ZAKARI 7 - Kalate Zambe Nnomo a Mfefe Mfefé Nkôñelan

Ntyiane bidi asu ya simesane ntyamane Yérusalém

¹ E mbu nyini Darius a nga jôô, ñwô ajô Nti e nga zu be Zakari, e ngon ébulu, ba loone Kisle, é to melu menyin.

² Bétél-Saréser, évete bezimbi njô bôt a e bôte bé, be nga lôme nsamba bôt, asu ya volô Nti *nlem,

³ a sili betuni be mbe be bo'o ésaé Nda Zambe Nti a ne ngul ése a bekulu mejô nsili wu na: ye me yôn e ngone tane, a tyili mamiene mam, avale ma zu ma bo den mimbu abui'

⁴ Eyoñe te ajô Nti a ne ngul ése e nga zu be ma na:

⁵ Jô'ô bôte bese ya si a betuni na: éyoñe mi nga tyi bidi a miñyôn e ngone tane a zamgbwale den a ntoo mimbu mewôme zamgbwa, *ntyiane bidi ôte ye mi nga bo wô asu dam'

⁶ A éyoñ mi mbe mi ja'ak a nyu, ye mi nji di a nyu asu denan'

⁷ Ye sa atinane ya mejô Nti a mbe a kobô'ô anyu minnôme bekulu mejô, éyoñe Yérusalém a mbe *mvo'é ne mieññ, bitisone bié bi bôma'ane nye, Négéb a nlumbu si ki njalan a bôt'

⁸ Ajô Nti e nga beta zu be Zakari na:

⁹ avale di nde Nti a ne ngul ése a mbe a kobô'ô na: tyi'ane mejô *zôsôô a môt ase a liti'i monyañe *mvam a éngôngô.

¹⁰ Avale te fe mfa'a nkus a monenyui, *ntabe a *nzôzoé, te mia kpwe'ele be; môt éziñ ya be mia a bo'o te bôndé fe'e ya bo monyañ *abé.

¹¹ Ve be nga bene vô'ôlô; be nga lume mvus a dibe melo na be bo te wôk.

¹² Be nga bo minleme miab ayet an'akok; be nji kômbô nyoñe miñye'elane mi Nti ya émo, mmie Nsisime wé ô mbe ô kate be anyu bekulu mejô ya melu mvus. Ajô te Nti a nga dañe yaa

¹³ a jô na: amu be nji kômbô vô'ôlô, éyoñe me mbe me dutu'u be na be bo mewôk, ma fe me nga bene yalane be, éyoñ be nga sili mvolan.

¹⁴ Me nga mialane be e be *meyoñ mevale mese, mme be nji bo'o be yemek. Be nga li'i si é ne teke jôm e mvuse jap, vôme môt éziñ a nji beta ke nge so. E si jap é mbe mbamba vôme ya tabe, be nga kôñelane je bilik.