ZAKARI 1 - Kalate Zambe Nnomo a Mfefe Mfefé Nkôñelan

Bula'an e be Nti

¹ E ngone muame ya mbu baa Darius a nga jôô, ñwô Nti a nga kobô *nkulu mejô Zakari, e mone Bérékia, e mone Iddô na:

² Nti a nga wô'ô b'ésoo bôé ôlun abui.

³ Ajô te jô'ô be na: avale di nde Nti a ne ngul ése a jô na: Bula'ane be ma, nalé Nti a ne ngul ése a jô, a ma ma ye bulane be mia, nalé Nti a ne ngul ése a jô.

⁴ Te mia vu b'ésoo benan mbe bete bekulu mejô be nga kobô be melu mvus na: avale di nde Nti a ne ngul ése a jô na: bula'an a bene mbia mezene menan a mbia mimboone benan, ve be nji wôk nge nyoñe me ngap, nalé Nti a jô.

⁵ Ve be, b'ésoo benan, be ne vé den? Bekulu mejô ki ye be ngenane be vee'

⁶ Ve *minkobô miam a mintyi'ane miam me nga kalane bebo bisaé bam, bekulu mejô, ye mi nji kui e be b'ésoo benan? Eyoñe te be nga bulan a meme na: Nti a ne ngul ése a nga tyi'i na a bo bia aval'ane mezene mangan me né, a aval'ane mboone wongan ô né, a avale te fo'o a nga bo bia.

Nyenane bikabela

⁷ E mbu baa Darius a nga jôô, e ngon awôm a jia ba loone Sebat é too melu mewôm mebaé a menyin, nje Nti a nga kobô *nkulu mejô Zakari, e mone Bérékia, e mon Iddô na:

⁸ Alu di, me yeneya jame dina na: môt a bete évele ékabela yôp, a tele e zañe bone bilé, e mbi'ili si. Bikabela bife bi too nye mvus, nyôl évele, angôô a éfumulu.

⁹ Nde ma sili nye na: a Nti, bikabela bi bia liti jé' Engele a mbe na a yiane kobô a nga yalane me na: ma zu kate wo jame te.

¹⁰ Ve môt a nga tele e zañe bone bilé a nga kobô na: e bikabela Nti a lômeya na bi wulu vôm ase e *si nyô mbie le.

¹¹ Eyoñe te bikabela bi bi nga kobô Engele Nti a nga tele e zañe bone bilé na: bi maneya bômane si, tame yen si é ne *mvo'é a ja wo'on.

¹² Eyoñe te éngele Nti a nga beta jô na: a Nti a ne ngul ése, a kui éyoñ évé wo ye langane ko Yérusalém a bitisone ya Yuda éngôngo, mbie wo wô'ô ôlun den a ntoo mimbu mewôme zamgbwa'

¹³ ajô te Nti a nga ve éngele a mbe a kobô'ô ma éyalan ja ve ngule nyô, ji ja bôé môte nleme si.

Zambe a ko Siôn éngôngo

¹⁴ Nde éngele a mbe a kobô'ô ma a nga jô me na: yôta'ane na: avale di nde Nti a ne ngul ése a jô na: ngul *aban é bili ma asu Yérusalém a asu Siôn.

¹⁵ Ve ma wô'ô *meyoñ me tele *mvo'é mbia ôlun; amu na me nga too me wô'ôlun ve tyôtyoé, ve me zuya kô'ôlane bidime bié.

¹⁶ Amu ajô te Nti a jô na: ma beta zuu Yérusalém a *nlem éngôngo, *nda jam ja ye beta lôñeban, nalé Nti a ne ngul ése a jô, a ba ye beta limi nkol e Yérusalém.

¹⁷ Beta'a yôtane na: Avale di Nti a ne ngul ése a jô na: mvom é ngenane momo e bitisone biam. Ve Nti a ye beta volô Siône *nlem a tobe Yérusalém.