ZAKARI 11 - Kalate Zambe Nnomo a Mfefe Mfefé Nkôñelan

Beta * meyoñ me bibaneya

¹ A Libañ di'ine mimbé miôé, nduan ja di'i é mane vos besédre bôé.

² Yônan a besipré, amu besédre be maneya ba'éban, abeñe bilé te e maneya di'iban. A bilône ya Basañ, Yônan, e fut afane jenan é maneya kpwébane si.

³ Beba'ale mintômba ya *meyoñ ba yôn, éyoñe jabe ya duma é lôteya. Bengbwengbwem ba bam, amu mebune ya Yordan me bibaneya.

Beba'ale mintômba bebaé

⁴ Avale di nde Nti, e Zambe wom a kobô na: va'a mintômba mia ye tyi'ibane bidi.

⁵ Ba ba kuse mie, ba tyi'i mie *tyiñ, teke buni na mi bili mekua, a ba ba kuane mie, ba yôtane na: mva'ane Nti akéva, amu bi ntoo kum! Beba'ale babe bebien teke ko mie éngôngo.

⁶ Ajô te ma Nti, ma jô na: ma fe ma ye bo te ko bôt be too si éngôngo. Ma zu ve môt ase e mo me môt a too nye bebé, a e mo me njô bôte wé. Bejô bôt ba ye sa si, a ma ye bo te kôté môt e mo map.

⁷ Ajô te me nga ve mbame mintômba bekuan abom be nga ye wôé bidi. Me nga nyoñe mintume mibaé a yôlé wu y'ôsu na: amvôé, wu baa ke na: élat. Nde fe me nga taté na ma ve mbame bidi.

⁸ Ane me nga wôé beba'ale mintômba belaa ngone jia. Amu mintômba mi nga su'ulane bo me na me bo ôjeja'a, éfase jabe fe, be nga vini ma.

⁹ Eyoñe te me nga jô mie na: ma ye bo te beta ve mia bidi! Ntômba wo ye wu ô wo'ok, wu wo ye jañ ô jañek, a mi mia li'i mi ntoo ve dian e zañe jap!

¹⁰ Eyoñe te me nga nyoñe ntume wom ô ne jôé na: amvôé a bu'u wô asu ya tyam élate jam me nga bo a meyoñe mese.

¹¹ Elate te é nga tyambane *môs ôte; a mintômba mia dañ éngôngo, mi mi nga tabe ma ntye, mi nga yeme nalé na e mbe ajô Nti.

¹² Me nga jô mie na: nge mia yene nalé mvaé, va'ane ma ma'ane mam; nge sa nalé te mia ve ma jôm. Nde ba ve'e bifase bi moné mewôm mela asu ma'ane mam.

¹³ Nti a nga jô me na: wu'a ma'ane mete e be mmé meviek, mbamba tañ be nga yene na ma yiane kui! Nde ma nyoñe bifase bi moné mewôm mela a wua bie e Nda Zambe asu mmé meviek.

¹⁴ Wôna me nga bu'u ntume baa: élat, asu ya tyam ntabane ya bobenyañ e zañe Yuda a Israél.

¹⁵ Nti a nga jô me na: jeñe na ô bi biôme bi mba'ale biyem, nyô a ye bo akut.

¹⁶ Amu, ô lôô, mamien ma ye soo e *si nyô, mba'ale mintômba a ye bo te kamane mintômba mia jañ; a ye bo te ke a jeñ wu wo dañe mongô nge yete wu ô bili aveñ, a ye bo te ve wu ô tele bidi; ve a ye di minsône ya wu ô n'avem, a nyabe wô a kui bibo'os.

¹⁷ Bidim a mbia mba'ale mintômba a li'i mintômba! Kpwaté mekôn ô jiba'ane nye wo a e dise ya mbo nnôm! E wo wé ô tame mane kôt ôse, a dise dé ya mbo nnôm e tame fo'o dim.