YOANES 20 - Kalate Zambe Nnomo a Mfefe Mfefé Nkôñelan

Ñwômane Yésus

¹ E *môs ôsu ya sondô, e nde Marie ya Magdala a nga téé ésala tyé, dibi e ngenan, a ke kui e soñ a yene na ako'o e vaseya soñ.

² Ane a nga ke mbil a ke yene Simon Pierre baa ñye'é mbok, e nyô Yésus a mbe a nyeke'e, a kate be na: Be vaaya Nti e soñ, a bi nji yem e vôme be keya nye.

³ E nde Pierre a nga téé baa ñye'é mbo'o ate, a ke e soñ.

⁴ Be mbe be kele mbi, bese bebaane; ve ñye'é mbok a nga ke mbil avô a dañe Pierre, a taté ke kui e soñ;

⁵ e nde a nga lumbu si a yene bibab biyé bi bôô, ve da nye teke nyiin.

⁶ Eyoñe Simon Pierre a nga zu a tôñe nye mvus nye fe a kuiya, ane a nga nyiin e soñ été, a yene fe bibab biyé bi bôô,

⁷ a ndombo be nga vul Yésus e nlô é bôô mvulan ngume vôm étam, baa bibab biyé teke bômbô vôma wua.

⁸ Eyoñe te ñhe ñye'é mbo'o a nga taté ke kui soñ, nye fe a nga nyiin. Ane a nga yen, ane a nga buni.

⁹ Amu valé be ngenan teke yem ntilan wo jô na: A yiane wômô a kôlô'ô miñwuan.

¹⁰ E nde beyé'é be nga bulane menda map.

Yésus a yené e be Marie ya Magdala

¹¹ Ve Marie a nga li'i a tele fefele soñe atan, a yiik. E ñyône zañe valé, ane a nga lumbu si a bôt e soñ été.

¹² E nde a nga yene b'éngele bebaé be be'e bifumulu biyé, be too si vôm mbim Yésus ô nga bôô, wua e mfa'a ya nlô, nyô mbok e mfa'a ya mebo.

¹³ Ane be nga jô nye na: A minga, wo yône jé? E nde nye k'a nga yalane be na: Amu be zuya vaa Nti wom, a me nji yem vôm be keya bôé nye.

¹⁴ Aman a nga mane kobô nalé, ane a nga bu'u *tyiñ a fombô mvus a yene Yésus a tele, ve nye teke yeme na Yésus le.

¹⁵ E nde Yésus a jô nye na: A minga, wo yône jé? Wo jeñe za? Mbôl a nga si'a ko na a ne mbo ésaé ya afup, ane a nga jô nye na: A monti, nge wo wo te to'é nye, kate ma vôm wo te ke bôé nye, mamien ma ye ke be'e nye.

¹⁶ Ane Yésus a nga jô nye na: A Marie! E nde nye k'a nga kôñelan a jô nye e *nkobô Hébre na: A Rabbuni (e ne na, a ñye'ele).

¹⁷ E nde Yésus a nga jô nye na: Te nambe ma! Amu me ngenan te bet be Tate. Kele ñhe yene bobenyoñ ô kate be na ma bet a ke be Esaa wom a Esaa wônan, e be Zambe wom a Zambe wônan.

¹⁸ Ane Marie ya Magdala a nge ke, a kate beyé'é na: Me yeneya Nti, a kate fe be mam a nga jô nye.

Yésus a yené e be Beyé'é

¹⁹ Môs ôte ôbien, éyoñe ngô'é é boya, e *môs ôsu ya sondô te, mimbé mi too mimfetan e vôme beyé'é be mbe, amu be nga ko Beyude woñ, ane a nga so, a ntele be zañ a jô be na: Mvo'é é bo'o a mia!

²⁰ Ane a nga mane jô nalé, a nga liti be mo a mvaé. Beyé'é be nga vak, amu ñyenane ba yene Nti.

²¹ E nde a nga beta jô be na: Mvo'é é bo'o a mia! Aval Tate a nga lôme ma, ma fe ma lôme mia.

²² Akobô a nga mane kobôô be nalé, ane a nga kute be mvebe e nyôl a jô na: Nyoñan Mfufub Nsisim.

²³ E bote bese mia ye jamé mam *abé, mam mete me jambaneya, e ba ki mia bo te jamé, a ba'ale minsem miab, mia tabe mba'alan.

Yésus baa Thomas

²⁴ Thomas, wua ya nsamba beyé'é awôm a bebaé, nyô ba loone na Didimi, nye a nji tabe a ba bevok éyoñe Yésus a nga so.

²⁵ E nde ñhe Beyé'é bevok be nga jô nye na: Bi yeneya Nti. Ane nye k'a nga jô be na: Nge me te kôme yen bifele mesen e mo mé été, me me beme fe ônyu wom e bifel mesen été, me kôme fe nyiñili wo wom e mvaé jé été, me teke yebe.

²⁶ E mvuse melu muam, beyé'é be too e *nda été, Thomas a too fe a be. E nde Yésus a nga so, mimbé mimfetan, a ntele be ézezañ, a jô na: Mvo'é é bo'o a mia!

²⁷ E nde a jô Thomas na: Za'ak a ônyu wôé va, fombô'ô mo mam, same fe wo wôé a beté akule wo dôé e mvaé jam, te bo bisô, ve buni.

²⁸ Ane Thomas a nga yalane nye na: A Nti wom, a Zambe wom.

²⁹ E nde Yésus a nga jô nye na: Amu ô yeneya ma, e nde ô buniya! Ebotan a bôte be nji yen ve buni.

Nlô éfia ya Kalate Yôanes

³⁰ Yésus a nga bo fe bitua bi mam bife abui e mise beyé'é bé, ve me nji bo ntilan e kalate nyuna été.

³¹ Ve mana me ne ntilan amu mi bunii na Yésus a ne Krist, Mone Zambe, a na ane mi buni, mi bi ényiñ amu jôé dé.