YOANES 18 - Kalate Zambe Nnomo a Mfefe Mfefé Nkôñelan

Nkoñan a mbiane Yésus

¹ Eyoñe Yésus a maneya kobô mejô mete, ane a nga téé, baa beyé'é bé, a dañ ôtôñ Kédroñ, afub e mbe vôm ate, Yésus baa beyé'é bé be nga nyin été.

² E Yudas a nga koñe nye a mbe fe a yeme vôm ate, amu Yésus baa beyé'é bé be mbe be kele wé biyoñ biyoñ.

³ E nde ñhe Yudas a nga nyoñe nsamba bezimbi a bekeminlôman be so'o be minlô Betuni a Befarizieñ, a kele be wé, be bili ngôé é yônôk, a belambe a bikpwelé mewosan.

⁴ Amu Yésus a nga yeme mam mete mese ma ye kui be nye, ane a nga ke tôbane be a jô be na: Mia jeñ za'

⁵ Ane be nga yalane na: Yésus ya Nazarét. E nde a jô be na: Ma te nyô. E Yudas a nga koñe nye a nga tele fe valé baa be be.

⁶ Eyoñe ñhe a jôya be na: Me nyô, ane be nga bulan mvumvua, be nga ke ba ku si si.

⁷ Ane a nga ba'alane sili be na: Mia jeñ za? E nde be nga jô na: Yésus ya Nazarét.

⁸ Ane Yésus a nga yalane na, ke me jôya mia na, me nyô. Nge ma fo'o mia jeñ, jôka'ane ñhe bôte ba, be be ke.

⁹ A nga jô nalé, ndemben njôan a nga jô wo ye tôéban na: E bôt ô nga ve ma me nji jañele ve wuwua ya été.

¹⁰ Mbôl Simon Pierre a nga bili nkpwaté mekôn, ane a nga té wô a bibi mbo bisaé nlô Ntuni, a tyi'i nye alo ya mbo nnôm. Mbo bisaé ate a to jôé na Malkus.

¹¹ Ane Yésus a nga jô Pierre na: Some nkpwaté mekôn wôé abam. E kob Tate a nga ve ma, ye me bo te nyu je'

¹² E nde ñhe nsamba bezimbi wu a njôô wob a bekeminlôman ya Beyude be nga bi Yésus, a mane ka'a nye ngata'a.

Yésus asu Anne nlô betuni

¹³ Ane be nga taté kee Yésus e be Anne. Amu Anne a mbe ntyi fam Kayif, a to fe nlô betuni ya mbu ôte.

¹⁴ E nde fe Kayif nye a nga leb Beyude na e ne mvaé na môte wuwua nye a wu asu ngum ayoñ.

Pierre a kate Yésus

¹⁵ Simon Pierre a nga ke a tôñe Yésus baa ñye'é mfe. Mbôl nlô *ntuni a mbe a yeme nye'é ate, e nde a nga nyiin e nseñ ya *nda nlô *ntuni été baa Yésus,

¹⁶ Pierre ki a li'i a tele *mbé yôp, mfa'a y'atan. Ane ñye'é mbo'o nlô *ntuni a mbe a yeme nyô a nga ke mane kobô minga a ba'ale *mbé na, a nyiñili Pierre élum été.

¹⁷ E nde minga a ba'ale *mbé a zu jô Pierre na: Ye ô nji bo wua ya beyé'é be môte nyô? Ane Pierre a nga jô na: Me nji bo été.

¹⁸ Bebo bisaé a beba'ale *nda be nga kôbane di, be nga woban nduan, amu avep; Pierre a ntele ñhe valé baa be be be woba'ane nduan.

Nlô betuni a sili Yésus minsili

¹⁹ E nde nlô *ntuni a nga sili Yésus ajô ya beyé'é bé a miñye'elane mié.

²⁰ Ane Yésus a nga yalane nye na: Me nga kobô bôte bese éngengeñ, a mamien me nga ye'ele éyoñ ése *aba Zambe a Nda Zambe, e vôme Beyude bese ba zu tôkan, a me nji kobô jam éziñ asoé.

²¹ Jé fo'o wo sili ma? Sili'i bôte be nga vô'ôlô na be nga jô be aya? Ke bebiene ba yem e mam me mbe me kobô'ô.

²² Nnéé ane a nga suu nkobô, ane môte wua ya beba'ale a nga tele valé a nga bibi Yésus abaé a jô na: Ye aval di e nde wo yalan nlô *ntuni'

²³ Ane Yésus a nga yalane nye na: Nge me kobôya *abé, liti'i jôm é ne abé; nge ma kobô ki *mvo'é, wo bibi ma amu jé'

²⁴ E nde Anne a nga lôme nye a tii ngata'a e be Kayif nlô Ntuni.

Pierre a beta kate Yésus

²⁵ Simon Pierre nye a tele a woba'ane nduan. Ane be nga jô nye na: Ye wo fe ô nji bo wua ya beyé'é be môt ate? Ane a nga kat a jô na: Me nji bo été.

²⁶ E nde mbo bisaé wua éziñ ya be nlô Ntuni, a vumane môte Pierre a nga tyi'i alo, a zu jô na: Ye me nji yene wo afub li mia be nye'

²⁷ Ane Pierre a nga ba'alane beta kat, nnôm kub ki a nga sôane loñ été été.

Yésus asu be Pilat

²⁸ E nde be nga kôlô Yésus be Kayif a kee nye *nda be njô bôt, a ésala mametyé. Bebien be nga bo teke nyiin e *nda be njô bôt, be za kôb nsem éziñ, be kele di Pak.

²⁹ Ane Pilat a nga ke yene be nseñe a jô na: Ajô avé mia bo'olô môte nyô'

³⁰ Nde be nga nyoñe nkobô a yalane nye na: Nge môte nyô a nji ye bo mbo *abé, ve bi nga ye bo te zu ve wo nye.

³¹ Ane Pilate ki a nga jô be na: Mia bebien nyoñane nye, mi ke tyi'i ajô dé a metiñe menan. E nde Beyude be nga jô nye na: Mfa'a wongan, bi nji bi ngul éziñ ya tyi'i ajô ya wôé môt.

³² Ane ajô Yésus a nga tôéban ane a nga liti aval awu avé a ye wu.

³³ E nde Pilat a nga beta nyiin, a loone Yésus a jô nye na: Ye wo ô ne njôô Beyude'

³⁴ Ane Yésus a nga yalane na: Ye na womien wo jô ajô te, ye na bôte befe be nga kate wo de ajô dam'

³⁵ Pilate a nga yalane na: Ye me ke me mone Yude? Ke ayoñe dôé ebien, a minlô betuni e mbe be nga soo wo be zu me wo ve; ô nga bo jé'

³⁶ Ane Yésus a nga yalane na: Ejôé é ne énjam é nji bo ji ya si ndône mu; nge éjôé jam é too ji ya si ndône mu, ve nge bebo bisaé ya éjôé jam ba ye wosan na me bo te veban e mo Beyude. E nde ñhe éjôé jam é nji bo ji ya bi ne va.

³⁷ Ane Pilate a nga jô nye na: Ke ô ne ñhe njô bôt? Yésus ki nyee nye na: Womiene wo jô le na me ne njô-bôt. Ajô te nde me nga bialé de, ajô te nde fe me nga soo de si ndôn mu na, me zu bo'olô ajô ya bebela. A môt ase a ne môt ya bebela nye a wô'ô tyiñe jam.

³⁸ Pilat a nga jô nye na: Jé é ne bebela' Eyoñ a jôya nalé, ane a nga bulane ke yene Beyude a jô be na: Me me nji yen to'o ajô éziñ e be môte ate.

Ba ve Yésus mekua ya wu

³⁹ Ve mbôl mi bili tum na ma suu mia môte wua asu Pak, ye mia kômbô na me suu njôô Beyude'

⁴⁰ Ane be ki be nga jô a yôtane yôb été a ngule na: Sake môte nyô, su'u bia Barabas. Barabas ki a mbe nkañ ze mimfaka.