da tôô a jôp da dim.

⁸ Ma ye soo be wé be tabe e Yérusalém. Ba ye bo ayoñe dam, a ma ki ma ye bo Zambe wop. Ma ye jôô be ane metiñ a nya ntyi'ane mejôô bi né.

⁹ Nti y'émo ése a jô na: bo'one ngule *nlem, éyoñe ji, mi wô'ôya mengaka'a bekulu mejô be tameya kat asu dam, éyoñ be nga bo mbôka'a ya beta lôñe Nda Zambe.

¹⁰ Ôsusua, môt éziñ a nji zu, a ya'an ésaé bôt, nge ji betit. Môt a nji bo nguleya ke, nge zu a sobô besiñ, amu me nga suu bôt be wosan, bana a ba bevok.

¹¹ V'éyoñe ji, ma yemete njôane wu na: ma ye bo te beta bo bôte y'ayoñe di *abé, ba ye nyiñ avale me nga bo be melu mvus.

¹² Ma ye miase *mvo'é e *si nyô: mefube mindik ma ye wume bibuma, si ja ye yô bidi ya kôan. Abui mveñ da ye nnoñ é so'o yôp. Abui mvaé te ése, ma ye ve je e bôte bam, ba ye nyiñ.

¹³ A bijôé ya Yuda a Israél, e *meyoñ été, bi mbe éve'ela ya ayoñ e ne biyo'é. Eyoñe ji, ma nyii mia, mia ye bo éve'ela y'ayoñ e n'ébotan. Te beta koone woñ! Bo'one ngule *nlem!

¹⁴ Nti y'émo ése a jô na: éyoñ me nga tyi'i na ma futi mia e nju'u été, amu benyômvam be nga bo me na me wô'ôlun, me nji bulane mvus mfa'a ya ntyi'ane me nga tyik.

¹⁵ V'éyoñe ji me tyi'iya na ma jalé mia a mbamba be mam. Nde a bôte ya Yérusalém a si Yuda ése, te mia beta ñhe ko woñ.

¹⁶ Avale di nde mia ye bo: môt ase a kobô'ô nyô mbo'o bebela. Meba mejô menan me tame tyi'i mejô *zôsôô a futi *mvo'é!

¹⁷ Bôt be bo'o te bo ba bevo'o *abé, benan ajô ya kane ngana minsos, amu ma vini avale mimboone te, ma, Nti.

Mimôse ya * ntyiane bidi, mia ye veñesane mimôse mebôk

¹⁸ Nti y'émo ése a nga kalane ma foé nyô na:

¹⁹ Ma kate mia na: *ntyiane bidi mia tyi e ngone nyini, tane, zamgbwale a awômô ya mbu ôse, wo ye bo ataté éyoñe ji, asu ayoñe Yuda, beta *mebôk, njalane mevak a mefôn. Ve jam mia yiane dañe kômbô e ne bebela a *mvo'é!

²⁰ Nti y'émo ése a jô na: meyoñe bikuu, bôt be too abui bitison, ba ye beta zu e Yérusalém.

²¹ Bôte ya tison éziñ ba ye jô ba ye tisone fo'o na: za'an, bia ke ye'elane Nti y'émo, a jeñe Nye. Ba ye yalane na: bia be mia bia ke.

²² Yaa abui bôt a *meyoñ me ne ngu, ba ye zu Yérusalém a jeñe ma, a ja'é me mam e meye'elane mab été.

²³ Ma bele na éyoñe te ébien, bikul awôm, môt ase y'été a kobô'ô nkobô wé, bia ye bi mone Beyude ñwôndé ngômesane wé, a jô nye na: bia kômbô ke nsamba wôé, amu bia wô'ôtane na Zambe a ne be mia.