YUDE 1 - Kalate Zambe Nnomo a Mfefe Mfefé Nkôñelan

Mebatan

¹ Ma, Yude, mbo ésaé Yésus Krist, monyañe Yakob, ma tili ba be ne nloon, nye'an e be Zambe Esaa, a mba'alan mfa'a Yésus Krist.

² Mvam, *mvo'é, a nye'an, bi za'a e be mia abui abui.

Mbia beye'ele

³ A bemvôé bam, éyoñ me nga dañe kômbô tili mia ajô nyiane wongan bia bese, me mbe ntindane ya bo nalé, amu me tômôlô mia na, mi wosan, a kamane mbunan ô nga veban e be mimfufup éyoñe jia nté ényiñ.

⁴ Amu bôt b'éziñ be nyineya e zañe jenan asoé, mbe bete mveane mekua wop ô maneya litiban. Be ne mbia be bôt ba kôñelane mvame Zambe wongan bisôk, a katee susu'a Njôô, a Nti wongan Yésus Krist.

⁵ Ma kômbô na mi simesan, akôsa bo mi maneya yeme mame mete mese na, Nti, éyoñ a nga mame nyii bôte bé e si ya Ejipte, a nga jiane ba be nga bo ayete minlem.

⁶ E be éngele be nga bo te ba'ale nkôñe wop, ve be nga li'i étaba'a jap, a ba'aleban nka'an kom, e dibi été, akekui ntyi'ane mejô ya beta *môs.

⁷ Mfa'a Sodom a Gomor, a bitison bi nga bômane bie, be nga bo *mejian avale daada ane be, a tôñe minsôn mia selan abialé dap. Be ne ntelan ane éve'ela, e njañane ya nduane kom.

⁸ Avale te fe bôte bete, e befe'e ya biyeyeme biab été, ba bo minsône mvin, a biasé ngule njôan a ta e ba be ne bitôtok.

⁹ Ja'ane Miké, éyoñ a nga sañetane Satan, a kobô nye ajô mbime Môze, a nji ve'ele kobô nye nkobô meta, ve a nga mane jô na, Nti a va'a wo *melep.

¹⁰ Ve bôte bete ba kobô e mam be nji yem ébiasé. A e jame ba yem ñyemane ya nlô, akut ane betit, wo kee be ve njañan.

¹¹ Amu ajô tañ, nde be nga ku e *meve'ele me Balam a be nga jañ nkangane Koré été.

¹² Bôte bete bebien mbe ba ve ndiane wônan ya nye'ane bobenyañ mvin, éyoñ ba di te wô'ôson a toñe ve bebien. Be ne minkut mi ne tee mendim, mmie mite mia dutuban a évuñulu. Be ne bilé bi ne tee bibuma, ñwuan biyoñe bibaé, ntéane si.

¹³ Be ne mbia mintyôa mi mañ, mmie mite mia kuli avule ya ôsone viap, ateté da ndeñendeñ, mba'alan e dibi ya nnôm éto.

¹⁴ Enok a nga kulu mejô ajô dap, e môse zamgbwale, ataté melu me Adam, a jô na: Tameka yenan, Nti a zu nsamba, a bizu'u mimfufube mié.

¹⁵ A zu tyi'i *si nyô ése mejô a kpwéé mbia be bôt bese, a mbia mimboon mi *abé miap mise ya wôé, a mbia mejô mese, e mbia beboabé be nga kobô nye.

¹⁶ E mbe bebiene le! E ba ba kobô e menyiñ, a bikalak éyoñ ése. Ba dutuban a mbia minkômban. Menyu map ma kobô bivuvu'u bi mam a belane bôt, ve amu mfi wop bebien.

Melep mfa'a bebuni

¹⁷ Ve mia, a bemvôé bam, simesa'an minkulane mejô minlôman mi Nti wongan Yésus Krist be nga taté jô mia.

¹⁸ Be nga bo be jô'ô mia na: Melu ma su'ulan, bôt ba ye zu a kpwe'ele mia, mbe bete ba wulu e mbia minkômban miap été.

¹⁹ Bebiene le! Ba mias nkandan mengam. Be bili ve asimesane ya *si nyô. Nsisim a nji bo e be be.

²⁰ Ve mia, a bemvôé bam, lôñane mia bebien e mfubane mbôka'a mbunan e yôp ye'elan e Nsisim été.

²¹ Taba'an e nye'ane Zambe été. Ajô ényiñe ya melu mese, tela'ane ndi minleme jenan e nkoon éngôngol Nti wongan Yésus Krist été.

²² E ba ba sôan, duta'ane be a njiban ôse.

²³ Nyi'ane be, a vaa be nduan. Wôna, mfa'a ba bevok, duta'ane be a nkoon éngôngo, ve a woñ, a vini, ja'an alô'ô e ne mvin a zene ya minsône miap.

Mbamba njôan

²⁴ E be nyô a ne ngule ya ba'ale mia mi za ve'ele ku, a telé mia ôsu ya étôto'o jé mi too teke bijô e mevak été,

²⁵ e be Zambe étam, nyô a ne nyii wongan amu Yésus Krist Nti wongan, étôtok, éjijin, ngu a njôan bi bo'o be nye te na biyoñ bise bi boban, éyoñe jina a kui miaé mise, Amen!