ZAKARI 5 - Kalate Zambe Nnomo a Mfefe Mfefé Nkôñelan

Nyenane samane: kalate biyo'é

¹ Ane me nga beta bete mis a yene ñyenane wu: mvulekane kalate ô yele'e.

² Engele nye me na: ô lôô jé? Me na: me lôô mvulekane kalate wo yele, nté menyi'i me mo mewôm mebaé, ndame ki menyi'i me mo awôm.

³ Nye me na: biyo'é bia mialan e si ése mbie le. Biyo'é bite bia liti na: ba ye titane ñwuwub ôse va, a titane fe nkalane minkal ase va.

⁴ Ma mialane bie, nalé Nti a ne ngul ése a jô, nalé bia ye nyiin e *nda ñwuwup, a e *nda nyô a kalane jôé dam mbia nkalan, nalé biyo'é bite bia ye tabe e *nda éte a di'i je mfula'an a andile dé a meko'o mé.

⁵ Engele bia nye bi mbe bi kobô'ô a nga subu a jô me na: bete'e ñhe mis a yene jôme ja kui le.

⁶ Me na: jé le? Nye na: nkoé le wo zu. A na: *abé dabe ya si ése nde le.

⁷ Wôna njiñelete ésua afiti é nga yené, minga a too je été.

⁸ Engele na: *abé ñhe le! Ve beta sô'ôlô minga ésua été, a wua ébañ afiti e *mbé.

⁹ Nde ma bete mis a yene ñyenan: binga bebaé be za'ak. Evuñulu é mbe é vuñuk e mefabe mab été, mefap me funa'an ane ma me bingobingo, nde ba bete njiñelete ésua e zañe si a yôp.

¹⁰ Me ve sili éngele a mbe a kobô'ô me na: binga ba ba kee njiñelete ésua vé'

¹¹ Nye me na: e si ya Sinéar, asu ya lôñe minga a ne e njiñelete ésua *nda. Eyoñe *nda é maneya lôñeban, ba ye telé minga ate éto jé yôp tek'afô'ôsan.