YOANES 4 - Kalate Zambe Nnomo a Mfefe Mfefé Nkôñelan

Yésus baa minga ya Samari

¹ Eyoñe Yésus a nga yeme na Befarizieñ be wô'ôtaneya na Yésus a nga bi beyé'é abui a du fe bôt abui alôte Yôanes,

² ve bebela a too na sake Yésus émien e nye a mbe a du bôt, beyé'é bé e mbe be mbe be du bôt.

³ E nde Yésus a nga kôlô e Yudé a bulane ke e Galilé.

⁴ A nga to na a ke tulan e Samari.

⁵ Ane a nga ke kui e tisone ya Samari é to jôé na Sikar, bebé a si Yakob a nga ve Yôsep, mone wé.

⁶ Anjeñe Yakob e mbe vôm ate. Eyoñe Yésus a te'eya a dulu, e nde a nga tabe si e nkôm anjeñ; bebé awolo samane.

⁷ Minga éziñ ya Samari a nga zu lab mendim. Ane Yésus a nga jô nye na: Va'a ma mendim ya nyu.

⁸ Beyé'é bé kik be maneya ke e tisone na ba ke kuse bidi.

⁹ E nde minga ya Samari a nga jô nye na: A nto aya, wo mone Beyude, wo sili ma ngone Samari mendim ya nyu? Amu Beyude baa be bôte ya Samari be ne te fulane mam.

¹⁰ Ane Yésus a nga nyoñe nkobô a jô nye na: Nge wo too yeme éfa'a Zambe a yeme fe môt émien a jô wo na: Nyu'u me mendim, ve ô ye viane ja'aja'é nye, a nye ki a te ye ve wo mendime m'ényiñ.

¹¹ E nde minga k'a nga jô nye na: A Nti, wô teke nlônga ya labe wô, anjeñ k'édok, wo ye soo mendime m'ényiñe vé'

¹² Ye wo dañ ésaa wongan Yakob, e nye a nga ve bia anjeñe di, émien a nga nyu fe de baa be *bon a biyeme bié'

¹³ Ane Yésus a nga yalane nye na: E môt ase a nyu mendime ma a ye beta wô'ô évé.

¹⁴ Ve nyu ki a ye nyu mendim ma ye ve nye, a ye bo te fe beta wô'ô évé akekui nnôm éto; amu mendim ma ye ve nye, ma ye bo nye anjeñ e nleme wé été, e nde da kui mendime m'ényiñe ya melu mese.

¹⁵ E nde minga a nga jô nye na: A Nti, ke wo ve ñhe fo'o me mendim mete, me bo te beta wô'ô évé nge zu ke labe mendime vana.

¹⁶ Ane Yésus a nga jô nye na: Kele loone nyônnôm, ô beta zu va.

¹⁷ E nde minga a nga yalan a jô nye na: Me nji bi nnôm; ane Yésus a nga jô na: Wo kobô mvaé na me nji bi nnôm.

¹⁸ Amu na ô biya beyôme betaan, ve nyô ki ô bili éyoñe ji a nji bo nyonnôm: vôm ate nye wo kobô bebela.

¹⁹ E nde minga a zu jô nye na: A Nti, ma yene na ô ne *nkulu mejô.

²⁰ B'ésaa bangan be nga kañe Zambe e nkôle wuna, ve mi mia viane jô na, e vôme ba yiane kañe Zambe a ne Yérusalém.

²¹ Ane Yésus a nga jô nye na: Buni'i ma, a minga, amu éyoñ da zu e nje mia ye bo teke fe kañe Tate ja'ane e nkôle yôb va, nge ki Yérusalém.

²² Mfa'a wônan, mia kañ e jôme mi nji yem; ve mfa'a wongan, bia kañ e jôme bia yem, amu nyian ô ne jôme ja so e Beyude.

²³ Ve awolo da zu, e soya ke so, éyoñe bôte ba kañe Zambe nya nkañane ba ye kañe Tate a *nsisim a bebela; amu Tate a yi na avale bôte te e kañe nye.

²⁴ Zambe a ne *nsisim, a bôte ba kañe nye, ba yiane kañe nye a *nsisim a bebela été.

²⁵ E nde minga a nga jô nye na: Ma yeme na Mesie a ye so, a to jôé na Krist; éyoñe Mesie ate a ye so, a ye kate bia mam mesese'e.

²⁶ Ane Yésus a nga jô nye na: Ke ma te ma kobôô wo nyô.

²⁷ Be la'ane nalé, e nde beyé'é bé ba zu suan, be nga semé fo'o na baa minga ba laane minlañ. Ve teke môt éziñ a nga jô na: Wo sili nye jé, nge na mia nye mia laane jé'

²⁸ Ane minga a nga li'i nka'a mendim wé ô tele, a kele tison, a nga ke a jô bôte na:

²⁹ Za'ane yenane môt a te mane kate ma e mame mese me nga bo: ye sake nye a ne bo Krist nga'

³⁰ E nde bôte be nga ke so e tison a zu be Yésus.

³¹ E zañe valé, beyé'é be nga ye'elane nye be jô'ô na: A Rabbi, ke wo tame ñhe di!

³² Ane nye k'a nga jô be na: Bidi ma yiane di, mi nji yeme bie.

³³ Beyé'é be nga ke ba sili zañe jab na: Ye môt éziñ a ne nye mveane jôme ya di'

³⁴ E nde Yésus a zu jô be na: Bidi biam bi ne na ma yiane bo nkômbane môt a nga lôme ma, a tu'a kôme bo ésaé jé.

³⁵ Ye miaa jô ke na, den ngon ényin, mekoé bidi ma ye taté? Ajô te ma jô mia na, lômane mis, mi fombô'ô, amu mefub me nto éfumulu ne fuum a bitôtôlô bidi ya koé.

³⁶ E nyô a koé bidi a nyoñeya ma'an a kôane fe bibuma asu ényiñ ya melu mese, e môt a mias a nga yene ñhe avak baa môt a koé avale da.

³⁷ Bebela ébuk a ne vôme nyôna, môte mfe nye a mias, e mfe ki e nye a koé.

³⁸ Me nga lôme mia mi ke koé e jôme mi nji wu njuk; bôte befe be nga mane wu njuk, ve mia ki mi nga zu fubu e vôme be nga wu njuk.

³⁹ E tisone, éte été, bôt abui ya nsamba Besamariteñ be nga buni nye amu nkobô minga a nga ke a kañete na, a maneya kate ma e mame mese me nga bo.

⁴⁰ Eyoñe Besamariteñ be nga zu kui e be Yésus, ane be nga ye'elane nye na a tabee e be be; e nde a nga tabe valé tañe melu mebaé.

⁴¹ Bôte be nga dañe beta buni amu ñye'elane wé émien,

⁴² be nga jô minga ate na, bi nji fe beta buni amu nkañetane wôé, amu na bia bebien bi wô'ôya, bi yemeya fe na môte ate e nye a ne Nyii bôt ya si ndôn.

Yésus a saé mon évet bezimbi njô bôt

⁴³ E mvus melu mete mebaé, ane a nga kolô vôm ate a ke e Galilé.

⁴⁴ Amu Yésus émien a nga kôme jô na, e *nkulu mejô a nji bi ésemen e si jé émien.

⁴⁵ Akui a nga ke kui e Galilé, bôte ya Galilé be nga nyoñe nye, amu be nga yen e mame mese a nga bo e Yérusalém e *môs abôk, amu na be fe be nga too abô'ô té.

⁴⁶ E nde a nga beta ke e Kana ya Galilé, e vôm a nga kôñelane mendim woon. Nde môt éziñ a mbe Kapernawum valé, a too évet bezimbi be njô bôt, mone wé a konôk.

⁴⁷ Eyoñe môt ate a wô'ôya na Yésus a soya e Yudé a kele e Galilé, ane a nga ke e be nye a ye'elane nye na a siliki a ke saé mone wé, amu a nto bebé ya wu.

⁴⁸ Ane Yésus a nga jô nye na: Nge mi te yene bitua bi mam a mendem, mi teke buni.

⁴⁹ E nde évet bezimbi é nga jô nye na: A Nti, jika'a siliki, nté mone wom a ngenane te wu ma.

⁵⁰ Yésus nyee nye na: Kele wo ke, nyo mon a vee. Ane môt ate a nga buni éfia Yésus a nga jô nye, e nde fe a nga ke.

⁵¹ A ngenan a siliki'i, ane bebo bisaé bé be nga zu tôbane nye, a kate nye na: Nyo mon a nyiñeya.

⁵² E nde a nga sili be awolo mongô a nga bo mvo'é; ane be nga jô nye na: Angô'é, awolo zamgbwale, ane ayôñ e nga mane nye nyôl.

⁵³ Eyoñe té ésaa mon a nga simesane na, awolo te ebien, e nde Yésus a nga jô nye na: Nyo mon a vee, ane môt ate a nga buni, baa ngumba *nda wé ôse.

⁵⁴ Jina é ne étua jame di e ne di baa Yésus a nga beta bo, a so'o e Yudé a kele e Galilé.