ZAKARI 6 - Kalate Zambe Nnomo a Mfefe Mfefé Nkôñelan

Nyenane muame: bevagoñ benyin

¹ Me nga beta bete mis a yene ñyenane wu na: bevagoñ benyin be so'ok e zañe minkôle mibaé; minkôl mi mbe minkôle mi mvot.

² Bivele bikabela bi nga too e vagoñ ôsu, bivindi e nyô baa,

³ bifumulu bikabela e vagoñe lale, a bi bi ne sôn bi bili metone ki e vagoñe nyini.

⁴ Nde ma nyoñe nkobô a jô éngele bia nye bi mbe bi la'ane na: a *nti wom, bili bi ne jé'

⁵ Engele nye me na: bikabela bite binyin bia so meku'u menyine ya yôp vôm ba tele asu Nti ya si ése.

⁶ Bivindi bikabela ntiñetan e wua ya bevagoñ bia so mfa'a si y'akôé, a bifumulu bia so bie mvus; bi bi ne metyele nyô bia so mfa'a si ya nké.

⁷ Bi bi ne sôn bi soya a bia sili ñwulan e si. Engele a nga jô be na: kelan, bôma'ane si. Nde bevagoñ be nga bômane si.

⁸ Engele ve loone ma nye me na: tame yen, bevagoñ ba so mfa'a y'akôé ba je'e ayaa dam ma yiane yaa si y'akôé.

Nda Zambe ja ye beta lôñeban

⁹ Nti a nga beta kobô me na:

¹⁰ nyoñe mimveane Eldayi, Tôbiya a Yedaya be nga soo mie e be bekee minkôm. Womien tame nyiine den, tame nyiin e *nda Yôsiya, e mone Sefania, e vôme be ndôme so Babilôn.

¹¹ Wo ye nyoñe argent a or asu ya kôm ékat wo ye jalé Yasua, e mone Yehôsadak, *ntuni nnene nlô.

¹² A wo ye jô nye na: avale di nde Nti a ne ngul ése a jô na: Tame yene môt a ne jôé na: Atata'a, amu jôm ése ja ye taté mebo mé si, a a ye lôñe Nda Zambe Nti.

¹³ E nye a ye lôñe *nda Zambe Nti. Nye a ye jaé éjijin, a ye tabe si éto njôane jé asu ya jôô bôt. Ntuni a ye tabe fefele jé: nya *mvo'é a ye bo e zañe bôte bete bebaé.

¹⁴ Ekat ja ye volô mfa'a ya simesane Eldayi, Tôbiya a Yedaya, e Nda Zambe été, a mfa'a ya simesane mbaa fulu e mone Sefania.

¹⁵ Ba be n'ôyap ba ye zu saé Nda Nti, a mia ye yeme na Nti a ne ngul ése a lômeya ma be mia. Jame te da ye boban nge mia tu'a bo tyiñe Nti, e Zambe wônane mewôk.