ZAKARI 3 - Kalate Zambe Nnomo a Mfefe Mfefé Nkôñelan

Nyenane nyini: Yasua Ntuni nnen

¹ Eyoñe te Nti a nga liti ma Yasua, Ntuni nnen, a tele éngele Nti ôsu: ve Satan a nga tele nye mbo nnôm, asu ya bo'olô nye.

² Engele Nti a nga jô Satane na: Nti a dibe wo anyu, nyô émien a nga tobe Yérusalém. Ve mfa'a Yasua, ye a nji bo ési'i be nga vaa nduan'

³ Yasua a nga be'e mengômesan me ne mvin, a tele éngele ôsu.

⁴ Engele a nga beta nyoñe nkobô a jô bôt be nga tele ny'ôsu na: va'ane nye mvine biôm éte. Wôna a nga jô Yasua na: tame yen me vaaya wo *abé dôé a ba ye jalé wo mengômesan m'abôk.

⁵ Nye na: be jalé'é nye ébôbot é ne *mfuban e nlô. Nde be nga jalé nye ébôbot é ne *mfuban e nlô a jalé fe nye mengômesan.

Mbo ésaé a ne ñwo'one mbon

⁶ Ane éngele Nti a nga jô Yasua na:

⁷ avale di nde Nti a ne ngul ése a jô na: nge wo wulu e mezene mam été, a ba'ale mebendé mam, womien wo ye jôô *nda Zambe jam, wo ye ba'ale minseñe miam, ma ye bete wo nkôñe ya beéngele be tele ma fefele va.

⁸ A Yasua, *ntuni nnen, vôlô'ô, womien a beébele bôé be too wo ôsu, amu bôte bete be ne ndem, tame yen ma zuu mbo ésaé wom, jôé na Atata'a.

⁹ Yaa, ô lôô, ako'o ma kalane Yasua. Ako'o te étam é bili mise zamgbwa. Mamien ma kpwele ntilan e bili, nalé Nti a ne ngul ése a jô, A ma ye vaa *abé ya *si nyô môse wua.

¹⁰ Môs ôte, nalé Nti a ne ngul ése a jô, mia ye bañetan, wua a nyô mbok, e afube mindi'i si a e figié si.