YOANES 14 - Kalate Zambe Nnomo a Mfefe Mfefé Nkôñelan

Yésus e bebela * zen a kebe Tate

¹ Nlem ô bo'o te kumetane mia; buna'ane Zambe, bunane fe ma.

² E *nda be Esaa wom, bitaba'a bi ne abui. Nge nalé momo, ve me nga ye kate mia, amu ma ke kôme mia vôm.

³ Nge ma ke a mane kôme mia vôm, mamien ma ye bulane zu nyoñe mia, e vôm me too, vôm ate fe mia yé tabe.

⁴ A mfa'a ma ke, mia yeme zene ya wôé.

⁵ E nde Thomas a nga jô nye na: A Nti, bi te yem e mfa'a wo ke, bia ye yeme zene ya wôé aya'

⁶ Ane Yésus a nga jô nye na: Ma me ne *zen, me to fe bebela, a ényiñ. Teke môt éziñ a ne ke be Tate, nye teke lôte be ma.

⁷ Nge mi nga ye yeme ma, ve mi nga ye fe yeme Esaa wom. Ve ataté éyoñe ji mia yeme nye a mi yeneya fe nye.

⁸ E nde Filip a jô nye na: A Nti, liti'i bia Esoo, abime te da yian bia.

⁹ Ane Yésus a nga jô nye na: Abim ayab éyoñ me tabeya a mia, a Filip, ye wô teke me yem? E môt a yeneya ma, a yeneya fe Esaa wom. Ve amu jé wo beta jô na, liti'i bia Esaa wôé.

¹⁰ Ye ô nji tu'a buni na me ne be Esaa wom, Esaa wome ki a ne be ma? Mejô ma kobô mia ma, me nji so e be mamien, Esaa wom a too be ma, e nye a bo bisaé bié.

¹¹ Buna'ane ma, amu me too e be Esaa wom, a Esaa wome ki e be ma. Nge sa nalé, buna'an amu mimboone mite mibien.

¹² Bebela, bebela fo'o, ma jô mia na, e môt a buni ma émien a ye fe bo mimboone ma bo, a a ye fe bo mam ma dañ malé anen, amu mamien ma ke e be Tate.

¹³ Ajô te, e jam ése mia ye ja'é a jôé dam, ma ye bo jame te, nalé Esaa a ye bi duma e be Mon.

¹⁴ Nge mia sili me jôm éziñ a jôé dam, ma ye bo je.

Ngaka'a Mfufub Nsisim

¹⁵ Nge mia nye'e ma, mia ye ba'ale metiñe mam.

¹⁶ A mamien ma ye ye'elan Esaa wom, éyoñe te a ye ve mia Mvolô minlem mfe na a zu tabe mia be nye nnôm éto.

¹⁷ Nsisim benya mejôô, e wu si ndôn é se ngule ya nyoñ, amu é nji yene wô nge yeme ke wô. Ve mia mia yeme wô, amu ô too be mia, ô ne fe be mia.

¹⁸ Maa ye li'i mia bobenyui, ma zu be mia.

¹⁹ A li'iya ve mon étun si ndôn teke beta yene ma, ve mia mia ye yene ma, amu me bili ényiñ a mia fe mia ye bi ényiñ.

²⁰ Môse ôte mia bebien mia ye yeme na me ne be Esaa wom a mia fe mi ne be ma aval mamien me né e be mia.

²¹ E môt a bili metiñe mam a ba'ale fe me, e nye *a nye'e ma. E nde fe, e môt *a nye'e ma, Esaa wom a ye nye'e nye, ma fe ma ye nye'e nye a ma ye liti nye mamien.

²² Eyoñe te Yuda, sake Iskariôt, a zu jô nye na: A Nti, jé ja bo na bia ô litii womien, ve teke liti si ndôn'

²³ Ane Yésus a nga yalan a jô nye na: Nge môt *a nye'e ma, a ye ba'ale ñye'elane wom, Esaa wom a ye nye'e nye, a bia ye zu e be nye, a kôm éto e be nye.

²⁴ E môt a nji nye'e ma, a ne te ba'ale mejô mam. E nde fe ñye'elan mia wôk ô nji bo éñwom, ô ne wu Esaa wom a nga lôme ma.

²⁵ Me maneya kobô mia mam ma bia be mia bi too.

²⁶ Ve Mvolô minlem, Mfufub Nsisim Tate a ye lôme mia a jôé dam, e nye a ye tu'a ye'ele mia mam mese a ba'alane simesane mia e mam mese mamien me nga ye'ele mia.

²⁷ Ma li'i mia *mvo'é, ma ve mia *mvo'é jam. Sake avale si ndône ja ve mia e nde ma fe ma ve mia. Nlem ô bo'o te kumetane mia, nge ko woñ.

²⁸ Mi maneya wôk ane me nga jô mia na, ma ke a ma beta zu be mia. Nge mia nye'e ma mia ye vak a nkean ma ke be Tate, amu Tate a dañe ma.

²⁹ Ve éyoñe ji me maneya kate mia mam mete me ngenane te bo, e nde éyoñe ma ye boban, mi buni'i.

³⁰ Teke fe me ye'e beta kobôô mia abui, amu njôô ya *si nyô a nga zu. Ve a nji bi jam éziñ e be ma,

³¹ ve ane si ndôn nyô ja ye yem na ma nye'e Tate, e nde avale Tate a nga ve ma *atiñ, avale te ma bo. Teba'ane tetele, bi kôlô va.