ZAKARI 14 - Kalate Zambe Nnomo a Mfefe Mfefé Nkôñelan

Mewosan ma su'ulan a nsoone Nti

¹ Môse y'ayaa Nti ô ntoo bebé. A bôte ya Yérusalém, ba ye kaban akume denan mise menan me lôô!

² E ne fo'o na Nti a ye sulane meyoñe na me wosane Yérusalém: ba ye nyoñe tison, ba ye sa menda, ba ye jabe binga, éfase jia ya bôt ja ye ke minkôm, ve *mebuka'a me bôt ma ye bo nguleya Tabe tison.

³ Eyoñe te Nti a ye taté na a tebe *meyoñ mete ngame yat, a ye wosan aval a zu a bo éyoñ ése e biyoñe bita.

⁴ Eyoñe te, a ye tebe e nkôle beôlivié, bebé Yérusalém, éfase tisone ya jôp da tôô. nkôle beôlivié wo ye salé zañ ngab ébaé, a beta mbi'ili a ye bo a so'o mfa'a jôp da tôô a kele mfa'a da dim. Efase nkôle jia ja ye k'ôyap mfa'a y'akôé, éfase baa ki mfa'a ya nké.

⁵ Nne mia ye tup e mbi'ili ô ne mfa'ane zañe minkôle miam, amu wo ye ndamban a kui Asal. Mia ye mate avale benyobimvam be nga bo melu Ozias njô bôte ya Yuda a nga jôô, amu si é nga fô'ôsan. Eyoñe te Nti, e Zambe wom, a ye suan ba beéngele ba saane nye.

⁶ Eyoñe te éfufup ja ye bo teke fe mfi, e avep a meta'a.

⁷ Nti étam nye *a yem éyoñe te, Môs étam ñwô wo ye bo teke fe nkandan e zañe *môs ba alu, éngengeñ ja ye bo ja'ane mamengô'é.

⁸ Anjeñe mendim da ye vam e Yérusalém; éfase jia ya mendime mé ja ye lôt mfa'a évele mañ, éfas évo'o ki mfa'a beta mañ tañe ngume mbu, a mfum avale f'ane a su'u.

⁹ Eyoñe te Nti a ye jôô si ése; Nye étam ba ye kañ ane Zambe, jôé dé étam nde bôte bese ba ye yem.

¹⁰ Efuse si ése ja bômane Yérusalém ja ye veñesane nje'ese, ataté Géba mfa'a y'akôé a kui Rimon mfa'a ya nké. Yérusalém a ye dañe mefôla ma bômane nye, a tison ja ye bo ataté *mbé Bényamin a kui *mbé ya jua, e vôme nnôme *mbé ô né, nalé fe ataté nkum Ananél a kui bibé bi njô bôt ba miate woon.

¹¹ Ba ye bo nguleya tabe e tison, amu ja bo teke fe bi éndeñela'a ajô ntyaman a bôt ba ye nyiñ été *mvo'é.

Ebubua mfa'a * meyoñ mese

¹² Mfa'a *meyoñ me nga ke wosane Yérusalém, mbia be mame Nti a ye bo be mme ma: minsône miap mia ye boé be ngenane be vee, mise map ma ye boé vôm me né, avale te fe ayeme dap e menyu map.

¹³ Eyoñe te, Nti a ye jalé be a beta woñ; bana ba ye wosane ba bevok, a môt ase a ye wosane môt ba nye be too bebé.

¹⁴ Bôte ya Yuda ba ye wosan asu ya kamane Yérusalém, ba ye nyoñ akume *meyoñ ma bômane be ese. nalé ate ba ye kôane or, argent a mengômesan abui.

¹⁵ Betite bese ya ngame besiñ: bikabela, bemulé, bekamel a bijakas, mam me nga kui be bôt. Ma ye fe kui be be.

¹⁶ Eyoñe te bôte ya meyoñ me nga wosane Yérusalém ba ye nyiñ, ba ye bet e tison éte mbu ôse, asu ya kañe Nti, njôô y'émo, a asu ya jem abô'ô bibem.

¹⁷ Ng'ayoñe da ya meyoñe ya si Da bo te ke Yérusalém asu ya kañe Nti, njôô y'émo, mveñ ja ye bo te noñ e si jé.

¹⁸ Nge bôte y'Ejipte ba bene ke Yérusalém, asu ya jem abô'ô bibem, be fe ba ye biban a bidim aval'ane meyoñe mevok ma ye bo teke ke jem abô'ô te.

¹⁹ Avale te nde Ejipte a meyoñ ma ye bo te jem abô'ô te ba ye nyoñe *melep.

²⁰ Eyoñe te, ja'ane bone mengôñ bikabela ba ye bi ntilane wu na: ntelan étyi asu Nti. A memvé ya *nda Zambe fe ma ye teléban étyi avale fe ane bisua ba belane bie asu mmiaman mbie bi tele asu ata'a metuna'a.

²¹ Memvé mese me ne Yérusalém a Yuda ma ye teléban étyi asu Nti ya si ése. Ba ba ye zu ve metuna'a ba ye belane me asu ya yame tit. Eyoñ éyoñe te ja ye kui, teke nkuan abom éziñ a ye beta tabe *nda Zambe Nti ya si ése.