YOANES 8 - Kalate Zambe Nnomo a Mfefe Mfefé Nkôñelan

¹ Ane Yésus nye a nga ke e nkôle beôlivié.

² Esala tyé, a nga beta ke Nda Zambe, ane bôte bese be nga zu be nye, a tabe ñhe si, a nga ye'ele be.

³ E nde betili bekalate a Befarizieñ ba zu soo minga be nga bi a bo'o *mejian, be tele nye e bôte zañ

⁴ a jô Yésus na: A Nye'ele, ba te bi minga nyuna, a bo'o *mejian.

⁵ E kalate metiñ été, Môze a nga bendé bia na bi lum avale binga di mekok; ve mfa'a wôé wô wo jô aya'

⁶ Be nga kobô nalé be ve'ele nye, be bi ngume jame ya bo'olô nye. Ve Yésus a nga viane lumbu si a kañe minten e tyia a ônyu.

⁷ Mbôle be nga yak a kee nye minsili ôsu, e nde a nga nyokane tetele a jô be na: E môte ya be mia a ne teke *abé éziñ, nye a taté'é ñhe lume minga akok.

⁸ Ane a nga beta fe lumbu si, a kañe minten e tyia.

⁹ Awô'ô be nga wô'ô njôan ôte, be nga ke ba ke wua wua, a taté minnôm mi bôt a kui ba ya susu'a, mi tele ôsu, Yésus a li'i étam, minga ki a tele nseñe zañ.

¹⁰ E nde Yésus a nga nyokane tetele a jô nye na: A minga, be ntoo vé? Ye môt éziñ teke wo ve mekua'

¹¹ Ane a nga yalane na: Teke môt éziñ, a Nti. Yésus nye na: Ja'a ma me nji ve wo mekua, kele ñhe, ve da ataté éyoñe ji, te beta bo *abé.

Yésus ya si nyô

¹² E nde Yésus a nga beta kobô be a jô na: Ma me ne éfufub ya *si nyô, e môt a tôñe ma, aa ye ke wulu e dibi été, ve a ye bi éfufub ya ényiñ.

¹³ Ane Befarizieñ be nga jô nye na: Wo tyi'i womiene mva'a, e mva'a wo tyik a nji bo bebela.

¹⁴ Yésus k'a nyoñe ñhe nkobô a jô be na: Nge ma tyi'i mamiene mva'a, e mva'a ma tyik a ne bebela, amu ma yem e mfa'a ma so a mfa'a ma ke; ve mia mi nji yem to'o mfa'a ma so, to'o mfa'a ma ke.

¹⁵ E mfa'a wônan, mia tyi'i mam ntyi'ane ya minsôn, ve me kik me nji tyi'i ajô môt.

¹⁶ A nge ma tyi'i ki ajô éziñ, ntyi'ane wom ô ne bebela, amu me nji bo étam, ve me ne bia Esaa wom a nga lôme ma.

¹⁷ E kalate metiñe wônane miabebien été, e ne ntilane na e mva'a bôte bebaé ba tyik a ne bebela.

¹⁸ Ma tyi'i fo'o mamiene mva'a, a Esaa wom a nga lôme ma fe a tyi'i mva'a ya be ma.

¹⁹ E nde be nga jô nye na: Esaa wôé a ne vé? Ane Yésus a nga yalane na: Mi nji yeme ma nge ki Esaa wom; nge mi nga yeme ma, ve nge mi nga ye fe yeme Esaa wom.

²⁰ A nga kobô mejô mete a to'o vôm éwolo akum é mbe, a ye'ele'e bôt e Nda Zambe été. Ve môt éziñ a nji bi nye, amu valé awolo dé e ngenane teke kpwaan.

Mfa'a ma ke, mi vo'o zu wé

²¹ Ane Yésus a nga beta jô be na: Ma zu ke, a mia ye jeñe ma, mia ye mane wu e *abé denan été; a na, e mfa'a ma ke, mi se ngule ya zu wôé.

²² Beyude be nga ke ba kobô na, ye a ye wôé émien, éyoñ a jô jina na, e mfa'a ma ke, mi se ngule ya zu wôé'

²³ E nde nye ki a nga jô be na: Mi mi ne bôte ya *si nyô, me ki me ne môte ya yôp; mi mi ne bôte ya si ndône mu, me me nji bo môte ya si ndône nyô.

²⁴ Me kateya mia na mia ye mane wu e minseme mienan été. Amu na nge mia bo te buni na ME NE, mia ye fo'o wu e minseme mienan été.

²⁵ Ane be nga sili nye na: O ne ne za? Yésus a nga jô be na, ve jam me nga kobô fe mia ôsusua.

²⁶ Me ngenane me bili mam abui ajô denan e me ma yiane kobô a tyik, e môt a nga lôme ma a ne bebela, mamiene ki, e mame me nga wô'ô be nye, mame mete e me ma kobô *si nyô.

²⁷ Ve da be teke yeme wô'ô na a kobô be ajô ya be Esaa.

²⁸ Ane Yésus a nga jô be na: Eyoñe mia ye bete Mone Môt e yôp, éyoñe te mia ye yeme na ME NE, amu me nji bo jam éziñ a mamien étam, ve avale mame Tate a nga ye'ele ma, avale te nde ma kañete.

²⁹ Amu na, e Môt a nga lôme ma bia nye bi ne; a ne te li'i ma étam, ajô te e mam a wô'ô nleme mvaé, e me ma bo éyoñ ése.

³⁰ Eyoñe a kobôya mame ma, bôte abui be nga buni nye.

Bebelaa ye bo mia beti

³¹ E nde Yésus a nga jô Beyude be nga buni nye na: Nge mia wulu e ñye'elane wom été, mia ye bo beyé'é bame bebela,

³² a mia ye fe yeme jôm é ne bebela, a bebela ate a ye bo mia beti.

³³ Ane be ki be nga yalane nye na: Bi ne mvoñ bôt Abraham, a bi ngenane te tame bo *ôlo môt to'o *môs éziñ; ô ne jô aya na mia ye bo fili'

³⁴ Yésus a nga yalane be na: Bebela, bebela fo'o ma kate mia na e môt ase a bo *abé a ne *ôlo ya *abé.

³⁵ Olo ô nji tabe *nda atabatabe, mone ya *nda e nye a tabe atabatabe.

³⁶ Ajô te, nge Mon e nye a ve mia éto fili, mia ye fo'o bo fili.

³⁷ Ma yeme fo'o na mi ne mvoñ bôt Abraham, ve da mia jeñe na mi wôé ma, amu mejô mam me nji yen éto e be mia.

³⁸ E mame me nga yen e be Esaa wom, e me ma kobô; ve mia ki mia bo e mame mi nga wôk e be ésaa wônan.

Esaa wônan a ne Satan

³⁹ Ane be nga nyoñe nkobô a jô nye na: Abraham nye a ne ésaa wongan. Yésus nyee be na: Nge mi ne fo'o bone be Abraham, bo'one ñhe mimboone mi Abraham.

⁴⁰ Ve éyoñe ji mia viane jeñe na mi wôé e ma me ne môt me nga kate mia e bebela me nga wô'ô e be Zambe; Abraham a nji bo nalé.

⁴¹ Mia bo mimboone mi ésoo wônan. Ane be nga jô nye na: Bi nji bialé ébamba bi bili, Esaa wuwua ve Zambe.

⁴² E nde Yésus a nga jô be na: Nge Zambe a too bo mia Esaa, ve nge mi nga ye nye'e ma, amu tine jam me nga so é ne be Zambe, a me soya; amu me nji ke so a ngule jam mamien, e nye a nga lôme ma.

⁴³ Ve amu jé mi nji yeme wô'ô nkobô wom, fo'o ve amu mia kate wô'ô mejô mam.

⁴⁴ Esaa wônan, a ne Satan, a mia jeñe na mi bo mbia minkômbane mi ésaa wônan. Satan a ne ñwôé bôt aso atata'a, a nji bi étaba'a e bebela été, amu bebela a nji bo e be nye. Eyoñ a laa minsos, a kobô mame mé émien, amu a ne nlaaminsos, a ésaa ya minsos.

⁴⁵ Ve ma ma kobô bebela, mi nji yebe ma.

⁴⁶ Za éziñ ya be mia a ne lañe ma ébu'u y'ajô nsem? Nge ma kate mia bebela, v'amu jé mi nji buni ma'

⁴⁷ E môt a so be Zambe, a wô'ô mejô me Zambe; ajô te ñhe mi nji wôk, amu mi nji so be Zambe.

Abraham a za bialé'é, me too

⁴⁸ Ane Beyude be nga nyoñe nkobô a jô na: Ke bia kobô bebela ane bia jô na ô ne mone Samari, a na ô bili mbia *nsisim'

⁴⁹ E nde Yésus a nga yalane na: Me nji bi mbia *nsisim, a ma ko Esaa wome woñ, ve mfa'a wônan, mia biasé ma.

⁵⁰ Mfa'a wom, me nji jeñe duma dam; e môt a jeñe de, a tyi'i fe mbamba mva'a a ne.

⁵¹ Bebela, bebela fo'o, ma kate mia na, nge môt a ba'ale mejô mam, aa vo'o yen awu akekui nnôm éto.

⁵² Ane Beyude be nga jô nye na: Eyoñe jina ñhe bi yemeya fo'o na ô bili mbia *nsisim. Abraham a wuya, bekulu mejô fe, ve wô wo jô na, nge môt a ba'ale mejô mam, teke na a ye ve'ele tye'é jam éziñe ya awu akekui nnôm éto.

⁵³ Ye wo dañ ésaa wongan Abraham, nye a nga wu? A bekulu mejô be nga mane wu? Wo kômbô tele telé womien été évé'

⁵⁴ E nde Yésus a nga yalane na: Nge ma ve mamiene duma, e duma dam e ne zezé; Esaa wom e nye a ne môt a ve me duma, e Nyô mia jô na a ne Zambe wônan,

⁵⁵ ve mi nji yeme nye, ma ma yeme nye. A nge ma jô na me nji yeme nye, ma ye bo nlaa minsos, aval ane mia. Amu ma yeme nye, me ba'ale'e fe mejô mé.

⁵⁶ Abraham a nga jaé a mefôn amu na a ye yene môse wom; ane a nga yen wô, a nga fôn.

⁵⁷ E nde Beyude ki be nga jô nye na: Mimbu mewôm metaan ô ngenane teke bi, ve Abraham nye ô nga yen'

⁵⁸ Ane Yésus a nga jô be na: Ma bele fo'o ane ma jô mia na, te yen Abraham a za biaé'é, me me too.

⁵⁹ E nde be nga nyoñe *mekok na ba lume nye. Ane Yésus a nga sobô, a kolô Nda Zambe été.