ZAKARI 2 - Kalate Zambe Nnomo a Mfefe Mfefé Nkôñelan

Minlak a belui melui

¹ Me nga bete mis a yene minla'a minyin.

² Nde ma sili éngele a mbe a kobô'ô me na: mi ne ndeme jé? Nye me na: minla'a mi nga mialane Yuda, Israél a Yuda mmie le.

³ Nde Nti a liti ma belui melui benyin.

⁴ Me na: bana ba zu bo jé? Nye me na: minlak mi ne mi mi nga mialane Yuda, avale môt a nji fe bo nguleya bete nlô. Ve belui melui ba te zu bo mie na mi fô'ôban, asu ya kpwé minla'a ya *meyoñ mete, *meyoñ me nga bete minla'a miap e si ya Yuda na a mialan.

Nkole ya ve'e si

⁵ Nde ma bete mis a yene môt a bili nkole ba ve'e wô si e wo.

⁶ Me môt ate na: wo ke vé? Nye me na: a ke ve'e Yérusalém a yene ndame jé a nté wé.

⁷ Ane éngele a mbe a kobô'ô ma a nga subu ôsu, nyô mbo'o ki a za'a tôbane nye,

⁸ a jô nye na: mate'e a kobô ndômane môte nyô, ô tele wé a jô nye na: Yérusalém a yiane bo tison é yoo, amu jama bôt a betit ba ye tabe été.

⁹ A ma ma ye tabe valé, nalé Nti a jô, ma ye bo ôleme nduan mfa'a wé a ézezañe jé, ma ye bo étôto'o jé.

Nti a bulane bekee minkôm

¹⁰ Nkelan! Nkelan! Kôla'ane si y'akôé avôl, nalé Nti a jô. Mi kôlô'ô meku'u menyine ya si, e vôme me nga mialane mia, nalé Nti a jô.

¹¹ A bôte ya Yérusalém mi too minkôme Babilôn, bo'on avôle ya tup.

¹² Avale di nde Nti a ne ngul'ése, Nyô a nga lôme ma ajô meyoñ me nga sa mia a kobô na: nyô ase a nnambe mia, a nnambeya fe nyia dise wom.

¹³ Yaa, me nyô, ma ye telé be wo wom e ngame yat, nalé ba ye bo jôme nsa ya besiñe bap, a mia ye yeme na, Nti a ne ngul'ése nye a lômeya ma.

¹⁴ Loñ ôyenga, va'ak, a ngone ya siôn! Amu me nyô ma zu tabe ézezañe jôé, nalé Nti a jô.

¹⁵ Jama *meyoñ a ye kabetane Nti *môs ôte. Ba ye bo bôte bame mamien, a me ki ma ye tab'ézezañe jôé. Eyoñe te wo ye yeme na Nti a ne ngul ése nye a lômeya ma be wo.

¹⁶ Nti a ye nyoñe Yuda ane ngabe jé e si é n'étyi été. A a ye beta tobe Yérusalém éyoñe jia éfe.

¹⁷ Etétéa ése é kpwa'a ne kubuk asu Nti, amu a kôlô si a so'o e *nda jé é n'étyi.