YOANES 6 - Kalate Zambe Nnomo a Mfefe Mfefé Nkôñelan

Yésus a ve bizu'u bi bôte bidi

¹ E mvuse valé, ane Yésus a nga téé a dañe mañe me Galilé ya Tibériad, e kindi'i ya yat.

² Nkunda bôt anen wo zu wo tôñe nye, amu be nga yen bitua bi mam a nga bo e be minkôkon.

³ E nde ñhe Yésus a nga ke e nkôle yôp, a ntoo wé, baa beyé'é bé.

⁴ Valé Pak é ntoo bebé, abô'ô Beyude.

⁵ Eyoñe Yésus a lômeya mis a lôbô, a yen ane beta nkunda bôt a zu be nye, e nde a nga jô Filip na: E ne bia ye ke kuse belet vé na bôte ba be di'

⁶ A nga jô nalé a ve'ele nye; amu émien a mbe a yemek jam a ye bo.

⁷ Ane Filip a nga yalane nye na: Belet tañe bedenié mintete mibaé, é vo'o yiane môt ase na a nyoñe ve mon ôfus.

⁸ E nde ñye'é wé wua, André, monyañe Pierre a zu jô na:

⁹ Mongô éziñ a ne va, a bili belet étaan a kos ébaé: ve jôme té é ne jé asu abime abui bôte di'

¹⁰ Ane Yésus a nga jô na: Jo'ane bôt e si. Bilo'o bi mbe abui vôm ate. E nde ñhe beyôme befam, tañe bebé toyini étaan, be nga mane tabe si.

¹¹ Ane Yésus a nga nyoñe belet nyô, a mane ve akéva, a ye kab je bôte be nga tôtoone si, kose fe avale da, abim ese be nga kômbô.

¹² Eyoñe be maneya jaé, e nde a nga jô beyé'é bé na: Kelane mia to'é afufus ese da te buk, jôm éziñ é bo te ja ntuk.

¹³ Ane be nga tôkane afufuse nga buk, e belet étaan ya bôte ba be nga di, be jalé minkoé awôm a mibaé.

¹⁴ Ayene be nga yen étua jam a nga bo, bôte be nga ke ba jô na: E bebela, e môte nyô e nye a ne *nkulu mejô a zu e si ndôn.

¹⁵ Eyoñe Yésus a yemeya na ba kômbô zu bi nye a ngule na be tele nye njô bôt, ane a nga kôlô valé a sôlan, a beta bulan e nkôle yôb émien étam étam.

Yésus a wulu e mendim me mañ yôp

¹⁶ Eyoñe ngô'é é boya, ane baa beyé'é bé be nga siliki e mfa'a ya mañ

¹⁷ be kele dañe éfunga été a ke e kindi'i mañe ya Kapernawum. Dibi e maneya vin, Yésus a ngenane teke zu koone be,

¹⁸ ngul évuñulu kik é nga vuñ e mañ été va.

¹⁹ Eyoñe be fuleya éfunga e nté bestad mewôm mebaé a betaan, nge mewôm melale kik, ane be nga yene Yésus a za'a a wulu e mañe mañ yôb a ntoo bebé a éfunga, e nde be nga ko woñ.

²⁰ Ane a nga jô be na: Mamiene le, te koone woñ.

²¹ Be nga kômbô ñhe na be nyoñe nye éfunga été, a été été, ane éfunga é nga kui kindik, vôm be nga ke.

Yésus a ne bidi ya ényiñ

²² Bia-tyé, e nkunda bôt ô mbe ô tele e kindi'i mañe ya yat, be nga yene na éfunga éfe é nji bo vôm ate, fo'o ve jia jia, a na Yésus baa beyé'é bé be nji dañ éfunga jia, beyé'é be nga ke fo'o v'étam étam.

²³ Ane bifunga bife bi nga ke so e Tibériad a zu bebé a vôme bôte be nga di bidi éyoñe Nti a nga mane ve akéva.

²⁴ Eyoñe nkunda bôte wuna ô nga yene na Yésus a nji bo valé, ja'ane beyé'é bé, ane be nga dañ e bifunga bite a ke ba jeñe Yésus e Kapernawum.

²⁵ Ayene be nga yene nye e kindi'i mañe ya yat, ane be nga jô nye na: A Rabbi, wo te zu vana éyoñ évé'

²⁶ E nde Yésus a nga nyoñe nkobô a jô be na: E bebela, bebela émien, ma jô mia na, mia jeñe ma sake amu na mia te yene bitua bi mam, v'amu na mia te di belet a jaé.

²⁷ Bo'an ésaé bidi, sake bidi bia ndaman, ve bidi bia tabe akekui ényiñe ya nnôm éto, bidi Mone Môt a ye ve mia, amu e nye Zambe Esaa a nga kpwele ndem.

²⁸ E nde ñhe be nga jô nye na: Bia yiane bo jé ane bia ye bo bisaé bi Zambe'

²⁹ Ane Yésus a nga yalane be na: Esaé Zambe é ne na mi buni'i e môt Zambe a nga lôm.

³⁰ E nde be ke be nga jô nye na: Ndeme éziñ fé wo bo na bi yen a buni wo? Jé fo'o wo bo'

³¹ Amu na b'ésaa bangan be nga di *manna e fé été, avale Ntilan ô ne na: Me nga ve be belet ja so yôb na be di.

³² Ane Yésus a nga jô be na: E bebela, bebela émien, ma kate mia na, sake Môze nye a nga ve mia belet ja so yôp, Esaa wom e nye a ve mia benyaa bidii ba so yôp.

³³ Amu na belet Zambe e nje é ne môt a so yôb a zu ve si ndôn ényiñ.

³⁴ E nde be nga jô nye na: A Nti, ke wo ve ñhe fo'o bia belet éte kom ése.

³⁵ Ane Yésus k'a nga jô be na: Ke ma me ne belet ya ényiñ, e môt a zu be ma, aa ye wô'ô zaé, a môt a buni ma, aa ye wô'ô évé ne tya.

³⁶ Ke me nga mane kate mia, mi yene fe ma, ve mi teke buni.

³⁷ E bôte bese Tate a ve ma ba ye zu e be ma, a môt ase a zu be ma maa ye wua nye atan,

³⁸ amu me nga so yôp, sake na me bo nkômbane wom mamien, ve nkômbane môt a nga lôme ma.

³⁹ E nkômbane môt a nga lôme ma kik ô ne na, e bôte bese a nga ve ma, me bo te ve'ele jañele wua ya été, ve na me wômôlô be bese e môse wo ye su'ulan.

⁴⁰ Amu na nkômban Esaa wom ô ne na, e môt ase a yene Mon a buni fe nye, a bi ényiñe ya melu mese, a mamien ma ye wômôlô nye e môse wo ye su'ulan.

⁴¹ Beyude be nga ke ñhe ba so'o nye amu a nga jô na: Ma me ne belet ja so yôp,

⁴² be nga ke ba kobô na: Ye sake Yésus mone Yôsep nyô, e nye bia bebien bia kôme yem ésaa baa nyia? Ve amu jé a nga zu jô éyoñe jina na, me nga so yôp'

⁴³ E nde Yésus a nga nyoñe nkobô a jô be na: Te mia kôsa ke mia nyiñ.

⁴⁴ Teke'e ne môt éziñ a ne zu be ma nge Tate a nga lôme ma a nji zu a dutu nye, a mamien ma ye wômôlô nye e môse wo ye su'ulan.

⁴⁵ Amu Ntilan ô ne e bekalate bekulu mejô na: Bôte bese ba ye nyoñe ñye'elane Zambe. E môt ase a maneya wô'ô mame ma so be Tate a nyoñe ñye'elan été, môt ate nye a zu be ma.

⁴⁶ Môt éziñ a nji yene Tate, nga fo'o ve nyô a nga so be Zambe, e nye a nga yene Tate.

⁴⁷ Bebela, bebela émien, ma kate mia na, e môt a buni e nye a bili ényiñ ya nnôm éto.

⁴⁸ Ma me ne bidi ya ényiñ.

⁴⁹ Bésaa benan be nga di *manna e fé été, e nde fe be nga mane wu.

⁵⁰ Ve belet nyuna kik é ne bidi bia so yôb na, e môt a di je a bo teke wu.

⁵¹ Ma me ne vevea belet a nga so yôp; nge môt éziñ a dii belet éte, a ye bi ényiñ ya nnôm éto, e nde fe e belete ma ye ve é ne minsône miam asu ényiñe ya si nyu.

⁵² Beyude be nga ke ñhe ba wôman e zañe jab a jô na: Aval avé môte nyô a ne ngule ya ve bia minsône mié na bi di'

⁵³ Ane Yésus a nga jô be na: Bebela, bebela émien, ma kate mia na, nge mi teke di minsône mi Mone Môt, a nyu fe metyi mé, ényiñ é se ngul ya bo be mia.

⁵⁴ E môt a di minsône miam a nyu fe metyi mam a bili ényiñe ya nnôm éto, a mamien ma ye wômôlô nye e môse wo ye su'ulan.

⁵⁵ Amu minsône miam mi ne benya bidii, a metyi mam me ne benya menyuu.

⁵⁶ E môt a di minsône miam a nya'a fe metyi mam e nye a too be ma, a ma fe me too be nye.

⁵⁷ Aval ane Tate a bili ényiñ a nga lôme ma, ajô te ma nyiñ amu Tate, avale te fe e môt a di ma, nye fe a ye nyiñ amu ma.

⁵⁸ E belete nyô é ne nyô é nga so yôp, sake aval ane nyô betate benan be nga di, be mane fe wu, e môt a di belete nyô a ye nyiñ ényiñe ya melu mese.

⁵⁹ E mame ma a nga kobô a ye'ele'e bôt *aba Zambe ya Kapernawum.

Mejô ya ényiñ ya nnôm éto a Nti, bia ke be za mfe

⁶⁰ Beyé'é bé abui, éyoñe be maneya vô'ôlô nye, be nga jô na: Nkobô wu ô ne ayet; za a ne wô'ô wô'

⁶¹ Eyoñe Yésus a yemeya e nleme wé été na beyé'é ba so'osane nye ajô te, ane a nga jô be na: Ye jame di da kolé mia ôbak'

⁶² E nga ye ke kui aya nge mi nga ye yene Mone Môt a betek a ke yôb mfa'a a nga taté tabe'

⁶³ Nsisime ñwô wo ve ényiñ, ve minsôn mi nji volô jôm éziñ; e mame me nga kobô mia me ne *nsisim, me too fe ényiñ.

⁶⁴ Ve bôte b'éziñ be ne be mia, be ne teke buni; amu Yésus a mbe a yemek aso atata'a beza be mbe te buni a za a ye koñe nye.

⁶⁵ E nde a zu jô na: Ajô te ñhe me nga kate mia na, teke môt éziñ a ne zu e be ma, nge a nji nyoñe jame te ane ngab e be Tate.

⁶⁶ A taté éyoñ éte, beyé'é bé bevo'o abui be nga lume nye mvus, teke fe ve'ele beta wuluu nye nsamba.

⁶⁷ E nde ñhe Yésus a nga jô beyé'é awôm a bebaé na: Ye mia fe mia kômbô kôlô a ke'

⁶⁸ Ane Simon Pierre a nga yalane nye na: A Nti, bia ye ke e be za mfe? Ke wo ô bili mejô m'ényiñe ya nnôm éto,

⁶⁹ e nde fe na, mfa'a wongan, bi maneya buni a bi yemeya na wo ô ne Mfufubu Zambe.

⁷⁰ Ane Yésus a nga yalane be na: Ye mamien me nji tob mia bôt awôm a bebaé? Ve, môte wua ya be mia a ne *satan.

⁷¹ A nga kobô ajô Yudas, mone Simon Iskariôt; amu e nye a ye koñe nye, a too fe môte wua ya beyé'é awôm a bebaé.