YOANES 13 - Kalate Zambe Nnomo a Mfefe Mfefé Nkôñelan

Yésus a sôbe beyé'é mebo

¹ E nde ñhe, ôsusua abô'ô Pak, Yésus a nga yeme na awolo dé e kpwaneya na a kôlô si ndône nyô a bet e be Esaa, a nga nye'e bôte bé ya si ndôn, ane a nga nye'e be akekui asu'ulan.

² Valé be ja'ak mame ngô'é, éyoñe te Satan a nyineya *nlem Yudas mone Simon Iskariôt, na a koñe nye,

³ amu Yésus a nga yeme na Esaa a nga ve nye mam mese e mo été, a na a nga so be Zambe a bulane fe ke e be Zambe,

⁴ ane a nga kôlô si e ndiane zañe va, a vaa ayab ngômesan ya yôp, a nyoñe aboñ éyé a tiñeti de angeteñ.

⁵ E nde a nga sôôé mendim e fandé, a nga ke ñhe a sôbe beyé'é bé mebo a fimine me a aboñ éyé ya angeteñ.

⁶ Eyoñ a nga ke kui e be Simon Pierre, ane Simon a nga jô nye na: A Nti, ye wo wo viane sôbe ma mebo'

⁷ Ane Yésus a nga nyoñe nkobô a jô na: E jame ma bo, ôô vo'o de yem éyoñe ji ve wo ye su'ulane yeme wô'ô de e melu ôsu.

⁸ Ane Pierre a nga jô nye na: Teke fo'o mone bebé na wo ye sôbe ma mebo! E nde Yésus ki a nga yalane nye na: Nge me nji sôbe wo mebo, wôna ô nji bi ngab e be ma.

⁹ Eyoñ éte Simon Pierre a zu jô nye na: A Nti, saa ve mebo étam, ve nalé fe mo a nlô bise.

¹⁰ Ane Yésus a nga jô nye na: E môt a maneya woban, a yiane fo'o sôbe ve mebo, étam, amu a ne *mfuban nyôl ése. Mfa'a wônan, mi ne *mfuban, ve sake mia bese.

¹¹ Amu a mbe a yemek e môt a ye koñe nye, e nde a nga jô na, sake mia bese mi ne *mfuban.

¹² Eyoñ a maneya sôbe beyé'é mebo, ane a nga beta jaé ngômesane jé wé a ke tabe si. E nde a nga kee nkobô ôsu a jô be na: Ye mia tu'a wôk e jam ma mane bo mia di'

¹³ Mia loone me na: Nye'ele, a Nti, mia bele, amu me ne fo'o bie.

¹⁴ Nge ma sôbe mia mebo, ma Nti a Nye'ele, mia fe mia yiane sôbane mebo wua a nyô mbok..

¹⁵ Amu ma te ve mia éve'ela'a na avale ma te bo mia, mia fe mi bo nalé.

¹⁶ Bebela, bebela fo'o ma kate mia nyô na, mbo ésaé a nji dañe masa wé, nalé fe nke *nlôman te dañ môt a nga lôme nye.

¹⁷ Nge mia tu'a yeme nalé, mi ne ébotan nge mia bo mam mete.

¹⁸ Me nji kobô ajô mia bese. Mamien ma yem e bôte me nga top. Ve da ntilan wo yiane tôéban na: E môt a nga di bidi biam a nga tibi ma étimekili jé.

¹⁹ Ve ma kate mia de éyoñe ji, jam ebien e ngenan te boban, na, éyoñ da ye boban, mi buni na ME NE.

²⁰ Bebela, bebela fo'o, ma kate mia na, nge môt éziñ a nyoñe môt ma lôm, a nyoñe fe mamien, a e nyô ki a nyoñe ma, a nyoñe fe môt a nga lôme ma.

Yésus a kulu ajô nkoñane wé

²¹ Eyoñe Yésus a maneya kobô mam mete, ane *nlem ô nga ju'ulane nye abum été, ane a nga tu'a jô ne ngeññ na: Bebela, bebela émien, ma kate mia na, wua ya be mia a ye koñe ma.

²² Beyé'é be nga ke fo'o ba fomban, be teke yem za nye a jôô nye.

²³ Nye'é wua, e nyô Yésus a mbe a nyeke'e, a nga too nye fefe, a ye'e nye tôé.

²⁴ E nde ñhe Simon Pierre a nga feb nye wo a jô na: Sili'i môt Yésus a jôô nye.

²⁵ Ane nye ki a nga sili, a ye'e Yésus e tôé a jô nye na: A Nti, a ne za'

²⁶ E nde Yésus a nga yalane na: A ne môt ma ye ve nduban éfuse belet. A dube ñhe éfuse belet, a nyoñé a ve je Yudas mone Simon Iskariôt.

²⁷ Nnéé ane a nga mane nyoñe éfuse belet, ane Satan a nga nyiin e be nye. E nde Yésus a nga jô nye na: E jam wo bo, bo'o d'avô.

²⁸ Ve jame te ese, teke môt éziñ ya ba be mbe valé a nga yem amu jé a nga jô nye nalé.

²⁹ Ajô te, mbôl Yudas nye a nga bili nkop, bôte bevok be nga si'ako na Yésus a jô nye na, kele kuse biôme ya abôk, nge na va'a bingôngol bi bôt jôm éziñ.

³⁰ Eyoñ a nyoñeya éfuse belet, e nde a nga kui atan été été, éyoñ éte alu e vineya.

Mfefé atiñ

³¹ Eyoñe nye a keya, ane Yésus a nga jô na: Eyoñe jina Mone Môt a nyoñeya duma, Zambe a nyoñeya fe duma e be nye.

³² A nge Zambe a nyoñeya duma e be nye, Zambe émien a ye fe ve nye duma, a ye ve nye duma te ana'ana.

³³ A ayôme *bon dam, me ngenan bia be mia ôyôme mon nté; mia ye jeñe ma; aval me nga kobô Beyude na, e vôm ma ke, mi se ngul ya zu, avale te fe ma kobô mia éyoñe ji.

³⁴ Ma ve mia mfefé atiñe na, nye'esa'ané, aval ane me nga nye'e mia, nalé fe mia mia nye'esa'ané.

³⁵ E jame di nde bôte bese ba ye yeme na mi ne fo'o beyé'é bam, nge mia nye'esan e zañe jenan, wua a nyu mbok.

Pierre a katee Yésus

³⁶ Ane Simon Pierre a nga jô Yésus na: A Nti, wo ke ke vé? E nde Yésus a nga yalane na: E vôm ma ke, ô se ngul ya tôñe me wé éyoñe ji, ve melu ôsu, wo ye zu wo tôñe ma e mvus.

³⁷ Ane Pierre a nga jô nye na: A Nti, amu jé me se ngul ya tôñe wo éyoñe ji? Ma ye ju ényiñe jam e butane wo.

³⁸ Ane Yésus a nga yalane na: Ye wo ye ju, ényiñe jôé a butane énjam? Bebela, bebela émien fo'o ma kate wo na, nnôme kub a ngenan te loñ, wo ye kate ma biyoñ bilaa.