ZAKARI 12 - Kalate Zambe Nnomo a Mfefe Mfefé Nkôñelan

Yérusalém a kôtéban

¹ Mbañete Nti ajô Israél. Avale di nde Nti, a jô, Nyô a nga ndamé yôp, a bôé mbôka'a ya si, a ve môt ényiñ a jô na:

² Ma zu bo Yérusalém na a bo *élaé é ne njalan a woone y'ayaa dam: a ye ve *meyoñ ma bômane nye bijôñe mis. Bijôñ bia kui e be Yuda ase, éyoñe Yérusalém a ye dilibane bita.

³ Eyoñe te ma ye bo Yérusalém avise *mekok, nde *meyoñ ma ye kômbô bete si. Ba ba ye ve'ele, ba ye balé meveñ. Eyoñe te *meyoñ mese ya *si nyô ma ye vute ngam a wosane Yérusalém.

⁴ Ma jô na, éyoñe te, ma ye bo bikabela biabe na bi so'o woñ, a bewulu bikabela bap mekut, a woñ wo ye bi be. Ma ye kamane Yuda, ve ma ye bo bikabela ya *meyoñ mefo'o ndim.

⁵ Bivete ya Yuda bia ye jô bibiene na: e be Zambe, Nti y'émo, nye bôte be too Yérusalém ba nyoñe ngule jap.

⁶ Eyoñe te, ma ye bo bivete ya Yuda bi funan éwoñ ja di'i afan, nge ane ési'i nduan ja yôñ e bikumba bi fône si! Ba ye tyame *meyoñ e meku'u mese ma bômane be. Ve da na bôt be too Yérusalém ba ye k'ôsu a nyiñ e tisone jap.

⁷ Nti a ye taté zu volô menda me bôte ya Yuda, amu mvoñe bôte David a bôte be too Yérusalém ba dañe bôte bevo'o ya Yuda.

⁸ Eyoñe te Nti a ye kamane bôte ya Yérusalém: ba ba dañ ate'e be be, ba ye bo ngu ane David, a e mvoñe bôte David ja ye bo mfa'a wop ane Zambe, aval'ane éngele Nti, a wulu'u ôsu viap.

Minyôn e si ése

⁹ Nti a jô na, éyoñe te, ma ye zu tyame *meyoñ mese ma kômbô wosane Yérusalém.

¹⁰ Eyoñe te ma ye sôé nsisime ya mbamba nkômban a meye'elan e be *nda David a bôt be too Yérusalém. Ba ye fombô ma, nyô be nga jii akoñ. Ba ye yône nye ane ba yôn ntôle monafam.

¹¹ Eyoñe te abui miñyôn da ye bo e Yérusalém aval'ane mi mia boban asu Adad-Rimmon e mbi'ili Megidô.

¹² Abum ese ya si da ye bo awu mfa'a wé: abume ya mvoñe David, vôm étam, a binga vôm étam, di ya mvoñe Natan, vôm étam; a binga vôm étam;

¹³ di ya mvoñe Lévi, vôm étam, a binga vôm étam; di ya mvoñe Simeyi, vôm étam, a binga vôm étam.

¹⁴ Avale te fe mebum me bôt mevo'o mese ma ye bo awu, abum ese mfa'a wé, a binga mfa'a wop.