YOANES 19 - Kalate Zambe Nnomo a Mfefe Mfefé Nkôñelan

¹ Ane Pilat a nga bendé na be nyoñe Yésus a ke bibi nye minkasa.

² Eyoñe te bezimbi be nga lôñe ékate biyo a jalé nye je nlô, be nyoñe fe évele alô'ô be jalé nye,

³ be ve subu nye bebé a jô na: Mbôlô ñhe, a njô Beyude Be nga bibi fe nye mebaé.

⁴ E nde Pilat a nga beta kui atan a jô be na: Mi lôô, ma zu mia nye liti atane mu mi yeme na me nji yen to'o ajô éziñ da ve nye mekua.

⁵ E nde Yésus a nga ke e nseñ, a be'e ékate biyo a njombo évele alô'ô wu. Ane Pilat a nga jô be na: Mi lôô môt ate!

⁶ Eyoñe minlô betuni a beba'ale bap be nga yene nye, ane be nga yôtane yôb été a ngule na: Bômôlô'ô nye *krôa, bômôlô'ô nye *krôa! Ane Pilat a nga jô be na: Mia bebien nyoñane nye mi ke bômôlô nye *krôa. Amu mfa'a wom, me me nji yene nye ajô éziñ.

⁷ E nde Beyude be nga yalane nye na: Bia bebien bi bili *atiñ, a njôane ya atiñe te, a yiane wu, amu a nga bo émien mone Zambe.

⁸ Eyoñe Pilat a wô'ôya nkobô te, woñ ô nga viane bi nye,

⁹ ane a nga bulane ke *nda été a jô Yésus na: Wo so so vé? Yésus teke fo'o ve nye éyalan éziñ.

¹⁰ Ane Pilat a nga jô nye na: Wo ku ma évôl a? Ye ô nji yeme na me bili ngule ya suu wo, me bili fe ngule ya bo na be bômôlô wo *krôa'

¹¹ E nde Yésus a nga yalane nye na: O nji ke ye bi mone ngul éziñ e be ma, nge é nji bo mveane ya yôp. Ajô te, e môt a nga kee me wo, e nye a be'e nseme wo beta dañ anen.

¹² Ataté éyoñ éte Pilat a nga jeñe mezene ya suu nye. Ane Beyude be nga yôtane yôb été na: Nge wo suu nye, wôna ô nji bo mvôé Kaiza. E môt ase a telé émien njô bôt a wosane Kaiza.

¹³ Awô'ô Pilat a nga wô'ô be kobô'ô nalé, ane a nga kee Yésus e nseñ, a tabe éto ntyi'ane mejô vôm ba loone na Lithôstérôtôs, e *nkobô Hébre ke na Gabatha.

¹⁴ A mbe éyoñe ngômesan Pak, bebé awolo samane. E nde ñhe Pilat a nga jô Beyude na: Mi lôô njôô wônan, e nye ñhe nyô.

¹⁵ Ve be ki be nga viane yôtane e yôb été na: Ayiane wu, kelee nye, bômôlô'ô nye *krôa! Ane Pilat a nga jô be na: E njô wônan, ye me tyelé nye *krôa? E nde minlô betuni mi nga yalane na: Bi nji bi njôô, mfe fo'o ve Kaiza.

¹⁶ Ane a nga nyoñe ñhe nye a ve be nye na be ke tyelé nye e *krôa. E nde ñhe be nga nyoñe Yésus a ke nye.

Ba tyelé Yésus e krôa

¹⁷ Ane émien a nga be'e *krôa jé a ke vôm a ne jôé na Ekôkoé nlô, e *nkobô Hébre ki na Gôlgôta.

¹⁸ E ne be nga tyelé nye *krôa valé, baa be bôte befe bebaé, nyôna li, nyôna ke li, Yésus ki ézezañ.

¹⁹ Ane Pilat a nga tili mon abam na be ke ba'aé nye de e *krôa yôp, ntilan ô mbe été na:

Yésus ya Nazarét, njôô Beyude

²⁰ Beyude abui be nga lañe mon abam ate, amu e vôme be nga tyelé Yésus e *krôa a mbe fo'o bebé a tison. Ntilane te ô mbe e *nkobô Hébre, nkobô Lateñ, a nkobô Grék.

²¹ E nde minlô betuni ya Beyude be nga jô Pilat na: Te wo tili na: Njôô Beyude; tili'i na: Emien a nga jô na me ne njôô Beyude.

²² Ane Pilat ki a nga yalane na: Avale me tiliya, e nde me tiliya.

²³ Bezimbi ki, éyoñe be maneya bômôlô Yésus e *krôa, ane be nga nyoñe mengômesane mé, a kabe me mengab menyiin, mone bezimbi ase ngab jia. Beta éwoman wé a mbe fe, éwomane te teke nloko'o, ntiñane ngumba ngumba aso yôp akui si.

²⁴ E nde ñhe be bebien be nga jô na: E mbo'an te nyab éwomane ji, bia zu viane do je abia bi yeme môt a ye nyoñe je. Nalé Ntilan ô nga tôéban ô jôô na: be nga kabane mengômesane mam; a éwomane jam, be nga do je abia. Mam bezimbi be nga bo mme ñhe le.

²⁵ Bebé a *krôa Yésus, e nyia wé a nga tele, a monyañe nyia; Marie nga Keléôpas a Marie ya Magdala.

²⁶ Eyoñe ñhe Yésus a yeneya nyia wé a ñye'é a mbe a nyeke'e a tele nye fefel, e nde a nga jô nyia na: A minga ô lôô, mone wôé le.

²⁷ Ane a nga jô fe ñye'é ate na: O lôô nyia wôé le. Ataté éyoñ éte, nye'é ate a nga nyoñe nye e *nda jé.

Awu Yésus

²⁸ E mvuse te, ayene Yésus a nga yene na mam mese me maneya, a na ntilan ô tôébaneya, ane a nga jô na: Ma wô'ô évé.

²⁹ Viek ô mbe ô tele valé, njalan a sañe woon. Ane be nga dub abusa e sañe woone été, be fane de ôlelé hisôp, be kele de Yésus anyu.

³⁰ Eyoñe Yésus a nyoñeya sañe woon éte, e nde a nga jô na: E maneya, ane a nga jomé nlô wé a suu *nsisim wé.

Ba jii Yésus akoñ e mvaé

³¹ Beyude ki, mbôl ngômesan Pak é mbe, a mfa'a ya na mimbim mi bo te langan e *krôa yôb e *môs Sabat ôte, amu môse Sabat ô mbe beta *môs, ane be nga ye'elane Pilat na be bu'u be mebo a suu be si.

³² E nde bezimbi be nga ke, be mane bu'u môt ôsu mebo, a môte mbok baa be be nga tyele Yésus e *krôa.

³³ Eyoñe be keya kui be Yésus, mbôl be nga yen a wuya, ane be nga bo teke bu'u nye mebo;

³⁴ ve mone bezimbi wua a nga jii nye akoñ e mvaé, ane metyi a mendim bi nga kui été été.

³⁵ E môt a nga yen e nye a nga kañete, a jam a kañete e ne bebela, a môt ate a yeme na e ne fo'o bebela, aval ya na mia bebiene fe mi buni'i.

³⁶ Mam mete me nga boban a tôéjalé ntilan ô ne na: Teke'e éves jé jia ja ye bu'i.

³⁷ A ntilan ôfe wo jô fe na: Ba ye fombô e môt be nga jii akoñ.

Ejamembime Yésus

³⁸ E mvuse ya valé, ane Yôsep ya Arimaté, mbôl a mbe ñye'é Yésus, ve asoé amu a nga ko Beyude woñ, a nga ye'elane Pilat na a ke nyoñe mbime Yésus. Ane Pilat a nga ve ngu. E nde a nga ke, a nyoñe mbim.

³⁹ Ane Nikôdém, e môt a nga tame ke be Yésus alu éziñ, nye fe a nga ke soo mbunda'ane mfu'ane mbone mire baa alôés, tañe kili mewôm mela.

⁴⁰ E nde ñhe be nga nyoñe mbime Yésus, be mane diñe wô a bibab biyé mmiaman a mimbone menyum, aval ane tume njamane mimbim Beyude é né.

⁴¹ Afôla be nga bômôlô Yésus e *krôa, afub e mbe valé, nalé fe mfefé soñ, afube te été, be ngenane te jam môt éziñ été!

⁴² Ane be nga jame Yésus valé, amu ngômesane abô'ô Beyude, a soñ éte ki é to bebé.